សម្តេចតេជោ និងសម្តេចកិត្តិព្រឹទ្ធបណ្ឌិត អញ្ជើញបើកការប្រកួតកីឡាជនមាន ពិការភាពអាស៊ានប៉ារ៉ាហ្គេម នាល្ងាចថ្ងៃនេះ
ភ្នំពេញ៖ នៅវេលាម៉ោងប្រមាណ ៦ល្ងាចថ្ងៃទី៣ ខែមិថុនា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នឹងអញ្ជើញជាអធិបតីភាពដ៏ខ្ពង់ខ្ពស់ បើកការប្រកួតកីឡាជនមានពិការភាពអាស៊ានប៉ារ៉ាហ្គេមលើកទី១២ ។
ពិធីបើកព្រឹត្តិការណ៍ជាប្រវត្តិសាស្ត្រនៃការធ្វើជាម្ចាស់ផ្ទះប្រកួតកីឡាជនមានពិការភាពនៅតំបន់អាស៊ីអាគ្នេយ៍ជាលើកដំបូងសម្រាប់កម្ពុជា ក្រោយព្រឹត្តិការណ៍នេះវត្តមាន២៤ឆ្នាំ នឹងត្រូវប្រព្រឹត្តទៅនៅពហុកីឡដ្ឋានជាតិមរតកតេជោ។ ពិធីនេះនឹងប្រព្រឹត្តយ៉ាងមហោឡារិកគ ដោយមានការអញ្ជើញចូលរួមពីថ្នាក់ដឹកនាំជាន់ខ្ពស់់នៃរាជរដ្ឋាភិបាលកម្ពុជា ប្រតិភូកីឡាជនមានពិការភាពអាស៊ាន ភ្ញៀវជាតិ អន្តរជាតិ អត្តពលិកជនមានពិការភាព និងមហាជនប្រមាណជាង ៦ម៉ឺននាក់។
កម្មវិធីជាច្រើននឹងត្រូវប្រារព្ធឡើងមានដូចជា ការរាប់ថយក្រោយពីលេខ១២ ដល់លេខ១ ហើយបាញ់កាំជ្រួច, ដង្ហែទង់ជាតិ និងគោរពទង់ជាតិព្រះរាជាណាចក្រកម្ពុជា, ដង្ហែក្បួនប្រតិភូកីឡាជនមានពិការភាពអាស៊ានទាំង១១ប្រទេស, ដង្ហែ និងគោរពទង់ជាតិសហព័ន្ធកីឡាជនមានពិការភាពអាស៊ាន, សច្ចាប្រណិធានតំណាងអត្តពលិកមានពិការភាព និងតំណាងអាជ្ញាកណ្តាល ចៅក្រម, ផ្ទាំងទស្សនីយភាព «បេះដូងខ្មែរ» មានរយៈពេល ៣៥នាទី ដោយមានការប្រគំស្គរជ័យ ២២០នាក់ និងរបាំនារីកម្ពុជា ១៦៥នាក់, រត់ភ្លើងគប់, អុជភ្លើងគប់ធំ និងការអុជកាំជ្រួចអបអរសាទររយៈពេល៤នាទី។
សូមបញ្ជាក់ថា កីឡាអាស៊ានប៉ារ៉ាហ្គេម គឺជាការប្រកួតកីឡាជនមានពិការភាពក្នុងប្រទេសទាំង១១នៅអាស៊ីអាគ្នេយ៍។ ការប្រកួតបានចាប់ផ្តើមលើកដំបូងនៅទីក្រុងកូឡាឡាំពួ ប្រទេសម៉ាឡេស៊ី ពីថ្ងៃទី២៦ ដល់២៩ ខែតុលា ឆ្នាំ២០០១ ដោយមានអត្តពលិកចូលរួមជាង ៧០០នាក់ មកពីប្រទេសព្រុយណេ មីយ៉ាន់ម៉ា កម្ពុជា ឥណ្ឌូនេស៊ី ឡាវ ម៉ាឡេស៊ី ហ្វីលីពិន សិង្ហបុរី ថៃ និងវៀតណាម ៕
