ឧត្ដមសេនីយ៍ឯក ហ៊ុន ម៉ាណែត និងលោកជំទាវ ឧបត្ថម្ភស័ង្កសី គ្រឿងឧបភោគបរិភោគ និងថវិកា ដល់ពលរដ្ឋរងគ្រោះដោយអគ្គិភ័យឆេះផ្ទះ និងខ្យល់បក់រលំផ្ទះ ក្នុងស្រុកកំពង់លែង
ភ្នំពេញ៖ ឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង នៅថ្ងៃទី២០ ខែតុលា ឆ្នាំ២០២២ បានដឹកនាំក្រុមការងារមនុស្សធម៌ និងក្រុមការងារយោធិននារីរបស់អង្គភាព សហការជាមួយអាជ្ញាធរមូលដ្ឋាន ដោយមានការចូលរួមពី លោក យ៉ែម លក្ខិណា អភិបាល នៃគណៈអភិបាលស្រុក អញ្ជើញនាំយកអង្ករ ស័ង្កសី ១០០សន្លឹក គ្រឿងឧបភោគបរិភោគ រួមនឹងថវិកាមួយចំនួន ដែលជាអំណោយដ៏ថ្លៃថ្លារបស់ ឯកឧត្ដម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងទ័ពជើងគោក និងលោកជំទាវ ពេជ ចន្ទមុន្នី ហ៊ុន ម៉ាណែត ឧបត្ថម្ភដល់គ្រួសារប្រជាពលរដ្ឋចំនួន ០២គ្រួសារ ប្រជាពលរដ្ឋដែលរងគ្រោះដោយអគ្គិភ័យឆេះ និងខ្យល់បក់រលំផ្ទះ។
ស្ថិតក្នុងឱកាសនេះ ឯកឧត្តម មេបញ្ជាការ បានពាំនាំប្រសាសន៍ផ្តាំផ្ញើសួរសុខទុក្ខ ចូលរួមសោកស្តាយជាទីបំផុតរបស់ ឯកឧត្តម មេបញ្ជាការ កងទ័ពជើងគោក និងលោកជំទាវ ចំពោះការបាត់បង់ផ្ទះសម្បែងរបស់បងប្អូនប្រជាពលរដ្ឋតាំងគ្រួសារនាពេលនេះ និងបានមានប្រសាសន៍ណែនាំដល់គ្រួសាររងគ្រោះត្រូវចេះប្រុងប្រយ័ត្នឲ្យបានខ្ពស់គ្រប់ពេលវេលា មិនអាចធ្វេសប្រហែសបានឡើយ ។
ជាចុងបញ្ចប់គ្រួសាររងគ្រោះទាំង២គ្រួសារ បានថ្លែងអំណរគុណយ៉ាងជ្រាលជ្រៅចំពោះ ឯកឧត្ដម ហ៊ុន ម៉ាណែត និងលោកជំទាវ ឯកឧត្តម មេបញ្ជាការ តំបន់ប្រតិបត្តិការសឹករងកំពង់ឆ្នាំង ព្រមទាំងក្រុមការងារដែលបានយកចិត្តទុកដាក់ចំពោះសុខទុក្ខរបស់ពួកគាត់ ៕
