ឯកឧត្ដម ហ៊ុន ម៉ាណែត៖ បច្ចុប្បន្ន និងអនាគត យើងមានតែរួមគ្នាបន្តកសាងសមិទ្ធផលបន្ថែម និងការពារអ្វីដែលមានកុំឱ្យធ្លាក់ចូលក្នុងអន្លង់សង្រ្គាមសារជាថ្មី

ភ្នំពេញ៖ ឯកឧត្តមបណ្ឌិត ហ៊ុន ម៉ាណែត បានលើកឡើងថា សម្រាប់ពេលបច្ចុប្បន្ន និងតទៅអនាគត គឺយើងមានតែរួមគ្នាបន្តកសាងសមិទ្ធផលបន្ថែម និងការពារអ្វីដែលមានក្នុងដៃឱ្យបានគង់វង្ស និងកុំឱ្យធ្លាក់ចូលសារជាថ្មីទៅក្នុងអន្លង់នៃសង្រ្គាមព្រាត់ប្រាស់ទោះក្នុងតម្លៃណាក៏ដោយ ។

ក្នុងឱកាសតំណាងដ៏ខ្ពង់ខ្ពស់របស់ សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន អញ្ជើញបញ្ចុះខណ្ឌសីមា ពុទ្ធាភិសេក និងសម្ពោធសមិទ្ធផលនានា ក្នុងវត្តសែនមនោរម្យ (ហៅវត្តចាស់) ស្ថិតក្នុងភូមិកងតាណឹងទី៨ ឃុំកងតាណឹង ស្រុកកងមាស ខេត្តកំពង់ចាម នាថ្ងៃទី២២ ឧសភា ឯកឧត្ដមបណ្ដិត ហ៊ុន ម៉ាណែត បានចូលរួមអនុមោទនាត្រេកអរចំពោះសមិទ្ធផលថ្មីៗជាច្រើនសម្រាប់វត្ត ដែលមានអាយុកាលជាង ៥០០ ឆ្នាំមួយនេះ ដោយបានឆ្លងកាត់ជាច្រើនជំនាន់ ទាំងសម័យកាលសុខសាន្តផង, សម័យកាលជម្លោះបែកបាក់ផង ទម្រាំមានការអភិវឌ្ឍរីកចម្រើនក្នុងសម័យកាលសុខសន្តិភាពឡើងវិញរបស់ជាតិខ្មែរ ដូចបច្ចុប្បន្ន ហើយទីអារាមដែលធា្លប់ត្រូវបានគេបោះបង់ចោល ក៏បានក្លាយជាទីកន្លែងប្រកបដោយភាពមនោរម្យ សម្រាប់គោរពបដិបត្តិសាសនា។

ឯកឧត្ដមបន្តថា ប្រសិនបើ ៥០០ ឆ្នាំ យើងមិនមានសង្គ្រាមបែកបាក់ គឺយើងច្បាស់ជាបានទទួលការរីកចម្រើនជឿនលឿនច្រើនជាងនេះ។

ឯកឧត្ដមបណ្ដិត បានបន្ថែមថា ដូច្នេះ សម្រាប់ពេលបច្ចុប្បន្ន និងតទៅអនាគត គឺយើងមានតែរួមគ្នាបន្តកសាងសមិទ្ធផលបន្ថែម និងការពារអ្វីដែលមានក្នុងដៃឱ្យបានគង់វង្ស និងកុំឱ្យធ្លាក់ចូលសារជាថ្មីទៅក្នុងអន្លង់នៃសង្រ្គាមព្រាត់ប្រាស់ទោះក្នុងតម្លៃណាក៏ដោយ “ការពារសន្តិភាពបាន គឺការពារអាយុជីវិត ការពារឱកាស និងការពារសិទ្ធិសេរីភាពគ្រប់បែបយ៉ាង រួមទាំងជំនឿសាសនា” ៕