នាយកដ្ឋានច្រកទ្វារទី២ បានបើកកិច្ចប្រជុំកិច្ចសហប្រតិបត្តិការប្រចាំខែវិច្ឆិកា ឆ្នាំ២០២២ និងលើកទិសដៅការងារសម្រាប់ខែបន្ទាប់

ភ្នំពេញ​ ៖​ នាយកដ្ឋានច្រកទ្វារទី២ នារសៀលថ្ងៃអង្គារ ០៥រោច ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៣ ខែធ្នូ ឆ្នាំ២០២២ បានបើកកិច្ចប្រជុំកិច្ចសហប្រតិបត្តិការប្រចាំខែវិច្ឆិកា ឆ្នាំ២០២២ និងលើកទិសដៅការងារសម្រាប់ខែបន្ទាប់ ក្រោមអធិបតីភាព ឯកឧត្តម នាយឧត្តមសេនីយ៍ ពិន ពិសិដ្ឋ, ឯកឧត្តម ឧត្តមសេនីយ៍ឯក យិ គារ អគ្គនាយករង នៃអគ្គនាយកដ្ឋានអន្តោប្រវេសន៍ និងឯកឧត្តម ឧត្តមសេនីយ៍ឯក សារិន សារីណូ ប្រធាននាយកដ្ឋានច្រកទ្វារទី២។

ក្នុងកិច្ចប្រជុំនោះក៏មានការអញ្ជើញចូលរួមពីសំណាក់លោក-លោកស្រីអនុប្រធាននាយកដ្ឋាន លោកនាយ-នាយរងការិយាល័យ លោកនាយ-នាយរងប៉ុស្តិ៍ និងនាយផ្នែកមួយចំនួន។

ជាកិច្ចចាប់ផ្តើម ឯកឧត្តម នាយឧត្តមសេនីយ៍ ពិន ពិសិដ្ឋ បានមានប្រសាសន៍ស្វាគមន៍ និងបើកកិច្ចប្រជុំព្រមទាំងបានលើកឡើងនូវរបៀបវារៈនៃអង្គប្រជុំ។ ទន្ទឹមនឹងនោះ ឯកឧត្តម នាយឧត្តមសេនីយ៍ បានអនុញ្ញាតឲ្យលោក វរសនីយ៍ឯក ប៊ូ ដារ៉ារិទ្ធ អនុប្រធាននាយកដ្ឋាន ឡេីងរាយការណ៍អំពីអវត្តមានថ្នាក់ដឹកនាំនាយកដ្ឋាន នាយការិយាល័យ និងនាយប៉ុស្តិ៍ ជាមួយគ្នានោះដែរលោកវរសេនីយ៍ឯក ស្រ៊ី ម៉េងស្រ៊ាន់ នាយការិយាល័យរដ្ឋបាលសរុប ឡើងអានរបាយការណ៍ ស្តីពីកិច្ចសហប្រតិបត្តិការប្រចាំខែវិច្ឆិកា ឆ្នាំ២០២២ និងលើកទិសដៅការងារសម្រាប់ខែបន្ទាប់។

ក្នុងកិច្ចប្រជុំនោះ ប៉ុស្តិ៍នគរបាលច្រកទ្វារព្រំដែនអន្តរជាតិត្រពាំងផ្លុង និងប៉ុស្តិ៍នគរបាលច្រកទ្វារកំពង់ផែអន្តរជាតិស្ទឹងហាវ បានធ្វើសេចក្តីរាយការណ៍អំពីសភាពការណ៍ទូទៅ ការអនុវត្តការងារជំនាញផ្សេងៗ បញ្ហាប្រឈម និងសំណូមពរ ជូនអង្គប្រជុំជ្រាប។

ជាកិច្ចបន្ត ឯកឧត្តម ឧត្តមសេនីយ៍ឯក ប្រធាននាយកដ្ឋាន បានចូលរួមមតិណែនាំការងារជំនាញ ក៏ដូចជាគ្រប់គ្រងប៉ុស្តិ៍របស់ខ្លួនឲ្យមានសាមគ្គីភាពផ្ទៃក្នុងឲ្យបានល្អ និងប្រសិទ្ធភាពខ្ពស់ ជាមួយគ្នានេះត្រូវបន្តបង្កើនការតាមដាន គ្រប់គ្រង ពង្រឹងបញ្ជីវត្តមានមន្ត្រីក្រោមឱវាទឲ្យបានម៉ត់ចត់ និងពិនិត្យបញ្ជីមុខសញ្ញាឲ្យបានត្រឹមត្រូវ ព្រមទាំងប្រើប្រាស់ម៉ាស៊ីន CBMS ទាំងនេះឲ្យអស់ពីសមត្ថភាពព្រោះជាប្រព័ន្ធរបស់ជាតិ។

មុនកិច្ចប្រជុំត្រូវបានបញ្ចប់ ឯកឧត្តម នាយឧត្តមសេនីយ៍ អគ្គនាយករង និងជាប្រធានអង្គប្រជុំ បានដោះស្រាយបញ្ហាប្រឈម និងសំណូមពរដែលអង្គប្រជុំទាំងមូលបានលើកឡើង ព្រមទាំងបានណែនាំលោកនាយប៉ុស្តិ៍មុននឹងសម្រេចការងារចាំបាច់ជាមួយស្ថាប័នផ្សេងៗត្រូវមានការស្នើសុំគោលការណ៍ពីថ្នាក់ដឹកនាំនាយកដ្ឋាន ក៏ដូចជាអគ្គនាយកដ្ឋានជាមុនសិន៕