នាយឧត្តមសេនីយ៍ មុឹង សំផន អំពាវនាវដល់អតីតយុទ្ធជនបន្តចូលរួមថែរក្សាការពារសុខសន្តិភាពឱ្យបានគង់វង្ស
ភ្នំពេញ៖ ឯកឧត្តម នាយឧត្តមសេនីយ៍ ម៉ឹង សំផន រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការក្រសួងការពារជាតិ និងជាអនុប្រធានក្រុមការងាររាជរដ្ឋាភិបាលចុះមូលដ្ឋានខេត្តស្វាយរៀង ប្រធានក្រុមការងារចុះមូលដ្ឋានស្រុកចន្ទ្រា នៅថ្ងៃទី១៧ ខែមិថុនា ឆ្នាំ២០២៣នេះ បានអញ្ជើញជាអធិបតីក្នុងពិធីបំពាក់មេដាយការពារជាតិជូនអតីតយុទ្ធជនកម្ពុជា សរុបចំនួន ១០២នាក់ ក្នុងស្រុកចន្ទ្រា ខេត្តស្វាយរៀង។
ថ្លែងទៅកាន់អង្គពិធីនាឱកាសនោះ ឯកឧត្តម នាយឧត្តមសេនីយ៍ មុឹង សំផន បានលើកឡើងថា រាជរដ្ឋាភិបាលដឹកនាំដោយគណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រមុខរាជរដ្ឋាភិបាល តែងគិតគូរនិងយកចិត្តទុកដាក់ខ្ពស់ចំពោះអតីតយុទ្ធជន និងក្រុមគ្រួសារទាំងអស់ ជាពិសេសចំពោះអតីតយុទ្ធជនដែលមានជីវភាពលំបាក។ ជាក់ស្តែង សម្តេចតេជោ ហ៊ុន សែន បានសម្រេចបង្កើតសមាគមអតីតយុទ្ធជនកម្ពុជានៅក្នុងឆ្នាំ២០០៧ ដែលមានសម្តេចផ្ទាល់ជាប្រធានសមាគម ដើម្បីបង្ហាញពីការយកចិត្តទុកដាក់ខ្ពស់ លើកកម្ពស់កិត្តិយស និងគុណបំណាច់ដ៏ធំធេងមិនអាច់កាត់ថ្លៃបានរបស់អតីតយុទ្ធជនទាំងអស់ ដែលបានធ្វើពលិកម្មលះបង់សាច់ស្រស់ឈាមស្រស់តស៊ូយ៉ាងប្តូរផ្តាច់ និងស្មោះស្ម័គ្រជាមួយសម្តេចតេជោ ហ៊ុន សែន ក្នុងការស្វែងរកសុខសន្តិភាពជូនប្រទេសជាតិចាប់តាំងពីដំណាក់កាលវាយផ្តួលរំលំរបបប្រល័យពូជសាសន៍និងទទួលបានជ័យជំនះនាថ្ងៃទី៧ ខែមករា ឆ្នាំ១៩៧៩ រហូតដល់ការដំណាក់កាលបញ្ចប់សង្គ្រាមរុំារ៉ៃ ឈានដល់ការបង្រួបបង្រួមជាតិ មានសុខសន្តិភាពពេញលេញចាប់តាំងពីថ្ងៃទី២៩ ខែធ្នូ ឆ្នាំ១៩៩៨ តាមរយៈការអនុវត្តនយោបាយឈ្នះ-ឈ្នះ របស់សម្តេចតេជោនាយករដ្ឋមន្ត្រី។
