ភ្នំពេញ៖ ឯកឧត្តម សក់ សេដ្ឋា សមាជិកគណៈកម្មាធិការកណ្តាល គណបក្សប្រជាជនកម្ពុជា និងជាប្រធានក្រុមការងារគណបក្សប្រជាជនកម្ពុជា ចុះជួយមូលដ្ឋានស្រុកបវេល បានជំរុញឲ្យអាជ្ញាធរមូលដ្ឋានខិតខំប្រឹងប្រែង ដោះស្រាយវិវាទផ្សេងៗ ក្រៅប្រព័ន្ធតុលាការ តាមគោលការណ៍ឈ្នះ-ឈ្នះ ទាំងអស់គ្នា ដើម្បីបញ្ចប់នូវជម្លោះ ។
ក្នុងឱកាសអញ្ជើញ ប្រកាសបញ្ចូលសមាជិក គណបក្សប្រជាជនកម្ពុជាចំនួន ៤០៤នាក់ នាថ្ងៃទី១១ ខែកុម្ភៈ ឆ្នាំ២០២៣នេះ ឯកឧត្ដម សក់ សេដ្ឋា បានអំពាវនាវឲ្យកុំឲ្យបងប្អូនប្រជាពលរដ្ឋ ចាញ់បោកមេខ្យល់ ដែលនាំទៅដល់ការធ្លាក់ក្នុងអន្ទាក់ នៃការជួញដូរមនុស្ស ដោយសារការរៀបអាពាហ៍ពិពាហ៍ ជាមួយជនបរទេសមិនត្រឹមត្រូវ មិនមានប្រភពច្បាស់លាស់ ការនាំទៅធ្វើការនៅក្រៅប្រទេស ដែលមានច្បាប់ទម្លាប់ត្រឹមត្រូវ ក៏ជាដើមចមដែលធ្លាក់ទៅក្នុងអន្ទាក់ នៃការជួញមនុស្សផងដែរ ។
ឯកឧត្ដមប្រធានបានមានប្រសាសន៍ថា នៅក្នុងឆ្នាំ២០២២កន្លងមកនេះ ការបង្កបង្កើនផលទូទាំងឃុំល្វា សម្រេចបាននៅលើផ្ទៃដីចំនួន ៦,២១២ហិកតា លើផែនការ៦,៥០០ហិតា ទិន្នផលគិតជាមធ្យមចន្លោះពី ៣ ទៅ ៤តោន/ហិកតា។ ប៉ុន្តែឆ្នាំ២០២២កន្លងមកនេះ ក៏នៅតែជួបបញ្ហាប្រឈមដោយសារ ជំនន់ទឹកភ្លៀងដែលបានបំផ្លាញ ស្រូវអស់ប្រមាណ ៣០០ហិកតា ផ្ដើមពីការប្រឈមនេះប្រជាពលរដ្ឋចំនួន ២២៥គ្រួសារ បានទទួល ពូជស្រូវនិងអំណាយលើកទឹកចិត្តពីសម្តេចតេជោនាយករដ្ឋមន្ត្រីនៃព្រះរាជាណាចក្រកម្ពុជាផងដែរ។
ឯកឧត្ដមបន្តថា ឃុំល្វា មានភូមិផ្លូវការចំនួន ១២ភូមិ មានចំនួនគ្រួសារសរុប ៤៥៤គ្រួសារ ស្មើនឹងមនុស្សរាយចំនួន ១៣,០៩៦នាក់ ស្ត្រី ៦៤៦១នាក់ អាយុ១៨ឆ្នាំឡើងមានចំនួន ៩,៣៨១នាក់ ស្រី ៤,៨៣៤នាក់។ ប្រជាពលរដ្ឋមានឈ្មោះ ក្នុងបញ្ជីបោះឆ្នោតក្នុងឆ្នាំ២០២២ មានចំនួន៦,៨៧៨នាក់ ។ ចំណែកប្រជាពលរដ្ឋពេញវ័យ ធ្វើចំណាកស្រុកមានចំនួន ៣,០៥៤នាក់ ។
ឯឧត្ដមបន្ថែមថា នៅក្នុងឆ្នាំ២០២២ នេះឃុំបានអនុវត្តគម្រោងចំនួន ២គឺ ស្ថាបនាផ្លូវបេតុង២ខ្សែប្រវែង ៤១០ ម៉ែត្រ ទទឹង៤ម៉ែត្រ ស្ថិតនៅភូមិដូនញ៉ូមនិងភូមិចំការចំណាយថវិកាចំនួន ១៧១,១៩២,០០០រៀល និងគម្រោងទី២ ជួសជុលផ្លូវក្រាលក្រួសក្រហម១ខ្សែ ប្រវែង ៣,១៥០ម៉ែត្រ ទទឹង ៤ម៉ែត្រ ស្ថិតនៅ ភូមិបឹងសំរោង ចំណាយថវិកាសរុបចំនួន ១០០,៨០០,០០០រៀល។ សរុបការចំណាយរួមចំនួន ២៧១,៩៩២,០០០រៀល។
ឯកឧត្ដម សក់ សេដ្ឋា គូសបញ្ជាក់ថា ក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ដែលមានគណបក្សនយោបាយ ចូលរូមចំនួន ៥គណបក្ស គណបក្សប្រជាជនកម្ពុជាឃុំល្វា បានទទួលសំឡេងគាំទ្រចំនួន៣៤៣៨ សំឡេងស្មើនិង៧៩% ទទួលបានអាសនៈឃុំចំនួន៩ កាន់កាប់មេឃុំនិងជំទប់ទី១។តាមរយៈលទ្ធផល ខាងលើបានបង្ហាញពីការគាំទ្រ សន្តិភាព ការអភិវឌ្ឍន៍និងគាំទ្រការដឹកនាំរបស់ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃកម្ពុជា។
ឯកឧត្ដមលើកឡើងថា ក្រោយពិធីបញ្ចូលជាសមាជិក គណបក្សរួចសមាជិកបក្សទាំង ៤០៤នាក់ នឹងប្រែក្លាយទៅជាកម្លាំងគាំទ្រ គណបក្សដ៏សំខាន់ ដែលកម្លាំងថ្មីនេះរួមជាមួយ សមាជិកគណបក្សប្រជាជនកម្ពុជាដ៏ទៃទៀតដើម្បីចូលរួមការរក្សាប្រៀប និងដណ្ដើមប្រៀបឈ្នះនៅក្នុងការបោះឆ្នោត ជ្រើសរើសតំណាងរាស្ត្រ នីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣នេះ៕
