ឯកឧត្តម វេង សាខុន៖ អបអរសាទរជាមួយពលរដ្ឋនៅស្រុកតំបែរដែលទទួលបាននូវសមិទ្ធផលថ្មីមួយទៀតក្នុងវិស័យពុទ្ធចក្រ
ភ្នំពេញ៖ ឯកឧត្តម វេង សាខុន រដ្ឋមន្ត្រីប្រតិភូអមនាយករដ្ឋមន្តី និងជាប្រឆានក្រុមការងារថ្នាក់កណ្តាលចុះមូលដ្ឋាន ស្រុកតំបែរ ខេត្តត្បូងឃ្មុំ និងស្រុកកំពង់សៀម ខេត្តកំពង់ចាម នាព្រឹកថ្ងៃសៅរ៍ ១កើត ខែជេស្ឋ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២០ ខែឧសភា ឆ្នាំ២០២៣ បានអញ្ជើញជាអធិបតីក្នុងពិធីសម្ពោធដាក់ឲ្យប្រើប្រាស់ ឧបដ្ឋានសាលា និងប្រារព្ធពិធីរំលឹកវិញ្ញាណក្ខន្ធ ទិវា ២០ ឧសភា ស្ថិតនៅភូមិតារាម ឃុំចុងជាច ស្រុកតំបែរ ខេត្តត្បូងឃ្មុំ។ ពិធីនេះមានការអញ្ជើញចូលរួមពី សមាជិកក្រុមការងារថ្នាក់កណ្ដាល ថ្នាក់ខេត្ត ស្រុក ឃុំ និងពុទ្ធ បរិស័ទចំណុះជើងវត្ត សរុបប្រមាណជាជាង ៦០០នាក់។
ឆ្លៀតក្នុងឱកាសនេះ ឯកឧត្តមរដ្ឋមន្ត្រីប្រតិភូអមនាយករដ្ឋមន្ត្រី បានចូលរួមអបអរសាទរជាមួយពលរដ្ឋនៅស្រុកតំបែរដែលទទួលបាននូវសមិទ្ធផលថ្មីមួយទៀតក្នុងវិស័យពុទ្ធចក្រ។ មានមតិសំណេះសំណាល ទៅកាន់ព្រះសង្ឃ និងពុទ្ធបរិស័ទ ឯកឧត្តម វេង សាខុន បានពាំនាំនូវបណ្ដាំផ្ញើសាកសួរសុខទុក្ខពីសំណាក់សម្ដេចតេជោ និងសម្ដេចកិត្តិព្រឹទ្ធបណ្ឌិត ដែលសម្ដេចទាំងទ្វេតែងតែគិតគូរយកចិត្តទុកដាក់ពីជីវភាព និងស្ថានភាពរស់នៅរបស់ ប្រជាពលរដ្ឋគ្រប់ៗរូប នៅទូទាំងប្រទេស។
ឯកឧត្តម វេង សាខុន ក៏បានថ្លែងអំណរគុណ និងកើតសរសើរ ជំពោះព្រះតេជគុណព្រះសង្ឃ គណៈកម្ម ការ រួមទាំងពុទ្ធបរិស័ទជិតឆ្ងាយទាំងអស់ ដែលបានចូលរួមចំណែក ដល់ការកសាងទីសេនា សេនៈ នៅក្នុងភូមិតារាមនេះ។
ទន្ទឹមនឹងនេះ ឯកឧត្តមរដ្ឋមន្ត្រីប្រតិភូ បានគូសបញ្ជាក់ថា សមិទ្ធផលនេះមិនអាចកាត់ផ្តាច់បានពីការខិតខំប្រឹងប្រែងពីថា្នក់ដឹកនាំរាជរដ្ឋាភិបាលដែលដឹកនាំដោយគណបក្សប្រជាជន និង ប្រជាជនយើងដែលបានចូលរួមចំណែកធ្វើឲ្យប្រទេសយើងទទួលបានសុខសន្តិភាពពេញលេញលើផ្ទៃប្រទេស ដោយបានធ្វើពលីកម្មគ្រប់បែបយ៉ាង ដ៏ធំធេង ដែលក្នុងនេះ រួមមាន៖
