មេបញ្ជាការកងស្វ័យការពារជើងគោកជប៉ុន អញ្ជើញទស្សនកិច្ចនៅសាលាហ្វឹកហ្វឺន កងកម្លាំងរក្សាសន្តិភាពពហុសាសន៍ (PKO)

ភ្នំពេញ៖ ឯកឧត្តម នាយឧត្តមសេនីយ៍ YOSHIDA YOSHIHIDE មេបញ្ជាការកងស្វ័យការពារជើងគោកជប៉ុន និងគណៈប្រតិភូកងស្វ័យការពារជើងគោកជប៉ុន ៦រូប នាថ្ងៃទី១៧ ខែកុម្ភៈ ឆ្នាំ២០២៣ បានអញ្ជើញទស្សនកិច្ចនៅសាលាហ្វឹកហ្វឺនកងកម្លាំងរក្សាសន្តិភាពពហុសាសន៍ (PKO)។

ឯកឧត្តម នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិរក្សាសន្តិភាព បានទទួលស្វាគមន៍ លោក YOSHIDA YOSHIHIDE និងគណៈប្រតិភូទាំងអស់ យ៉ាងកក់ក្តៅនូវដំណើរទស្សនកិច្ចមកកាន់កម្ពុជានេះ។ ដ្បិតជប៉ុនជាមិត្តជិតស្និទ្ធកម្ពុជាជាយូរមកហើយ ឯកឧត្តម នាយឧត្តមសេនីយ៍ សែម សុវណ្ណនី ជឿជាក់ថា ដំណើរទស្សនកិច្ចនេះនឹងជំរុញឱ្យទំនាក់ទំនង កម្ពុជា-ជប៉ុន កាន់តែរឹងមាំ ជាពិសេសក្នុងកិច្ចសហប្រតិបត្តិការរក្សាសន្តិភាព។

កងកម្លាំងមួកខៀវកម្ពុជា ត្រៀមខ្លួនជាស្រេចក្នុងការបន្តពង្រីង និងពង្រឹងកិច្ចសហប្រតិបត្តិការគ្រប់កម្រិតដូចជា ការហ្វឹកហ្វឺន និងបណ្តុះបណ្តាលធនធានមនុស្ស ការចែករំលែកបទពិសោធ និងលំហាត់ហ្វឹកហ្វឺនរក្សាសន្តិភាព។

ឯកឧត្តម នាយឧត្តមសេនីយ៍ YOSHIDA YOSHIHDE បានបង្ហាញភាពរីករាយចំពោះការស្វាគមនយ៉ាងកក់ក្តៅរបស់កម្ពុជា និងបានអញ្ជើញគោរពវិញ្ញាក្ខនសមាជិកកងកម្លាំងជប៉ុន២រូបដែលបានពលីបេសកកម្មUTAC នៅកម្ពុជា។ តាមរយៈដំណើរទស្សនកិច្ចនេះ ឯកឧត្តម នាឧត្តមសេនីយ៍ បានកោតសរសើរចំពោះកម្ពុជា ដែលក្លាយជាប្រទេសធំមួយដែលបញ្ជូនកងកម្លាំងក្នុងបេសកកម្មរក្សាសន្តិភាព។

ទន្ទឹមនោះ ឯកឧត្តម នាយឧត្តមសេនីយ៍ YOSHIDA YOSHIHIDE ក៏បានលើកនូវការផ្តល់ជំនួយកិច្ចសហប្រតិបត្តិរក្សាសន្តិភាព និងការពង្រឹងកិច្ចសហការរវាងកងកម្លាំងមួកខៀវកម្ពុជា និងជប៉ុន នៅបេសកកម្មស៊ូដង់ខាងត្បូង។ ជប៉ុន ក៏បានបង្ហាញការគាំទ្រមជ្ឈមណ្ឌលជាតិរក្សាសន្តិភាពយ៉ាងពេញទំហឹង ក្នុងគម្រោងត្រីភាគីឆ្នាំ២០២៤ រួមទាំងមានកិច្ចសហប្រតិបត្តិការទ្វេភាគីផងដែរ៕