ភ្នំពេញ៖ ឯកឧត្ដម គង់ ភោគ អ្នកនាំពាក្យកិច្ចប្រជុំកំពូលអាស៊ាន បានគូសបញ្ជាក់ថា បញ្ហាសមុទ្រចិនខាងត្បូង មិនមែនជារបៀបវារៈក្តៅ ក្នងកិច្ចប្រជុំអាស៊ាន នាពេលប្រជុំនេះឡើយ ដោយសារបញ្ហាសមុទ្រចិនខាងត្បូង មានសភាពស្ងប់ស្ងាត់។
ឯកឧត្ដម គង់ ភោគ បានគូសបញ្ជាក់បែបនេះ នៅក្នុងសន្និសីទសារព័ត៌មាន ស្ដីអំពីលទ្ធផលនៃកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ ដែលបានធ្វើឡើងនារាជធានីភ្នំពេញ នៅថ្ងៃទី១១ ខែវិច្ឆិកា ឆ្នាំ២០២២។
[បញ្ហាសមុទ្រចិនខាងត្បូង នៅតែជាបញ្ហាសំខាន់នៅក្នុងតំបន់ ឯកឧត្ដមក៏ចង់បញ្ជាក់ដែរថា ប៉ុន្មានឆ្នាំនេះសមុទ្រចិនខាងត្បូងស្ងប់ស្ងាត់ធម្មតាទេ គ្មានជម្លោះអ្វីទេ ប៉ុន្តែក៏មានតិចតួច មិននាំដល់ការប៉ះទង្គិចគ្នានោះដែរ]។
រឿងសមុទ្រចិនខាងត្បូង ក៏បានក្លាយជាជម្លោះដណ្តើមដែនទឹកដ៏រ៉ាំរ៉ៃរាប់សិបឆ្នាំរវាងប្រទេសមហាអំណាចចិន និងប្រទេសអាស៊ានចំនួន៤ ក្នុងនោះមានឥណ្ឌូនេស៊ី ម៉ាឡេស៊ី ហ្វីលីពីន និងវៀតណាម។
ដើម្បីដោះស្រាយបញ្ហាសមុទ្រចិនខាងត្បូង កាលឆ្នាំ២០០២ ខណៈដែលកម្ពុជាធ្វើជាប្រធានអាស៊ាន លើកដំបូង អាស៊ាន-ចិន បានចេញសេចក្តីថ្លែងការណ៍ក្រមប្រតិបត្តិរបស់បណ្តាភាគីនៅសមុទ្រចិនខាងត្បូង [DOC] ខណៈប្រទេសទាំងអស់ កំពុងខិតខំជំរុញឱ្យមានសេចក្តីថ្លែងការណ៍ស្តីពីក្រមប្រតិបត្តិស្តីពីសមុទ្រចិនខាងត្បូង [COC] មួយដែលអាចទទួលយកបាន ដើម្បីបញ្ចប់ជម្លោះ។
ឯកឧត្ដម គង់ ភោគ ក៏បានបញ្ជាក់ថា កន្លងមកនេះ ភាគីពាក់ព័ន្ធបានព្យាយាមសហការគ្នាទៅលើអ្វីដែលអាចសហការបាន។
ពាក់ព័ន្ធនឹង [COC ]ឯកឧត្ដមអ្នកនាំពាក្យរូបនេះ បានបញ្ជាក់ថា ប្រទេសកម្ពុជាក៏បានរួមចំណែកយ៉ាងសំខាន់ ក្នុងការជំរុញធ្វើយ៉ាងណាឱ្យមានការចរចារគ្រប់ភាគីពាក់ព័ន្ធឲ្យបានចប់សព្វគ្រប់ ក្នុងខណៈដែលពង្រៀង [COC ]បានចាប់ផ្តើមតាំងពីឆ្នាំ២០១៨ ។។
