រដ្ឋមន្ត្រីក្រសួងផែនការ អញ្ជើញជាគណៈអធិបតីបើកវគ្គបណ្តុះបណ្តាលគ្រូបង្គោល សម្រាប់ការអង្កេតកសិកម្មកម្ពុជា ឆ្នាំ២០២២

ភ្នំពេញ៖ ឯកឧត្តមកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ នៅព្រឹកថ្ងៃទី១០ ខែតុលា ឆ្នាំ២០២២ បានអញ្ជើញជាគណៈអធិបតីក្នុង ពិធីបើកវគ្គបណ្តុះបណ្តាលគ្រូបង្គោលសម្រាប់ ការអង្កេតកសិកម្មកម្ពុជាឆ្នាំ២០២២។

ពិធិខាងលើនេះមានការអញ្ជើញចូលរួមពីឯកឧត្តមរដ្ឋលេខាធិការប្រចាំការ រដ្ឋលេខាធិការ អនុរដ្ឋលេខាធិការ លោក Antonio Schiavone ប្រធានប្រតិបត្តិគម្រោងអង្គការស្បៀងនិងកសិកម្ម (FAO) តំណាងលោកស្រី Rebekah Bell ប្រធានអង្គការស្បៀងនិងកសិកម្ម(FAO)ប្រចាំកម្ពុជា, លោក Todd Hunkin អ្នកជំនាញការ(FAO)ប្រចាំនៅវិទ្យាស្ថានជាតិស្ថិតិ ព្រមទាំងគ្រូបង្គោល ដែលសុទ្ធសឹងជា មន្ត្រីស្នូល មន្ត្រីទីចាត់ការកណ្តាល មន្ត្រីត្រួតពិនិត្យទិន្នន័យ មន្ត្រីត្រួតពិនិត្យការសម្ភាស សរុបចំនួន៩២រូប មកពីក្រសួងផែនការ និងក្រសួងកសិកម្ម រុក្ខាប្រមាញ់ និងនេសាទ។

ឯកឧត្តមកិត្តិសេដ្ឋាបណ្ឌិត បានថ្លែងនូវការកោតសរសើរ និងវាយតម្លៃខ្ពស់ចំពោះកិច្ចខំប្រឹងប្រែងរួមគ្នា ក្នុងការអនុវត្តការងារអង្កេតកសិកម្មកម្ពុជាប្រចាំឆ្នាំ ពីសំណាក់អង្គការស្បៀងនិងកសិកម្ម(FAO) នៃអង្គការសហប្រជាជាតិ, មូលនិធិម៊ីលីដាបៀលហ្គេត, ទីភ្នាក់ងារសហ-ប្រតិបត្តិការអន្តរជាតិ សហរដ្ឋអាមេរិកសម្រាប់អភិវឌ្ឈន៍(USAID) និងដៃគូអភិវឌ្ឍដទៃទៀតក្រោមកិច្ចសហប្រតិបត្តិការ គាំទ្រផ្នែកបច្ចេកទេស និងហិរញ្ញវត្ថុ ជាមួយនឹងរាជរដ្ឋាភិបាលកម្ពុជា ដែលមានក្រសួងសេដ្ឋកិច្ច និងហិរញ្ញវត្ថុ, វិទ្យាស្ថានជាតិស្ថិតិនៃក្រសួងផែនការ និងក្រសួងកសិកម្ម រុក្ខាប្រមាញ់ និងនេសាទ ដោយបានអនុវត្តការងារអង្កេតចន្លោះជំរឿនកសិកម្មកម្ពុជាឆ្នាំ២០១៩, ឆ្នាំ២០២០ និងឆ្នាំ២០២១ ដែលបានប្រជុំផ្សព្វផ្សាយជូនអ្នកប្រើប្រាស់កាលពេលកន្លងមក ដោយសម្រេចបានលទ្ធផលជោគជ័យ ទទួលបាននូវទិន្នន័យប្រកបដោយគុណភាពគួរជាទីទុកចិត្តបាន និងត្រៀមវិភាគចេញនូវរបាយការណ៍ លទ្ធផល នៃទិន្នន័យអង្កេតកសិកម្មកម្ពុជាឆ្នាំ២០២១ សម្រាប់ផ្សព្វផ្សាយជូនអ្នកប្រើប្រាស់ នាពេលខ្លីខាងមុខ។

