ប្រតិភូដង្ហែព្រះអគ្គិជ័យ កីឡាស៊ីហ្គេម-អាស៊ានប៉ាហ្គេម ធ្វើដំណើរដល់ទីក្រុង Dili ដោយសុវត្ថិភាព

ភ្នំពេញ៖ ប្រតិភូដង្ហែព្រះអគ្គិជ័យកីឡា និងភ្លើងគប់កីឡាស៊ីហ្គេម-អាស៊ានប៉ាហ្គេម ឆ្មាំ២០២៣ បានធ្វើដំណើរដល់ទីក្រុង Dili ប្រទេសទីម័រខាងកើត ដោយសុវត្ថិភាពហើយមុននេះបន្តិច មុនចូលជួបសម្តែងការគួរសមជាមួយលោក Jose Ramos-Horta ប្រធានាធិបតីទីម័រខាងកើត នៅរសៀលថ្ងៃទី៣ ខែមេសា ឆ្នាំ២០២៣ នេះ ។

ដំណើរគោលចរព្រះអគ្គិជ័យកីឡាជាប្រវត្តិសាស្រ្ត លើទឹកដីទីម័រខាងកើតនេះ ដឹកនាំដោយលោក ហោ សារុន រដ្ឋលេខាធិការក្រសួងទេសចរណ៍ និងជាបេសកជនពិសេស នៃគណៈកម្មាធិការជាតិ CAMSOC ដឹកនាំដង្ហែព្រះអគ្គិជ័យកីឡា និងភ្លើងគប់កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ តាមបណ្ដាប្រទេសក្នុងតំបន់អាស៊ាន ព្រមទាំងមានការអញ្ជើញចូលរួមពីលោក អ៊ីវ ហ៊ាង ឯកអគ្គរាជទូតកម្ពុជា ប្រចាំនៅប្រទេសទីម័រខាងកើត ដែលមាននិវេសនដ្ឋាននៅរដ្ឋធានីហ្សាកាតា អមដំណើរដោយប្រតិភូកម្ពុជា ៩រូបផ្សេងទៀត ក្រោយចាកចេញពីរដ្ឋធានីហ្សាកាតា កាលពីល្ងាចមិញ ហើយសម្រាកនៅកោះបាលីមួយយប់ មុនចាកចេញនៅព្រឹកថ្ងៃច័ន្ទ ។

ជាមួយការទៅដល់អាកាសយានដ្ឋានអន្តរជាតិ នៃទីក្រុង Dili នេះ ប្រតិភូ និងឯកអគ្គរាជទូតកម្ពុជា បានទទួលស្វាគមន៍យ៉ាងកក់ក្តៅពីលោក Francisco Kalbuadi Lay ប្រធានគណៈកម្មាធិការជាតិអូឡាំពិកទីម័រខាងកើត ។ អ្វីដែលពិសេសនោះ គឺប្រធានាធិបតីទីម័រលោក Jose Ramos-Horta នឹងអនុញ្ញាតឲ្យប្រតិភូកម្ពុជា ចូលជួបសម្តែងការគួរសម និងសំណេះសំណាលដោយផ្ទាល់ នៅវិមានប្រធានាធិបតីរបស់ខ្លួន នាម៉ោង ៣រសៀលនេះ(ម៉ោង ១រសៀលនៅម្ពុជា) មុនពិធីដង្ហែព្រះអគ្គិជ័យកីឡា និងភ្លើងគប់កីឡាស៊ីហ្គេម-អាស៊ានប៉ាហ្គេម ឆ្មាំ២០២៣ នាព្រឹកថ្ងៃទី០៤ ខែមេសាស្អែក ដោយនឹងមានការចូលរួមពិធីដង្ហែ និងរត់កាន់ភ្លើងគប់ផ្ទាល់ពីលោកប្រធានាធិបតី ព្រមទាំងថ្នាក់ដឹកនាំស្ថាប័នពាក់ព័ន្ធទីម័រខាងកើត ឯកអគ្គរាជទូត និងកីឡាករ-កីឡាការិនីប្រមាណជាង ៨០០នាក់ ។

សូមបញ្ជាក់ថា ការដង្ហែព្រះអគ្គិជ័យកីឡា និងភ្លើងគប់នេះ ធ្វើឡើងក្រោយព្រះរាជពិធីសុំភ្លើងព្រះអគ្គិអាទិទេព និងព្រះរាជពិធីប្រោសព្រះរាជទានព្រះអគ្គិជ័យកីឡា នៅប្រាសាទអង្គរវត្ត ក្រោមរាជាធិបតីភាពដ៏ខ្ពង់ខ្ពស់បំផុតរបស់ ព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា កាលពីថ្ងៃទី២១ ខែមីនា ឆ្នាំ២០២៣ កន្លងទៅ ។

ចំពោះពិធីដង្ហែទៅកាន់បណ្ដាប្រទេសតំបន់អាស៊ាន និងទីម័រខាងកើត ធ្វើឡើងចាប់ពីថ្ងៃទី២២ ខែមីនា ដល់ថ្ងៃទី២៧ ខែមេសា ឆ្នាំ២០២៣ ដោយផ្ដើមពីប្រទេសវៀតណាម រហូតដល់ប្រទេសឡាវក្រោយគេ មុនដង្ហែចូលកម្ពុជាវិញ តាមច្រកព្រំដែនអន្ដរជាតិខេត្តស្ទឹងត្រែង។ មុនដំណើរដល់ និងពិធីដង្ហែនៅទីក្រុង Dili ស្អែក ពិធីដង្ហែជាប្រវត្តិសាស្ត្រនេះ បានឆ្លងកាត់ និងដង្ហែដោយជោគជ័យរួចមកហើយ នៅប្រទេសវៀតណាម ហ្វីលីពីន និងឥណ្ឌូនេស៊ី មុនដំណើរទៅបណ្តាលប្រទេសផ្សេងៗទៀត ។

ក្រោយបញ្ចប់ពិធីដង្ហែព្រះអគ្គិអាទិទេពកីឡា នៅតាមបណ្ដាប្រទេសតំបន់ គឺជាពេលវេលារៀបចំពិធីដង្ហែព្រះអគ្គិកីឡា តាមបណ្ដាខេត្តជាប់បឹងទន្លេសាបវិញម្ដង ដោយចេញដំណើរពីរាជធានីភ្នំពេញ ឆ្ពោះទៅខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប កំពង់ធំ កំពង់ចាម ចាប់ពីថ្ងៃទី២៩ ខែមេសា រហូតដល់ល្ងាចថ្ងៃទី០៥ ខែឧសភា ខ្ទង់វេលាម៉ោង ៨៖៣០នាទីយប់ ពោលគឺចំពេលប្រារព្ធពិធីបើកការប្រកួតកីឡាស៊ីហ្គេម លើកទី៣២ ឆ្នាំ២០២៣ នៅកម្ពុជា ជាផ្លូវការតែម្ដង ។

ជាមួយពិធីដង្ហែព្រះអគ្គិជ័យកីឡាដ៏មានអត្ថន័យខាងលើ លោក វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC បានអំពាវនាវដល់ប្រជាពលរដ្ឋ និងសិស្ស-និស្សិត ទាំងក្នុងស្រុក និងក្រៅស្រុក ពិសេសអ្នករត់នៅតាមបណ្ដាប្រទេសត្រូវព្រះអគ្គីអាទិទេពកីឡាឆ្លងកាត់ សូមចូលរួមអបអរសាទរឲ្យបានច្រើនកុះករ ដើម្បីជាចំណែកមួយ ក្នុងការអបអរសាទរដំណើរឆ្ពោះទៅព្រឹត្តិការណ៍ប្រវត្តិសាស្ដ្រលើកដំបូងនៅកម្ពុជា ក្រោយការរង់ចាំអស់រយៈពេល ៦៤ឆ្នាំ គឺការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ។

លោកបានគូសបញ្ជាក់ថា ពិធីដង្ហែព្រះអគ្គិជ័យកីឡានេះ មិនត្រឹមតែជាពិធីមួយ ដែលជានិមិត្តរូបតំណាងឲ្យការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ នោះទេ ប៉ុន្ដែក៏ជាការបង្ហាញពីភាពរឹងមាំ មោះមុត ការរីកចម្រើន និងការអភិវឌ្ឍលើគ្រប់វិស័យក្នុងប្រទេសកម្ពុជា ក្រោមដំបូងសន្ដិភាព។ លើសពីនេះ ព្រះអគ្គីជ័យកីឡា ដែលដង្ហែគ្រប់បណ្ដាប្រទេសក្នុងតំបន់ គឺជាការពង្រឹងសាមគ្គីភាព ចំណងមិត្តភាព ភាពចុះសម្រុងគ្នា និងសុខដុមរមនាតាមរយៈការប្រកួតកីឡា ដែលជាប្រជាជាតិអាស៊ានតែមួយ មានទស្សនៈតែមួយ អត្តសញ្ញាណតែមួយ សហគមន៍តែមួយ រស់នៅក្នុង «សហគមន៍សន្ដិភាព និងវាសនាតែមួយ»។