ពលរដ្ឋថៃម្នាក់ដើរបេះបន្លែតាមព្រំដែនជាន់មីនរងរបួសធ្ងន់ យោធាខ្មែរកាប់ឆ្ការព្រៃដើម្បីជួយប៉ះចំមីនផ្ទុះរបួសធ្ងន់ទាំង០២នាក់

ភ្នំពេញ៖ មានហេតុការណ៍ផ្ទុះមីនកក្រើកព្រៃ បណ្ដាលឲ្យមានមនុស្ស០២នាក់ រងរបួសធ្ងន់ ម្នាក់ជាពលរដ្ឋថៃ និងម្នាក់ទៀតជាទាហានខ្មែរ ករណីផ្ទុះមីននេះ បានកើតឡើងនៅវេលាម៉ោង១០និង៥០នាទីព្រឹកថ្ងៃទី២៧ ខែឧសភា ឆ្នាំ២០២៣ នៅត្រង់ចំណុចចន្លោះ បង្គោលសីមាលេខ៣៧-៣៨ ស្ថិតក្នុងភូមិសាស្ត្រភូមិក្ដឹបថ្ម ឃុំគោករមៀត ស្រុកថ្មពួក ខេត្តបន្ទាយមានជ័យ ទល់មុខភូមិសាស្ត្រ ភូមិអំពិល ឃុំតាប់ថៃ ស្រុកតាប្រាយ៉ា ខេត្តស្រះកែវ (ប្រទេសថៃ)។

នគរបាលវរសេនាតូចការពារព្រំដែនគោកលេខ៨០៧ បានឲ្យដឹងថា ដំបូងមានពលរដ្ឋថៃម្នាក់ឈ្មោះ សំរឹទ្ធ រ៉ែរឿន ភេទស្រី អាយុ ៤៦ឆ្នាំ រស់នៅភូមិអំពិល ឃុំតាប់ថៃ ស្រុកតាប្រាយ៉ា ខេត្តស្រះកែវ កំពុងដើរបេះបន្លែក្នុងព្រៃ នៅត្រង់ ចំណុចចន្លោះ បង្គោលសីមាលេខ៣៧-៣៨ ស្ថិតក្នុងភូមិសាស្រ្តភូមិក្ដឹបថ្ម ឃុំ គោករមៀត ស្រុកថ្មពួក ខេត្តបន្ទាយមានជ័យ ទំលំមុខភូមិសាស្ត្រ ភូមិអំពិល ឃុំតាប់ ថៃ ស្រុកតាប្រាំយ៉ា ខេត្តស្រះកែវ បានជាន់មីនបណ្តាលឲ្យផ្ទុះរងរបួសធ្ងន់ដាច់ជើងឆ្វេង និងរបួសលើផ្ទៃមុខ។

ក្រោយឡឺសូរសំម្លេងមីន ភ្លាមៗនោះកម្លាំងយោធាអភិវឌ្ឍន៍សហការជាមួយកម្លាំងដោះមីន(កម្ពុជា) និងកម្លាំងទាហានឈុតខ្មៅថៃ កងរយ 1203 ដែលឈរជើងនៅទល់មុខនោះ រាវរកមីនដើម្បីចូលទៅជួយសង្គ្រោះជនរងគ្រោះ នៅពេលកម្លាំងយើងរាវរកមីនផងកាប់ឆ្ការគ្រួសត្រាយព្រៃផងនោះ ស្រាប់តែ ឈ្មោះ សេង ឆន ភេទប្រុស អាយុ ៤០ឆ្នាំ ជាមន្ត្រីយោធាតំបន់អភិវឌ្ឍន៍ បានកាប់ត្រូវចំគ្រាប់មីនបណ្តាលឲ្យផ្ទុះ ០១គ្រាប់ទៀត បណ្ដាលឲ្យរងរបួសដៃខាងស្តាំ និងភ្នែកយ៉ាងធ្ងន់ធ្ងរ កម្លាំង់យើងបានជួយបញ្ជូនយោធាខាងលើទៅមន្ទី ពេទ្យបង្អែកស្រុកថ្មពួក និងបន្តបញ្ជូនទៅមន្ទីរពេទ្យ ភូមិភាគ៥ ពពីរ នៅខេត្តបាត់ដំបង។

នគរបាលបានបញ្ជាក់ថា ចំណែកពលរដ្ឋថៃនោះរហូតដល់ ម៉ោង០២និង២៥នាទីរសៀលទើបអាចជួយសង្គ្រោះបាន ហើយត្រូវបានទាហានថៃដឹកយកទៅសង្គ្រោះ ៕