បរទេស៖ ទីក្រុងមូស្គូ និងទីក្រុង Minsk បានចុះហត្ថលេខាលើកិច្ចព្រមព្រៀងមួយ ដើម្បីដាក់ពង្រាយជាផ្លូវការនូវមីស៊ីលនុយក្លេអ៊ែរយុទ្ធសាស្ត្ររបស់រុស្ស៊ី នៅលើទឹកដីបេឡារុស្ស។
រុស្ស៊ីកាលពីថ្ងៃព្រហស្បតិ៍បានឲ្យដឹងថា ជំហាននេះត្រូវបានជំរុញដោយការកើនឡើងភាពតានតឹងជាមួយលោកខាងលិច។
ទីភ្នាក់ងារព័ត៌មានរដ្ឋ TASS របស់រុស្ស៊ីបានដកស្រង់សម្តីរដ្ឋមន្ត្រីការពារជាតិរុស្ស៊ីលោក Sergei Shoigu ថា នៅក្នុងបរិបទនៃការកើនឡើងយ៉ាងខ្លាំងនៃការគំរាមកំហែងនៅតាមព្រំដែនភាគខាងលិចនៃប្រទេសរុស្ស៊ី និងបេឡារុស្ស ការសម្រេចចិត្តមួយត្រូវបានធ្វើឡើងដើម្បីចាត់វិធានការប្រឆាំងនៅក្នុងវិស័យនុយក្លេអ៊ែរយោធា។
ការដាក់ពង្រាយកាំជ្រួចត្រូវបានប្រកាសជាលើកដំបូងដោយប្រធានាធិបតីរុស្សុីលោក វ្ល៉ាឌីមៀ ពូទីន ក្នុងខែមីនា។
ចាប់តាំងពីការឈ្លានពានអ៊ុយក្រែនកាលពីឆ្នាំមុនមក លោក ពូទីន បានបញ្ជាក់ម្តងហើយម្តងទៀតថា រុស្ស៊ីនឹងត្រៀមខ្លួនជាស្រេចក្នុងការប្រើប្រាស់អាវុធនុយក្លេអ៊ែរ ប្រសិនបើចាំបាច់ដើម្បីការពារ បូរណភាពទឹកដី របស់ខ្លួន។
ណាតូបានឲ្យដឹងនៅពេលនោះថា ខ្លួនមិនឃើញមានតម្រូវការក្នុងការកែសម្រួលឥរិយាបថនុយក្លេអ៊ែររបស់ខ្លួនទេ ទោះបីជាសម្ព័ន្ធភាពយោធាបានចាត់ទុកវោហាសាស្ត្រនុយក្លេអ៊ែររបស់លោកពូទីនថាជា គ្រោះថ្នាក់ និងគ្មានការទទួលខុសត្រូវ។
ប៉ុន្តែលោក Richard Weitz ដែលជាអ្នកវិភាគគោលនយោបាយការបរទេស និងការពារជាតិដែលមានមូលដ្ឋាននៅទីក្រុងវ៉ាស៊ីនតោន ឌីស៊ី បានប្រាប់ Al Jazeera ថាប្រទេសរុស្ស៊ីទំនងជាមិនទទួលបានអត្ថប្រយោជន៍ ក្នុងវិស័យយោធាសុទ្ធសាធនោះទេ។
រុស្ស៊ីមានអាវុធនុយក្លេអ៊ែររាប់ពាន់គ្រាប់រួចហើយ ហើយអាវុធខ្លះទៀតត្រូវបានដាក់ពង្រាយនៅលើដី ឬនៅលើយន្តហោះ នៅជិតកន្លែងដែលទីតាំងបេឡារុស្សទំនងជាស្ថិតនៅ។ ដូច្នេះ វាបន្ថែមទីតាំងពីរបីទៀតទៅនឹងអ្វីដែលរុស្ស៊ីមានរួចហើយ។
វាជាសញ្ញានយោបាយ រដ្ឋាភិបាលរុស្ស៊ីនៅកម្រិតខ្ពស់បំផុតនឹងចេញសេចក្តីថ្លែងការណ៍ព្រមានអំពីហានិភ័យនៃសង្គ្រាមនុយក្លេអ៊ែរ ប្រសិនបើណាតូផ្តល់យន្តហោះ F-១៦ ដល់អ៊ុយក្រែន។