ឯកឧត្តមកិត្តិសេដ្ឋាបណ្ឌិត បានមានប្រសាសន៍បន្តថា ដោយផ្អែកលើស្មារតីនៃកិច្ចសហប្រតិបត្តិការ ដ៏ល្អរវាង វិទ្យាស្ថានជាតិស្ថិតិ នៃក្រសួងផែនការ, ក្រសួងកសិកម្ម រុក្ខាប្រមាញ់ និងនេសាទ ជាមួយនឹងអង្គការស្បៀងនិងកសិកម្ម(FAO)នៃអង្គការសហប្រជាជាតិ និងដៃគូអភិវឌ្ឍន៍ដទៃទៀត តាមរយៈកិច្ចព្រមព្រៀងនៃការអនុវត្តកម្មវិធីការងារអង្កេតកសិកម្មកម្ពុជាដែលយើងកំពុងអនុវត្តនេះ កំពុងត្រូវបានទាក់ទាញការចាប់អារម្មណ៍ពីភាគីដៃគូអភិវឌ្ឍដទៃទៀត ក្នុងនោះរួមមាន៖ ដៃគូអភិវឌ្ឍទិន្នន័យកសិកម្ម ៥០ x ២០៣០ ដែលមានធនាគារពិភពលោក(The World Bank), មូលនិធិអន្តរជាតិដើម្បីអភិវឌ្ឍកសិកម្ម(IFAD), អង្គការស្បៀង និងកសិកម្ម(FAO), អង្គការUSAID បានចូលរួមគាំទ្របន្តអនុវត្តសកម្មភាពការងារអង្កេតកសិកម្មកម្ពុជាប្រចាំឆ្នាំ ចាប់ពីឆ្នាំ២០២១ រហូតដល់ឆ្នាំ២០២៦ ដែលក្រសួងផែនការ បានទទួលការឯកភាពពីក្រសួងសេដ្ឋកិច្ច និងហិរញ្ញវត្ថុរួចហើយ សម្រាប់បន្តនីតិវិធីអនុវត្តការងារអង្កេតកសិកម្មកម្ពុជា ជាមួយដៃគូអភិវឌ្ឍទិន្នន័យកសិកម្ម ៥០ x ២០៣០។

កម្មវិធីវគ្គបណ្តុះបណ្តាលគ្រូបង្គោលសម្រាប់ការអង្កេតកសិកម្មកម្ពុជា ដែលមានអ្នកជំនាញការអង្គការ FAO ប្រចាំនៅវិទ្យាស្ថានជាតិស្ថិតិនៃក្រសួងផែនការ និងមន្រ្តីសម្របសម្រួលកម្មវិធីដែលមាន បទពិសោធន៍លើការងារអង្កេតកសិកម្ម និងប្រើប្រាស់កម្មវិធីអង្កេតតាម ម៉ាស៊ីនកុំព្យូទ័រខ្នាតតូច ឬហៅថា ម៉ាស៊ីនTablet និងមន្រ្តីជាសិក្ខាកាមជាគ្រូបង្គោល និងមន្រ្តី ជំនាញផ្នែកទិន្នន័យស្ថិតិ ពីវិទ្យាស្ថានជាតិស្ថិតិ នៃក្រសួងផែនការ និងក្រសួងកសិកម្ម រុក្ខាប្រមាញ់ និងនេសាទ ដែលជាក្រសួងសាមីជំនាញ វិស័យកសិកម្ម ឯកឧត្តមកិត្តិសេដ្ឋាបណ្ឌិត មានក្តីសង្ឈឹមយ៉ាងមុតម៉ាំថា សិក្ខាកាមជាគ្រូបង្គោលទាំងអស់ ដែលបានទទួលការបណ្តុះបណ្តាលនៅវគ្គនេះ នឹង យក ចិត្តទុកដាក់ខ្ពស់បំផុត ក្នុងការសិក្សា ដើម្បីអាចបង្ហាត់បង្រៀនបន្ត ក្នុងការផ្ទេរចំណេះដឹង ចំណេះធ្វើ និងបទពិសោធន៍ ឱ្យដល់មន្រ្តីសម្ភាសន៍ នៅទូទាំង ២៥ រាជធានី ខេត្ត សម្រាប់ចុះ អនុវត្តជាក់ស្តែង លើការងារសម្ភាសន៍ស្រង់ទិន្នន័យ កសិកម្មនៅកម្ពុជា ឱ្យមានប្រសិទ្ធភាព និងគុណភាពទិន្នន័យកាន់តែល្អប្រសើរទ្បើង៕