អភិបាលរងខេត្តបន្ទាយមានជ័យ បើកកិច្ចសន្ទនាអន្តរជំនឿ ដើម្បីសុខដុមនីយកម្មសាសនានៅកម្ពុជា ឆ្នាំ២០២៣ ក្រោមប្រធានបទ« សាសនិកចូលរួមប្រឆាំងការជួញដូរមនុស្ស និងទាសភាពសម័យទំនើប»
ភ្នំពេញ៖ លោកស្រី រស់ សុផានី អភិបាលរងខេត្ត តំណាងឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានអញ្ជើញជាអធិបតីភាព បើកកិច្ចសន្ទនាអន្តរជំនឿ ដើម្បីសុខដុមនីយកម្មសាសនានៅកម្ពុជា ឆ្នាំ២០២៣ ក្រោមប្រធានបទ «សាសនិកចូលរួមប្រឆាំងការជួញដូរមនុស្ស និងទាសភាពសម័យទំនើប» ធ្វើឡើងនៅសាលប្រជុំក្រុមប្រឹក្សាខេត្ត នាថ្ងៃទី១៧ ខែមិនា ឆ្នាំ២០២៣។
អង្គសិក្ខាសាលានេះក៏មានការចូលរួម ថ្នាក់ដឹកនាំមន្ត្រីសង្ឃខេត្ត ព្រះរាជាគណៈ ព្រះមន្រ្តីសង្ឃគណព្រះគ្រូអនុគណ ព្រះចៅអធិការវត្ត លោក បៀវ ថាន ប្រធានមន្ទីរធម្មការ និង សាសនាខេត្ត តំណាងអង្គការបេសកកម្មយុត្តិធម៌អន្តរជាតិ (IJM) បណ្តាថ្នាក់ដឹកនាំសាសនានានាជុំវិញខេត្តបានចូលរួម។
លោកស្រី រស់ សុផានី អភិបាលរងខេត្ត លើកឡើងថា ៖ អំពើជួញដូរមនុស្ស ជាប្រភេទឧក្រិដ្ឋកម្មឆ្លងដែន ដែលប្រកបដោយគ្រោះថ្នាក់ចំពោះមនុស្ស គ្រប់វ័យ គ្រប់ភេទ ក្នុងសង្គម គ្រោះថ្នាក់ជាញឹកញាប់ត្រូវបានរកឃើញក្នុងចំណោមអ្នកធ្វើចំណាកស្រុក ឫទេសន្តរប្រវេសន៍ ដែលស្វែងរកការងារនិងប្រាក់ចំណូល នៅឆ្ងាយពីទីកន្លែងដែលខ្លួនរស់នៅ។
លោកស្រី បន្តថា ៖ រាជរដ្ឋាភិបាលកម្ពុជា ដែលដឹកនាំដោយ សម្តេចអគ្គមហាសេនាបតីតេជោ ហ៊ុន សែន បានប្រឹងប្រែងអស់ពីកម្លាំងកាយចិត្ត ធ្វើការអប់រំផ្សព្វផ្សាយ ដល់សិស្ស និស្សិត និងប្រជាពលរដ្ឋ ឱ្យបានយល់ដឹង អំពីកលល្បិចជនល្មើសជួញដូរមនុស្ស និងផលប៉ះពាល់ ក្នុងការធ្វើទេសន្តរប្រវេសន៍ដោយប្រថុយប្រថាន ដែលអាចកើតមានគ្រោះថ្នាក់ជាយថាហេតុ។ ក្នុងនោះក្រសួងពាក់ព័ន្ធ រួមជាមួយអាជ្ញាធរ សមត្ថកិច្ចគ្រប់ លំដាប់ថ្នាក់ និងប្រព័ន្ធផ្សព្វផ្សាយព័ត៌មាន បានដើរតួនាទីយ៉ាងសំខាន់ ក្នុងការជម្រុញការផ្សព្វផ្សាយ ឱ្យបានដល់គ្រប់ស្រទាប់នៃយុវជន សិស្ស-និស្សិត ប្រជាពលរដ្ឋនៅជនបទ និងតាមតំបន់ដែលមានសេវាកំសាន្ត ឱ្យបានយល់ដឹងជ្រួតជ្រាប អំពីគ្រប់ល្បិចកល របស់ជនខិលខូច ដែលឆ្លៀតឱកាស ប្រើប្រាស់មធ្យោបាយ ដើម្បីអូសទាញប្រជាពលរដ្ឋ ឱ្យធ្លាក់ចូលក្នុងអន្ទាក់គ្រោះថ្នាក់ នៃអំពើជួញដូរមនុស្ស៕