វាជាវិធីមួយដើម្បីរំលឹកលោកខាងលិចថា រុស្ស៊ីគឺជាមហាអំណាចនុយក្លេអ៊ែរ ហើយថាលោកខាងលិចត្រូវប្រុងប្រយ័ត្នជាងនេះ ឬយើងអាចជំពប់ដួលក្នុងសង្គ្រាមនុយក្លេអ៊ែរ។
កាលពីខែមីនា លោក Oleksiy Danilov ប្រធានក្រុមប្រឹក្សាសន្តិសុខ និងការពារជាតិរបស់អ៊ុយក្រែន បានហៅកិច្ចព្រមព្រៀងនេះថាជា ជំហានឆ្ពោះទៅរកអស្ថិរភាពផ្ទៃក្នុង របស់ប្រទេសបេឡារុស្ស ហើយលោកបានឲ្យដឹងថា វាបានបង្កើននូវអ្វីដែលលោកហៅថាកម្រិតនៃ ការយល់ឃើញអវិជ្ជមាន និងការបដិសេធជាសាធារណៈ របស់រុស្ស៊ី និងលោកពូទីន នៅក្នុង សង្គមបេឡារុស្ស។ គាត់បានសរសេរនៅលើ Twitter ថា វិមានក្រឹមឡាំងបានយកបេឡារុស្សធ្វើជាចំណាប់ខ្មាំងនុយក្លេអ៊ែរ។
លោក Shoigu បានឲ្យដឹងថា ទីក្រុងម៉ូស្គូនឹងរក្សាការគ្រប់គ្រងលើអាវុធ និងការសម្រេចចិត្តណាមួយលើការប្រើប្រាស់របស់ពួកគេ។
TASS បានដកស្រង់សម្តីគាត់ថា មីស៊ីល Iskander-M ដែលអាចផ្ទុកក្បាលគ្រាប់ធម្មតា ឬនុយក្លេអ៊ែរ ត្រូវបានប្រគល់ទៅឱ្យកងកម្លាំងប្រដាប់អាវុធបេឡារុស្ស ហើយយន្តហោះ Su-២៥ មួយចំនួនត្រូវបានបំប្លែងសម្រាប់ការប្រើប្រាស់អាវុធនុយក្លេអ៊ែរ។
លោក Shoigu ត្រូវបានដកស្រង់សម្តីថា ទាហានបេឡារុស្សបានទទួលការបណ្តុះបណ្តាលនៅក្នុងមជ្ឈមណ្ឌលហ្វឹកហ្វឺនរុស្ស៊ី។
លោកបានបន្ថែមថាកិច្ចព្រមព្រៀងដែលបានចុះហត្ថលេខាជាមួយសមភាគីបេឡារុស្សរបស់គាត់គ្របដណ្តប់លើនីតិវិធីសម្រាប់ការបង្កើត កន្លែងផ្ទុកអាវុធនុយក្លេអ៊ែរពិសេសនៅលើទឹកដីបេឡារុស្ស។
អាវុធនុយក្លេអែរយុទ្ធសាស្ត្រសំដៅទៅលើអាវុធដែលមានទិន្នផលទាប ដែលត្រូវបានរចនាឡើងសម្រាប់ការប្រើប្រាស់ក្នុងសមរភូមិ ផ្ទុយពីអាវុធយុទ្ធសាស្ត្រដែលមានសមត្ថភាពកម្ទេចទីក្រុងទាំងមូល។ រុស្ស៊ីមិនបានបង្ហាញពីចំនួនអាវុធនុយក្លេអ៊ែរយុទ្ធសាស្ត្រដែលខ្លួនមាន។
ប្រភព៖ Aljazeera
ប្រែសម្រួលដោយ៖ [ឡាយ លីហួ]
https://www.aljazeera.com/amp/news/2023/5/25/russia-signs-deal-to-deploy-tactical-nuclear-weapons-in-belarus
