ឯកឧត្តម អ៊ូច ភា៖ ប្រជាការពារ គឺជាអ្នកដែលអាចថែរក្សានូវសន្តិសុខ សណ្តាប់ធ្នាប់សាធារណៈ ក្នុងមូលដ្ឋានប្រកបដោយប្រសិទ្ធភាពត្រាំកក់
ភ្នំពេញ៖ ឯកឧត្តម អ៊ូច ភា អភិបាលខេត្តតាកែវ និងជាប្រធានគណៈបញ្ជាការឯកភាពរដ្ឋបាលខេត្ត នារសៀលថ្ងៃទី១១ ខែមិថុនា ឆ្នាំ២០២៣ បានអញ្ជើញចុះចែកសម្លៀកបំពាក់ជាឯកសណ្ឋានសម្រាប់ប្រជាការពារ ចំនួន ១២៣រូប ក្នុងឃុំអង្គតាសោម ស្រុកត្រាំកក់ ខេត្តតាកែវ ដើម្បីជាការលើកទឹកចិត្ត និងចូលរួមចំណែកអនុវត្តន៍គោលនយោបាយភូមិ-ឃុំមានសុវត្ថិភាព ប្រសិទ្ធភាពបន្ថែមទៀត និងស្របតាមទិសដៅពង្រឹងសន្តិសុខ សណ្តាប់ធ្នាប់ ការពង្រឹងវិធានការថែរក្សាសន្តិសុខសាធារណៈ។
ឯកឧត្តម អ៊ូច ភា អភិបាលខេត្ត បានមានប្រសាសន៍លើកឡើងថា ប្រជាការពារ គឺជាអ្នកដែលអាចថែរក្សានូវសន្តិសុខ សណ្តាប់ធ្នាប់សាធារណៈ ក្នុងមូលដ្ឋានប្រកបដោយប្រសិទ្ធភាព ព្រោះប្រជាការពារ គឺជាប្រជាពលរដ្ឋ ដែលរស់នៅដោយផ្ទាល់ជាមួយក្រុមគ្រួសារ នៃបងប្អូនក្នុងភូមិ-ឃុំ-សង្កាត់ ហើយបានដឹងច្បាស់អំពីស្ថានភាព មុខរបរ និងការរស់ ដែលស្ថិតនៅជិតបំផុតផងដែរ។
ឯកឧត្តម អ៊ូច ភា បានធ្វើការកោតសរសើរ និងលើកទឹកចិត្តដល់ប្រជាការពារទាំងអស់ និងធ្វើការគាំទ្រនូវសកម្មភាពដ៏ប្រសើរ ក្នុងឆន្ទៈរួមគ្នាអភិវឌ្ឍន៍ និងការថែរក្សាសន្តិភាពក្រោមការដឹកនាំរបស់រាជរដ្ឋាភិបាលកម្ពុជា និងសូមឱ្យប្រជាការពារ ព្រមទាំងប្រជាពលរដ្ឋទាំងអស់ បន្តអនុវត្តន៍គោល នយោបាយភូមិ-ឃុំមានសុវត្ថិភាព ក្នុងមូលដ្ឋានជារៀងរហូត។ ជាមួយគ្នានេះប្រជាការពារបានរួមចំណែកផ្តល់នូវដំណឹងមិនប្រក្រតីដែលបាន កើតឡើងក្នុងមូលដ្ឋានមានដូចជា៖ បទល្មើសគ្រឿងងញៀន ក្មេងទំនើង ដែលធ្វើសមត្ថកិច្ចកំណត់មុខសញ្ញា និងបង្ក្រាបបានជាបន្តបន្ទាប់ផងដែរ។
ជាមួយគ្នានេះឯកឧត្តមអភិបាលខេត្ត បានបញ្ជាក់ថា ក្រុមប្រជាការពារក៏បានសម្តែងក្តីរីករាយ ដោយបានលើកឡើងព្រមៗគ្នាថា បើទោះបីជាពួកគាត់មិនមានប្រាក់ខែក្តី ប៉ុន្តែពួកនៅតែពេញចិត្តស្ម័គ្រចិត្តការពារសន្តិសុខ នៅក្នុងមូលដ្ឋានរបស់ពួកគាត់ ដើម្បីឱ្យប្រជាពលរដ្ឋនៅក្នុងភូមិរស់នៅដោយមិនព្រួយបារម្ភណ៍ ស្របតាមគោលនយោបាយរបស់រាជរដ្ឋាភិបាល ៕
