សម្តេចតេជោ ចង់ឲ្យវិស័យកីឡារបស់អាស៊ាន ក្លាយទៅជាកីឡាដ៏ខ្លាំង ដែលថ្ងៃក្រោយ អាចដេញថ្លៃយកសិទ្ធិធ្វើជាម្ចាស់ផ្ទះរៀបចំ World Cup
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានដាក់ក្តីរំពឹងថា មេដឹកនាំប្រទេសសមាជិកអាស៊ាន នឹងគាំទ្រទស្សនៈសម្តេច ក្នុងការធ្វើឲ្យអាស៊ានមានវិស័យកីឡាដ៏ខ្លាំង ដែលអាចប្រកួតជាមួយបណ្តាប្រទេសក្រៅតំបន់ និងឈានដល់ការដេញថ្លៃធ្វើម្ចាស់ផ្ទះរៀបចំ World Cup ។
ក្នុងឱកាសបើកការដ្ឋានសាងសង់ល្បឿនលឿនភ្នំពេញ-បាវិត នាថ្ងៃទី៧ មិថុនា សម្តេចតេជោ ហ៊ុន សែន បានបញ្ជាក់ថា «យើងចង់ពង្រឹងសាមគ្គីភាព។ យើង (អាស៊ាន) មានជាង ៦០០លាននាក់ ដោយសារតែកីឡានេះឯង ទាំងកីឡាធម្មតា និងកីឡាជនពិការ។ យើងចង់ឲ្យមានទំនាក់ទំនងកាន់តែជិតស្និត រវាងប្រជាជន និងប្រជាជន តាមរយៈវិស័យកីឡា។ យើងក៏ចង់ឲ្យវិស័យកីឡារបស់អាស៊ាន ក្លាយទៅជាកីឡាដ៏ខ្លាំង។ ខ្ញុំនឹកស្រម៉ៃថា ថ្ងៃណាមួយ អាស៊ាននឹងមានបាល់ទាត់របស់អាស៊ាន ហើយពេលនោះបាល់ទាត់របស់អាស៊ាន អាចប្រកួតជាមួយបាល់ទាត់របស់ចិន។ អាស៊ាន មានជាង ៦០០លាននាក់ ឯចិនមានជាង ១៤០០លាននាក់ ដឹងតែរកមនុស្សបានហើយ។ យើងយកកម្ពុជា ២នាក់ ឬយកពីប្រទេសអាស៊ាន ២នាក់ ក្នុងមួយប្រទេស ដើម្បីប្រកួតគ្នា។ ថ្ងៃក្រោយ យើងអាចដេញយកសិទ្ធិធ្វើជាម្ចាស់ផ្ទះរៀបចំ World Cup យើងដេញថ្លៃរៀបចំអូឡាំពិក» ៕
