នាយករដ្ឋមន្ត្រី៖ រដ្ឋមន្ត្រីវប្បធម៌ និងរដ្ឋមន្ត្រីកិច្ចការនារី នឹងមិនត្រូវផ្លាស់ប្តូរតួនាទីឡើយ គឺនៅបន្តកាន់តំណែងសម្រាបើអាណត្តិថ្មី
ភ្នំពេញ៖ ក្នុងពិធីអបអរសាទរទិវាអន្តរជាតិនារី ៨ មីនា ខួបលើកទី១១២ នៅថ្ងៃទី៧ ខែមីនា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសថា លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងលោកចំទាវ អ៊ឹង កន្ថាផាវី រដ្ឋមន្ត្រីក្រសួងកិច្ចការនារី នឹងបន្តកាន់តំណែងជារដ្ឋមន្ត្រី សម្រាប់អាណត្តិថ្មី ។
ជាមួយគ្នានោះសម្តេចតេជោនាយករដ្ឋមន្ត្រី បានគូសបញ្ជាក់ថា យោងតាមការស្ទង់មតិដោយស្ថាប័នបរទេស មួយបានបញ្ជាក់ថា អត្រារបស់ស្ត្រីគាំទ្រសម្តេចមានចំនួនច្រើនជាងបុរស។ ដែលនេះអាចចាត់ទុកថាស្ត្រី បានយល់ដឹងអំពីតម្លៃសុខសន្តិភាព ដែលពួកគាត់ធ្លាប់បានឆ្លងកាត់នូវ សង្គ្រាមរ៉ាំរ៉ៃជាច្រើនមកហើយ នាពេលអតីតកាល។ ដូច្នេះគាត់បានឲ្យតម្លៃទៅលើកត្តាសុខសន្តិភាព របស់ប្រទេសជាតិនាពេលបច្ចុប្បន្ន។
សម្តេចតេជោ ហ៊ុន សែន បានមានប្រសាសន៍ជាថ្មីថា ការជួយស្ត្រី គឺជួយខ្លួនឯង ជួយប្រពន្ធ ជួយបងស្រី ជួយប្អូនស្រី ជួយកូនស្ត្រី និងជួយស្ត្រីឯទៀត គឺជួយខ្លួនឯង។ មុននឹងបញ្ចប់ សម្ដេចតេជោ ហ៊ុន សែន ក៏បានជូនពរ និងអបអរសាទរចំពោះ ទិវាអន្តរជាតិ ៨មីនា លើកទី១១២ ឆ្នាំ២០២៣ សូមឲ្យស្ត្រីទាំងអស់ជួបប្រទះតែសេចក្តីសុខ សេចក្តីចម្រើនគ្រប់ៗគ្នា ៕
