គ្រោះថ្នាក់ចរាចរណ៍រថយន្តប៉ះមនុស្ស រួចជ្រុលទៅប៉ះរបង និងផ្ទះប្រជាពលរដ្ឋ បណ្តាលឲ្យរងរបួសធ្ងន់២នាក់ នៅស្រុកសំរោងទង
ភ្នំពេញ៖ នៅថ្ងៃទី២១ ខែតុលា ឆ្នាំ២០២២ វេលាម៉ោង១២និង១០នាទី នៅលើផ្លូវលេខ១៤៣ ត្រង់ចំណុចភូមិត្រពាំងស្រង់ ឃុំស្គុះ ស្រុកសំរោងទង ខេត្តកំពង់ស្ពឺ មានករណីគ្រោះថ្នាក់ចរាចរណ៍រថយន្តប៉ះមនុស្ស រួចជ្រុលទៅប៉ះរបងផ្ទះ និងផ្ទះ ប្រជាពលរដ្ឋ បណ្តាលរងរបួសធ្ងន់ ២ នាក់ស្រី ។
តាមការបញ្ជាក់ពីសមត្ថកិច្ចបានឲ្យដឹងថា មុនពេលកើតហេតុមានរថយន្ត ១គ្រឿងម៉ាក HINO ពណ៌ស ពាក់ស្លាកលេខព្រះសីហនុ 3A-2312 មិនស្គាល់អត្តសញ្ញាណអ្នកបើកបរ (ចុះរត់គេច ក្រោយពេលកើតហេតុ) បើកបរពីទិសខាងជើងទៅទិសខាងត្បូង លុះមកដល់ចំណុចខាងលើបានប៉ះមនុស្ស ១នាក់ឈ្មោះ ជា ថុល ភេទស្រី អាយុ៤៣ឆ្នាំ រស់នៅភូមិស្វាយជ្រុំ ឃុំស្វាយជ្រុំ ស្រុកមេសាង ខេត្តព្រៃវែង ដែលកំពុងឈរលើចិញ្ចើមផ្លូវខាងស្តាំ (ខាងលិចផ្លូវ) បន្ទាប់មករថយន្តបានជ្រុលទៅប៉ះរបងផ្ទះនិងផ្ទះរបស់ឈ្មោះ ធួក វណ្ណៈ ភេទប្រុស អាយុ ៤៥ឆ្នាំ ប្រពន្ធឈ្មោះ ប៉េង ធីតា អាយុ៣២ឆ្នាំ រស់នៅភូមិត្រពាំងស្រង់ ឃុំស្គុះ ស្រុកសំរោងទង ខេត្តកំពង់ស្ពឺ រួចរថយន្តបានជ្រុលទៅប៉ះរបងផ្ទះ បណ្តាលអោយរបងបាក់ចំឈ្មោះ ឯក ឆុំ ភេទស្រី អាយុ ៨៥ឆ្នាំ រស់នៅភូមិកើតហេតុខាងលើ ដែលកំពុងសម្រាកលើអង្រឹង បង្ករអោយគ្រោះថ្នាក់ដល់មនុស្ស និងខូចខាតសម្ភារៈដូចខាងក្រោម ៖
-របួសធ្ងន់មនុស្ស ២នាក់ស្រី (ឈ្មោះ ជា ថុល . និងឈ្មោះ ឯក ឆុំ)
-ខូចខាតរថយន្ដ ១គ្រឿងស្រាល
-ខូចខាតស្លាក AMK ១ផ្ទាំង
-ខូចខាតទ្វារផ្ទះ ១
-ខូចខាតរបងលួសសំណាញ ៣ម៉ែត្រ ។
ចំពោះជនរងគ្រោះត្រូវបានក្រុមគ្រួសារបញ្ជូនទៅព្យាបាលនៅមន្ទីរពេទ្យ ។ រីឯវត្ថុតាងរថយន្តយកមករក្សាទុកនៅប៉ុស្ដិ៍នគរបាលរដ្ឋបាលស្គុះដើម្បីស្រាវជ្រាវ និងកសាងសំណុំរឿងតាមនីតិពីធី ៕
