កិច្ចប្រជុំកំពូលអាស៊ាននៅកម្ពុជា ជាឱកាសល្អសម្រាប់ជំនួបទ្វេភាគីរវាងរដ្ឋមន្ត្រីការបរទេសរុស្ស៉ី និងអ៊ុយក្រែន

ភ្នំពេញ៖ ឯកឧត្ដម គង់ ភោគ អ្នកនាំពាក្យកិច្ចប្រជុំកំពូលអាស៊ាន បានលើកជាយោបល់ថា កិច្ចប្រជុំកំពូលអាស៊ាននៅកម្ពុជា ក៏អាចជាឱកាសល្អសម្រាប់ជំនួបទ្វេភាគីរវាង រដ្ឋមន្ត្រីការបរទេសរុស្ស៉ី​ និងអ៊ុយក្រែនផងដែរ។

ឯកឧត្ដមអ្នកនាំពាក្យកិច្ចប្រជុំកំពូលអាស៊ាន បានលើកឡើងបែបនេះនៅក្នុងសន្និសីទកាសែតបង្ហាញលទ្ធផលនៃកិច្ចប្រជុំពេញមួយថ្ងៃ នៅព្រលប់ថ្ងៃទី១០ ខែវិច្ឆិកា ឆ្នាំ២០២២នេះ។

(នៅទីនេះជាឱកាសល្អបំផុត ដែលគាត់អាចទាញយកប្រយោជន៍ ពីវត្តមានអ្នកដែលពាក់ព័ន្ធនឹងកិច្ចប្រជុំរួមគ្នា អាចឆ្លៀតមានការជជែកគ្នាជាទម្រង់ទ្វេភាគី)។ នេះជាការបញ្ជាក់របស់ ឯកឧត្ដម គង់ ភោគ។
ឯកឧត្ដមគង់ ភោគបានបន្ថែមទៀតថា (កម្ពុជាយើងក៏ត្រៀមខ្លួនជាស្រេច ដើម្បីសម្របសម្រួល បើមានសំណើណាមួយ)។
លោក Dmytro Kuleba បានមកដល់ប្រទេសកម្ពុជា កាលពីល្ងាច ថ្ងៃទី០៨ ខែវិច្ឆិកា ឆ្នាំ២០២២ ដើម្បីចុះលេខាលើលិខិតុបករណ៍ នៃការចូលជាសមាជិកនៃសន្ធិសញ្ញាមិត្តភាព និងកិច្ចសហប្រតិបត្តិការនៅក្នុងតំបន់អាស៉ីអាគ្នេយ៍ [TAC] របស់អ៊ុយក្រែន។

ដោយឡែក តាមការគ្រោងទុកនៃកម្មវិធី លោក Sergey Lavrov រដ្ឋមន្ត្រីការបរទេសរុស្ស៉ី ក៏នឹងអញ្ជើញមកដល់ប្រទេសកម្ពុជា នៅល្ងាចថ្ងៃទី១២ ខែវិច្ឆិកា ឆ្នាំ២០២២ ដើម្បីចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ ខណៈដែលរុស្ស៉ី ក៏ជាដៃគូយុទ្ធសាស្ត្ររ បស់អាស៊ានផងដែរ៕