លោកស្រី ប៊ន សុភី សួរសុខទុក្ខ និងនាំយកអំណោយមនុស្សធម៌របស់សាខា ចែកជូនដល់ស្ត្រីសម្រាលបានកូនភ្លោះ៣នាក់ នៅភូមិមេលំ ស្រុកបរិបូណ៌
ភ្នំពេញ៖ លោកស្រី ប៊ន សុភី អនុប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ឆ្នាំង តំណាង ឯកឧត្តម ស៊ុន សុវណ្ណារិទ្ធិ ប្រធានគណៈកម្មាធិការសាខា រួមដំណើរដោយលោក ប្រាក់ សោភ័ណ្ឌ នាយកប្រតិបត្តិសាខា កញ្ញា ចាន់ ម៉ូល្លី នាយិការងសាខា និងមន្ត្រីប្រតិបត្តិសាខា នាព្រឹកថ្ងៃពុធ ៧កើត ខែមិគសិរ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី៣០ ខែវិច្ឆិកា ឆ្នាំ២០២២ បានចុះសួរសុខទុក្ខ និងនាំយកអំណោយមនុស្សធម៌របស់សាខា ចែកជូនដល់ស្ត្រីសម្រាលបានកូនភ្លោះ៣នាក់ (ស្រី ២នាក់ ប្រុស ១នាក់) នៅភូមិមេលំ ឃុំមេលំ ស្រុកបរិបូណ៌ ខេត្តកំពង់ឆ្នាំង។
តាមរយះលោកស្រី ប៊ន សុភី ឯកឧត្តមប្រធានកិត្តិយសសាខា លោកជំទាវអនុប្រធាន ឯកឧត្តមប្រធានគណៈកម្មការសាខា កាកបាទក្រហមកម្ពុជាខេត្តកំពង់ឆ្នាំង និងជាពិសេស សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិនៃផែនការសកម្មភាពរួមអគ្គលេខាធិការអង្គការសហប្រជាជាតិដើម្បីសុខភាពស្រ្តី និងកុមារ សម្តេចប្រធានលោកតែងតែឱ្យគ្រប់សាខាទាំងអស់ ត្រូវយកចិត្តទុកដាក់ខ្ពស់បំផុត ចំពោះសុខទុក្ខបងប្អូនប្រជាពលរដ្ឋគ្រប់មូលដ្ឋាន គ្រប់ទីកន្លែងដោយមិនឱ្យមានការរើសអើង។
ជាមួយគ្នានេះដែរលោកស្រី ក៏បានផ្តាំផ្ញើនូវក្តីស្រលាញ់នឹករលឹក និងការសួរសុខទុក្ខ ប្រជាពលរដ្ឋទាំងអស់ឱ្យមានការប្រុងប្រយ័ត្នខ្ពស់ និងថែទាំសុខភាពឱ្យបានល្អ ឱ្យបងប្អូនប្រុងប្រយ័ត្នចំពោះគ្រោះមហន្តរាយដែលកើតអាចកើតឡើងជាយថាហេតុ ព្រមទាំងបន្តអនុវត្តតាមវិធានការរបស់រាជរដ្ឋាភិបាល និងតាមការណែនាំរបស់ក្រសួងសុខាភិបាល ៣ការពារ និង៣កុំ ដើម្បីជៀសផុតពីជំងឺកូវីដ-១៩៕
