ឧត្តមសេនីយ៍ត្រី អ៊ុំ សុភា នាំយកអំណោយរបស់មេទ័ពជើងគោក ឧបត្ថម្ភដល់ពលរដ្ឋដែលបានចង្អុលបង្ហាញ ទីតាំងផ្នូរសពកងទ័ពស្ម័គ្រចិត្តវៀតណាម

ឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង និងជាអនុប្រធានអចិន្ត្រៃយ៍គណៈកម្មការជំនាញថ្នាក់ខេត្ត នាថ្ងៃទី៤ ខែមករា ឆ្នាំ២០២៣ បានអញ្ជើញនាំយកអង្ករចំនួន ១០០គីឡូក្រាម គ្រឿងឧបភោគបរិភោគ រួមនឹងថវិកាចំនួន ៤០០,០០០រៀល ដែលជាអំណោយដ៏ថ្លៃថ្លារបស់ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងទ័ពជើងគោក និងលោកជំទាវ ឧបត្ថម្ភដល់ប្រជាពលរដ្ឋចំនួន ២រូប ដែលបានសហការ ចង្អុលបង្ហាញទីតាំងផ្នូរសព កងទ័ពស្ម័គ្រចិត្ត និងជំនាញការវៀតណាម ដែលបានពលីគ្រប់សម័យសង្គ្រាម ក្នុងភូមិសាស្ត្រខេត្តកំពង់ឆ្នាំង ដល់ក្រុមការងារk90 យោធភូមិភាគទី៩ នៃកងទ័ពប្រជាជនវៀតណាម នៅក្នុងស្រុកកំពង់ត្រឡាច ។

លោកមេបញ្ជាការ បានមានប្រសាសន៍ថ្លែងអំណរគុណយ៉ាងជ្រាលជ្រៅចំពោះបងប្អូនប្រជាពលរដ្ឋ និងក្រុមការងារជំនាញថ្នាក់ ដែលបានសហការយ៉ាងជិតស្និទ្ធជាមួយក្រុមការងារ K90 ក្នុងបេសកកម្មស្រាវជ្រាវ រុករក ជីកលើក និងធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្តវៀតណាម ដែលបានពលីជីវិតគ្រប់សម័យសង្គ្រាមក្នុងភូមិសាស្រ្តខេត្តកំពង់ឆ្នាំង សម្រេចបានលទ្ធផលល្អប្រសើរជាបន្តបន្ទាប់ ។

លោកមេបញ្ជាការ ក៏បានស្នើដល់ប្រជាពលរដ្ឋ ក៏ដូចជាកម្លាំងជំនាញក្នុងមូលដ្ឋានបន្តសហការចង្អុលបង្ហាញគ្រប់ទីតាំងផ្នូរសពកងទ័ពស្ម័គ្រចិត្ត និងជំនាញការវៀតណាម ដែលខ្លួនបានដឹង បានស្គាល់ និងមានតំរុយ ដើម្បីផ្តល់ភាពងាយស្រួលដល់ក្រុមការងារក្នុងការស្រាវជ្រាវ រុករក និងជីកលើកអដ្ឋិធាតុ សម្រេចបានជោគជ័យក្នុងបេសកកម្មឆ្នាំ២០២៣នេះ ។

គួរបញ្ជាក់ផងដែរថា ក្រុមជំនាញថ្នាក់ខេត្ត បានសហការជាមួយក្រុមការងារK90 ចាប់ពីរដូវប្រាំងឆ្នាំ២០០២-២០០៣ រហូតដល់បច្ចុប្បន្ន រុករក ជីកលើកអដ្ឋិធាតុបានចំនួនសរុប ៣៦៦សព ៕