បណ្ឌិត ហ៊ុន ម៉ាណែត និងឯកឧត្តម កើត រិទ្ធ ដឹកនាំប្រជុំបូកសរុបការងារ របស់អនុគណៈកម្មការចំពោះកិច្ច អនុវត្តផែនការសកម្មភាពការងារ របស់ក្រុមការងារត្រួតពិនិត្យរួម នៃក្រុមប្រទេសអាស៊ីប៉ាស៊ីហ្វិកអំពីកិច្ចសហប្រតិបត្តិការអន្តរជាតិ

ភ្នំពេញ៖ ក្រុមការងារប្រឆាំងការសម្អាតប្រាក់នៃក្រសួងបរិស្ថានដឹកនាំដោយឯកឧត្តម នេត្រ ភក្ត្រា រដ្ឋលេខាធិការ បានអញ្ជើញចូលរួមប្រជុំបូកសរុបការងាររបស់អនុគណៈកម្មការចំពោះកិច្ចអនុវត្តផែនការសកម្មភាពការងាររបស់ក្រុមការងារត្រួតពិនិត្យរួមនៃក្រុមប្រទេសអាស៊ីប៉ាស៊ី ហ្វិកអំពីកិច្ចសហប្រតិបត្តិការអន្តរជាតិ (អ.អ.ផ) នៅថ្ងៃទី៣១ ខែមីនា ឆ្នាំ២០២៣ នៅសណ្ឋាគារ ហ្គាឌិន ស៊ីធី ដែលកិច្ចប្រជុំនេះប្រព្រឹត្តទៅក្រោមអធិបតីភាពឯកឧត្តមនាយឧត្តមសេនីយ៍បណ្ឌិត ហ៊ុន ម៉ាណែត, ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ និងជាប្រធាន អ.អ.ផ។

កិច្ចប្រជុំនេះក៏មានការអញ្ជើញចូលរួមពីសមាជិកសមាជិកានៃអនុគណៈកម្មការដែល អញ្ជើញមកពីក្រសួងស្ថាប័នពាក់ព័ន្ធនានាដែលបានចូលរួមចំណែកយ៉ាងសកម្មក្នុងការងារប្រយុទ្ធប្រឆាំងនឹងការសម្អាតប្រាក់។

អង្គប្រជុំបានវាយតម្លៃខ្ពស់ចំពោះលទ្ធផលដែលអង្គការក្រុមការងារសកម្មភាពហិរញ្ញវត្ថុ(FATF) សម្រេចដកព្រះរាជាណាចក្រកម្ពុជាចេញពីបញ្ជីប្រផេះនៃប្រទេសដែលមានហានីភ័យក្នុងការសម្អាតប្រាក់។

ដើម្បីការលើកទឹកចិត្តនិងទទួលស្គាល់ពីការចូលរួមចំណែកក្នុងកិច្ចការងារប្រយុទ្ធប្រឆាំងការសម្អាតប្រាក់ ថ្នាក់ដឹកនាំនៃ អនុគណៈកម្មការចំពោះកិច្ចអនុវត្តផែនការសកម្មភាពការងាររបស់ក្រុមការងារត្រួតពិនិត្យរួមនៃក្រុមប្រទេសអាស៊ីប៉ាស៊ី ហ្វិកអំពីកិច្ចសហប្រតិបត្តិការអន្តរជាតិ (អ.អ.ផ) បានប្រគល់ប័ណ្ណសរសើរជូនសមាជិក-សមាជិកា និងក្រុមការងារមកពីក្រសួងស្ថាប័នពាក់ព័ន្ធនានា ៕