១-ការរំដោះប្រទេសជាតិយើងចេញផុតពីរបបល័យពូជសាសន៍ នៅថ្ងៃ៧ មករា ១៩៧៩
២-ការចរចារស្វះស្វែងរកការបង្រួបបបង្រួមជាតិ
៣-ការដាក់ចេញនយោបាយ ឈ្នះ ឈ្នះ របស់អគ្គមគ្គុទេសឆ្នើម របស់សម្ដេច តេជោ
៤-ការដាក់ចេញនូវនយោបាយដឹកនាំសេដ្ឋកិច្ចដ៏ត្រឹមត្រូវ និងជោគជ័យ ក្នុងការស្តារ និងកសាងប្រទេសឡើងវិញចេញផុតពីភ្នក់ភ្លើងសង្គម
៥-ការដាក់ចេញនូវវិធានការណ៍ទប់ស្កាត់ទាន់ពេលវេលា នៃការរីករាលដាល ជាសកលមេរោគកូវីដ ១៩
៦-ការដឹកនាំកិច្ចជុំអាស៊ានក្នុងឋានៈជាប្រធានអាស៊ានប្តូរវេន
៧-ការធ្វើជាម្ចាស់ផ្ទះ SEA GAME លើកទី ៣២ របស់កម្ពុជា ជាបវត្តិសាស្ត្រដ៏អស្ចារ្យ ក្នុងរយៈពេល៦៤ឆ្នាំកន្លងទៅ។
ដោយឡែកការរំលឹកនិងគោរពវិញ្ញាណក្ខន្ធ នៃទិវា ២០ ឧសភា ឯកឧត្តម វេង សាខុន បានគូសបញ្ជាក់ថា ថ្ងៃទី២០ ឧសភា ១៩៧៥ គឺជាថ្ងៃដែលចាប់ផ្តើមអនុវត្តនយោបាយប្រល័យពូជសាសន៍នៅកម្ពុជា ដែលបានបញ្ឈប់ទាំងស្រុងនូវដំណើរការរីកចម្រើនទៅមុខរបស់សង្គមជាតិកម្ពុជា ហើយទាញបញ្ច្រាសទិសឲ្យដើរថយក្រោយយ៉ាងវែង វិលទៅរកសម័យទាសភាពក្នុងបុព្វកាលវិញ។
គួររំលឹកថាបន្ទាប់ពីពួក ប៉ុល ពត បានឡើងកាន់អំណាចនៅកម្ពុជា នៅថ្ងៃទី១៧ មេសា ១៩៧៥ ជិតមួយខែក្រោយមក នៅថ្ងៃទី២០ ឧសភា ១៩៧៥ ពួក ប៉ុល ពត បានប្រកាសដាក់ចេញនូវគោលការណ៍មួយចំនួនឲ្យអនុវត្តន៍នៅទូទាំងប្រទេស រួមមាន៖
១-ការជម្លៀសប្រជាជនចេញពីទីក្រុងនានានៅទូទាំងប្រទេស
២-ការលុបចោលទីផ្សារទាំងអស់នៅក្នុងប្រទេស
៣-ការលុបបំបាត់ចោលទាំងស្រុងរូបិយវត្ថុទាំងអស់ដែលមានក្នុងរបបចាស់
៤-ការដកក្រដាសប្រាក់បដិវត្តន៍ដែលបានបោះពុម្ពរួចហើយយកទៅទុកក្នុងឃ្លាំងប្រាក់វិញ
៥-ការផ្សឹកព្រះសង្ឃទាំងអស់នៅទូទាំងប្រទេស
៦-ការបង្កើតផ្ទះបាយរួមនៅទូទាំងប្រទេស
៧-ការបណ្តេញជនជាតិវៀតណាមចេញពីកម្ពុជា
៨-ការបញ្ជូនកងទ័ពទៅប្រទេសវៀតណាម ជាពិសេសនៅតាមបន្ទាត់ព្រំដែនកម្ពុជាវៀតណាម
៩-ការបិទមន្ទីរពេទ្យទាំងអស់ក្នុងភ្នំពេញ