ឯកឧត្តម នាយឧត្តមសេនីយ៍ មុឹង សំផន បានបន្តទៀតថា ពិធីបំពាក់មេដាយការពារជាតិនាពេលនេះ គឺជាការរំលឹកឡើងវិញនូវការដឹងគុណ និងការទទួលស្គាល់នូវគុណបំណាច់ចំពោះអតីតយុទ្ធជនទាំងអស់ ដើម្បីបុព្វហេតុការពារបូរណភាពទឹកដី ការកសាងសន្តិភាព ព្រមទាំងការអភិវឌ្ឍប្រទេសជាតិ ផ្តើមចេញពីចំណុចសូន្យពីបាតដៃទទេរហូតទទួលបាននូវវឌ្ឍនភាព និងការរីកចម្រើនលូតលាស់លើគ្រប់វិស័យដូចសព្វថ្ងៃ។
ឯកឧត្តម នាយឧត្តមសេនីយ៍ មុឹង សំផន បានអំពាវនាវដល់អតីតយុទ្ធជនបន្តចូលរួមថែរក្សាការពារសុខសន្តិភាពឱ្យបានគង់វង្ស មិនត្រូវឱ្យបុគ្គលណា ឬបរទេសណាមកបំផ្លាញសន្តិភាពដែលរកបានដោយកម្រឱ្យបាត់បង់ទៅវិញជាដាច់ខាត ពិសេសបន្ដជឿជាក់ ស្មោះស្ម័គ្រ និងគាំទ្រដល់ការដឹកនាំរបស់សម្តេចតេជោនាយករដ្ឋមន្ត្រី ដែលជាប្រធានគណបក្សប្រជាជនកម្ពុជា ក្នុងការបោះឆ្នោតនាពេលខាងមុខនេះ ដើម្បីប្រទេសជាតិទទួលបានសុខសន្តិភាព និងការអភិវឌ្ឍ។
ឯកឧត្តម នាយឧត្តមសេនីយ៍ មុឹង សំផន ក៏បានស្នើសូមថ្នាក់ដឹកនាំសមាគមអតីតយុទ្ធជនគ្រប់ថ្នាក់ និងអាជ្ញាធរមូលដ្ឋានបន្តយកចិត្តទុកដាក់ចុះជួបសួរសុខទុក្ខ និងស្វែងយល់ពីសុខភាព ជីវភាពរបស់អតីតយុទ្ធជន និងគ្រួសារអតីតយុទ្ធជនឱ្យបានជាប្រចាំ ពិសេសជួយសម្រួលដោះស្រាយបញ្ហា និងផ្តល់សេវាសាធារណៈជូនអតីតយុទ្ធជន ឱ្យបានទាន់ពេលវេលា និងមានប្រសិទ្ធភាព។
ឯកឧត្តម នាយកឧត្តមសេនីយ៍ មុឹង សំផន ក៏បាននាំយកថវិកាជាអំណោយរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចែកជូនសមាជិកអតីតយុទ្ធជនក្នុងម្នាក់ៗ សារ៉ុង១ ក្រម៉ា១ និងថវិកា ៥មុឺនរៀលផងដែរ។
ឆ្លៀតនៅឱកាសនោះដែរ ឯកឧត្តម នាយឧត្តមសេនីយ៍ មុឹង សំផន ក៏បានចាត់តាំងអោយក្រុមពេទ្យព្រះកេតុមាលា និងក្រុមគ្រូពេទ្យកងតូចដឹកជញ្ជូនលេខ៩៩ ពិនិត្យ ព្យាបាលជម្ងឺជូនសមាជិកអតីតយុទ្ធជន និងក្រុមគ្រួសារទាំងអស់ផងដែរ។
បន្ទាប់ពី ពិធីបំពាក់មេដាយការពារជាតិនិងពិនិត្យ ព្យាបាលជម្ងឺជូនអតីតយុទ្ធជនកម្ពុជានិងគ្រួសាររួចមក ឯកឧត្តម នាយឧត្តមសេនីយ៍ មុឹង សំផន ក៏បានរៀបចំពិសារអាហារសាមគ្គីដ៏ឆ្ងាញ់ពិសារ ជូនដល់សមាជិកអតីតយុទ្ធជនទាំង ១០២នាក់ និងភ្ញៀវកិត្តិយសដែលបានចូលរួមនាឱកាសនោះផងដែរ ៕
