ឯកឧត្ដម ឡេង វី អញ្ជើញកាត់វិញ្ញាសារប្រឡងជ្រើសរើសបេក្ខជនឲ្យចូលបម្រើការងារក្នុងក្របខ័ណ្ឌមន្ត្រីរាជការស៊ីវិល នៃរដ្ឋបាលរាជធានីភ្នំពេញ

ភ្នំពេញ៖ ឯកឧត្ដម ឡេង វី រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រឡង នៅព្រឹកថ្ងៃទី២១ ខែឧសភា ឆ្នាំ២០២៣នេះ បានអញ្ជើញកាត់វិញ្ញាសារប្រឡងជ្រើសរើសបេក្ខជនឲ្យចូលបម្រើការងារក្នុងក្របខ័ណ្ឌមន្ត្រីរាជការស៊ីវិល នៃរដ្ឋបាលរាជធានីភ្នំពេញ សម្រាប់ឆ្នាំ២០២៣ តាមការសម្រេចរបស់ក្រសួងមហាផ្ទៃ។

ការប្រឡងនេះបានធ្វើឡើងនៅវិទ្យាល័យ ជា ស៊ីម សន្ធរម៉ុកហើយការកាត់វិញ្ញាសារប្រឡងត្រូវបានធ្វើឡើងដោយមានការចូលរួមពីលោក ឯល ប៊ុនថុល រដ្ឋលេខាធិការក្រសួងមុខងារសាធារណៈ លោក កើត ឆែ អភិបាលរង តំណាងឲ្យឯកឧត្ដម ឃួង ស្រេង អភិបាលរាជធានីភ្នំពេញ និងជាប្រធានគណៈកម្មការរៀបចំការប្រឡងរាជធានីភ្នំពេញ។

សម័យប្រឡងនេះ ធ្វើឡើងរយៈពេលមួយព្រឹក ដែលមានបេក្ខជន បេក្ខនារី ចូលរួមប្រឡងចំនួន២,២៤៤រូប, ជានារីចំនួន១,០០២រូប ស្មើនឹង៩១បន្ទប់។ តាមការគូសបញ្ជាក់ពីគណៈកម្មការមេប្រយោគ បានឲ្យដឹងថា ប្រភេទក្របខ័ណ្ឌត្រូវបានចែកចេញជា៣គឺ៖

ទីស្តីការក្រសួងមហាផ្ទៃ៖
ក្របខ័ណ្ឌមន្ត្រីរដ្ឋបាលជាន់ខ្ពស់ ជ្រើសរើស១៥នាក់ ក្នុងចំណោមបេក្ខជន ដាក់ពាក្យប្រឡង ចំនួន៤៥០នាក់
ក្របខណ្ឌមន្ត្រីក្រមការ ជ្រើសរើស១៥នាក់ ក្នុងចំណោមបេក្ខជន៤៨៩នាក់
ក្របខ័ណ្ឌលេខាធិការរដ្ឋបាល ត្រូវជ្រើសរើស១០នាក់ ក្នុងចំណោមបេក្ខជន ចំនួន៦៥៦នាក់។

រដ្ឋបាលរាជធានីភ្នំពេញ មានក្របខ័ណ្ឌមន្ត្រីរដ្ឋបាលជាន់ខ្ពស់ ជ្រើសរើស ចំនួន៥នាក់ ក្នុងចំណោមបេក្ខជនដាក់ពាក្យប្រឡងចំនួន១៤១នាក់៖
ក្របខ័ណ្ឌមន្ត្រីក្រមការ ជ្រើសរើស ៥នាក់ក្នុងចំណោមបេក្ខជន ដាក់ពាក្យប្រឡងចំនួន១៦០នាក់
ក្របខ័ណ្ឌលេខាធិការរដ្ឋបាលបាល ត្រូវជ្រើសរើស៥ នាក់ក្នុងចំណោមបេក្ខជន៣៤៨នាក់។

ចំពោះការប្រឡងមន្ត្រីរដ្ឋបាលជាន់ខ្ពស់ ធ្វើឡើងលើវិញ្ញាសារ ជំនាញឯកទេស និងភាសាអង់គ្លេស មានរយៈពេល២ម៉ោង, ក្របខ័ណ្ឌមន្ត្រីក្រមការ ប្រឡងលើវិញ្ញាសារជំនាញ និងភាសាអង់គ្លេស មានរយៈពេល២ម៉ោង។
ចំពោះក្របខ័ណ្ឌលេខាធិការរដ្ឋបាលប្រឡងលើវិញ្ញាសារចំណេះដឹងទូទៅ, ចំណេះដឹងការងាររដ្ឋបាល និងចំណេះដឹងលើវិស័យមុខងារសាធារណៈ មានរយៈពេល២ម៉ោងដូចគ្នា។

ការប្រឡងជ្រើសរើសក្របខ័ណ្ឌមន្ត្រីរាជការស៊ីវិល នៅរដ្ឋបាលថ្នាក់ក្រោមជាតិ ត្រូវបានធ្វើឡើងជារៀងរាល់ឆ្នាំ ដើម្បីបំពេញសំណូមពរចាំបាច់ នៃតម្រូវការភារកិច្ចចំពោះមុខ ហើយបេក្ខជន បេក្ខនារីទាំងអស់ត្រូវបានប្រឡងជ្រើសរើស ចេញពីសិស្ស និស្សិត ដែលបានប្រឡងជាប់ចាប់ពីកម្រិតទុតិយភូមិឡើងទៅ៕