១០-ការបិទមហាវិទ្យាល័យ អនុវិទ្យាល័យ បឋមសិក្សានៅទូទាំងប្រទេស
១១-ការកំចាត់ចោលទាំងស្រុងនូវពួកខ្មាំងបង្កប់។
ក្នុងរយៈពេលជាង ៣ឆ្នាំ របបកម្ពុជាប្រជាធិបតេយ្យ របស់ប៉ុល ពត បានបំផ្លាញនូវក្តីសង្ឃឹមទាំងស្រុងរបស់ប្រជាជនកម្ពុជា ដែលបានឆ្លងកាត់យ៉ាងវេទនាបំផុតនូវភ្លើងសង្គ្រាមវិនាសកម្មរយៈពេល ៥ ឆ្នាំ ដែលបានចាប់ផ្ដើមពីឆ្នាំ១៩៧០ មកដោយ៖
១-អនុវត្តអំណាចផ្តាច់ការយ៉ាងព្រៃផ្សៃបំផុត
២-ឆក់ប្លន់យកអស់នូវសិទ្ធិ សេរីភាពរបស់ប្រជាជន
៣-ប្រែកា្លយប្រជាជនទៅជាទាសករដាច់ថ្លៃរបស់ពួកវា
៤-មនុស្សរស់នៅដូចសត្វធាតុ រស់នៅក្នុងក្តីរន្ធត់ភ័យខ្លាចរាល់ដង្ហើមចេញចូល .
៥-ប្រជាជនជាងបីលាននាក់ត្រូវបាត់បង់ជីវិត និងរាប់លាននាក់ទៀតត្រូវបែកបាក់គ្រួសារ
៦-គ្រួសារភាគច្រើន កា្លយជាស្ត្រីមេម៉ាយ ក្មេងកំព្រា ជនពិការ…។
សង្គមកម្ពុជាត្រូវបានបំផ្លាញខ្ទេចខ្ទីដល់ប្ញសគល់គ្មានស្នាមញញឹម គ្មានសំណើច គ្មានការអប់រំ គា្មនសេចក្តីស្រលាញ់គឺមានតែការភ័យខ្លាចរន្ធត់ ការអត់ឃ្លាន ការធ្វើទារុណកម្ម និងការកាប់សម្លាប់តែប៉ុណ្ណោះ។ក្រោមទង់រណសិរ្សសាមគ្គីសង្គ្រោះជាតិកម្ពុជា ដឹកនាំដោយគណបក្សប្រជាជនកម្ពុជា ប្រជាជនយើងនៅគ្រប់ទិសទីបានក្រោកឈរឡើងប្រយុទ្ធតស៊ូផ្ដួលរលំរបបដ៏យង់ឃ្នង់នេះ រហូតទទួលបានជ័យជំនះនៅថ្ងៃ៧ មករា ឆ្នាំ១៩៧៩ ដែលបានសង្គ្រោះជាតិឲ្យរស់រានមានជីវិតឡើងវិញទាន់ពេលវេលា ហើយបានខិតខំប្រឹងប្រែងធ្វើការស្ដារនិងកសាងសេដ្ឋកិច្ចកម្ពុជា ជាជំហ៊ានៗ ទទួលបានការរីកចម្រើនយ៉ាងធំធេងដូចសព្វថ្ងៃនេះ ហើយបានរស់នៅស្មើមុខស្មើមាត់ជាមួយបណ្តាប្រទេសនានាក្នុងតំបន់។
ជាមួយនឹងការដាក់សម្ពោធឧបដ្ឋានសាលា និងការប្រារព្ធទិវានៃការចងចាំ ២០ ឧសភា នេះ ឯកឧត្តម វេង សាខុន បាននាំយកថវិការបស់ឯកឧត្តម និងលោកជំទាវ ព្រមទាំងសប្បុរសជន ចំនួនជាង ២៦,៨លានរៀល សម្រាប់សងថ្លៃជំពាក់ជាងក្នុងការសាងសង់ និងថវិកាមួយចំនួន ទៀតសម្រាប់ឧបត្ថម្ភដល់ក្នុងការរៀបចំពិធី និងប្រជាពលរដ្ឋដែលបានអញ្ជើញចូលរួម ជាង ៦០០នាក់ផងដែរ ៕
