NATO នឹងបង្កើតការិយាល័យទំនាក់ទំនងនៅក្នុងទីក្រុងតូក្យូ នៃប្រទេសជប៉ុន ដើម្បីពង្រឹងទំនាក់ទំនងក្នុងតំបន់
តូក្យូ៖ កាសែត Nikkei បានចុះផ្សាយកាលពីថ្ងៃអង្គារថា អង្គការណាតូនឹងបង្កើតការិយាល័យទំនាក់ទំនងនៅទីក្រុងតូក្យូក្នុងឆ្នាំ ២០២៤ ហើយប្រើប្រាស់វាជាមជ្ឈមណ្ឌលសម្រាប់កិច្ចសហប្រតិបត្តិការជាមួយប្រទេសអូស្ត្រាលី ជប៉ុន នូវែលសេឡង់ និងកូរ៉េខាងត្បូង។
កាលពីខែឧសភា ឯកអគ្គរដ្ឋទូតជប៉ុនប្រចាំសហរដ្ឋអាមេរិកបានឲ្យដឹងថា សម្ព័ន្ធភាពយោធាដឹកនាំដោយសហរដ្ឋអាមេរិកកំពុងរៀបចំផែនការការិយាល័យទីក្រុងតូក្យូ ដែលជាកន្លែងដំបូងគេនៅអាស៊ី ដើម្បីសម្រួលការពិគ្រោះយោបល់ក្នុងតំបន់ ប៉ុន្តែប្រធានាធិបតីបារាំងលោក Emmanuel Macron បានជំទាស់នឹងផែនការនេះ។
នៅពេលនោះ ប្រទេសចិនបានឲ្យដឹងថា តំបន់អាស៊ីប៉ាស៊ីហ្វិកមិនស្វាគមន៍អ្វីដែលគេហៅថា “ការប្រឈមមុខដាក់គ្នាជាក្រុម” ដោយជំរុញឱ្យប្រទេសជប៉ុន ប្រុងប្រយ័ត្នបន្ថែមលើបញ្ហាសន្តិសុខយោធា ដោយសារប្រវត្តិសាស្រ្តនៃការឈ្លានពានរបស់ខ្លួន។
កាសែត Nikkei បានឲ្យដឹងថា NATO នឹងធ្វើឱ្យទំនាក់ទំនងកាន់តែស៊ីជម្រៅជាមួយដៃគូធំៗចំនួនបួនរបស់ខ្លួននៅប៉ាស៊ីហ្វិក ដោយរៀបចំឯកសារកិច្ចសហប្រតិបត្តិការពីរផ្លូវជាមួយនីមួយៗ ដើម្បីបង្កើតមូលដ្ឋានសម្រាប់កិច្ចសហប្រតិបត្តិការលើបញ្ហាដូចជា សន្តិសុខតាមអ៊ីនធឺណិត និងលំហ។
ក្នុងដំណើរទស្សនកិច្ចទៅកាន់ប្រទេសជប៉ុនកាលពីខែមករា ប្រធានអង្គការណាតូលោក Jens Stoltenberg បានសន្យាជាមួយនាយករដ្ឋមន្រ្តីលោក Fumio Kishida ក្នុងការពង្រឹងទំនាក់ទំនងក្នុងការប្រឈមមុខនឹងបញ្ហាសន្តិសុខ ជាប្រវត្តិសាស្ត្រ ដោយលើកឡើងពីការឈ្លានពានរបស់រុស្ស៊ីលើអ៊ុយក្រែន និងអំណាចយោធាដែលកំពុងកើនឡើងរបស់ចិន។
អ្នកនាំពាក្យក្រសួងការបរទេសនិងពាណិជ្ជកម្មបានឲ្យដឹងថា៖ ប្រទេសអូស្ត្រាលីនឹងមានការធ្វើបច្ចុប្បន្នភាពបន្ថែមទៀតលើការរៀបចំភាពជាដៃគូក្នុងពេលកំណត់។
អ្នកនាំពាក្យបានឲ្យដឹងនៅក្នុងសេចក្តីថ្លែងការណ៍មួយថា ដៃគូណាតូទាំងអស់កំពុងផ្លាស់ប្តូរទៅកាន់ដំណើរការកម្មវិធីភាពជាដៃគូដែលតម្រូវតាមបុគ្គលថ្មី នៅពេលដែលការរៀបចំភាពជាដៃគូដែលមានស្រាប់របស់ពួកគេត្រូវកំណត់សម្រាប់ការបន្ត។
អូស្ដ្រាលីស្ថិតក្នុងចំណោមដៃគូចំនួន ៥ ដែលមិនមែនជាសមាជិកណាតូ ប៉ុន្តែបានបង្កើនឱកាសសម្រាប់កិច្ចសហប្រតិបត្តិការកាន់តែស៊ីជម្រៅ ដូចជាការបណ្តុះបណ្តាល និងការចែករំលែកព័ត៌មាន ដើម្បីរៀបចំសម្រាប់ការគ្រប់គ្រងវិបត្តិនាពេលអនាគត។
កាលពីខែមុន លោក Kishida បានឲ្យដឹងថា ប្រទេសជប៉ុនមិនមានគម្រោងចូលរួមជាមួយអង្គការណាតូក្នុងនាមសមាជិក ឬរដ្ឋពាក់កណ្តាលសមាជិកនោះទេ ខណៈដែលប្រព័ន្ធផ្សព្វផ្សាយបានឲ្យដឹងថា នៅពេលលោកកំពុងរៀបចំខ្លួនដើម្បីចូលរួមកិច្ចប្រជុំកំពូលរបស់អង្គការណាតូនៅក្នុងប្រទេសលីទុយអានីក្នុងខែកក្កដា។
ការិយាល័យប្រធានាធិបតីកូរ៉េខាងត្បូងបានបញ្ជាក់ថា ខ្លួនមិនមានការអត្ថាធិប្បាយទេ នៅពេលសួរអំពីរបាយការណ៍នេះ។
ប្រភព៖ Reuters
ប្រែសម្រួលដោយ៖ [ឡាយ លីហួ]
