ឯកឧត្ដម សក់ សេដ្ឋា អញ្ជើញចូលរួមក្នុងកិច្ចប្រជុំស្តីពីសេចក្តីព្រាងអនុក្រឹត្យស្តីពីការគ្រប់គ្រងអាកាសយានគ្មានមនុស្សបើក (ដ្រូន)

ភ្នំពេញ៖ ឯកឧត្ដម សក់ សេដ្ឋា រដ្ឋលេខាធិការប្រចាំការក្រសួងមហាផ្ទៃ នៅរសៀលថ្ងៃទី៦ ខែតុលា ឆ្នាំ២០២២នេះ បានអញ្ជើញចូលរួមក្នុងកិច្ចប្រជុំស្តីសេចក្តីព្រាងអនុក្រឹត្យស្តីពីការគ្រប់គ្រងអាកាសយានគ្មានមនុស្សបើក (ដ្រូន) ក្រោមអធិបតីដ៏ខ្ពងខ្ពស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។

កិច្ចប្រជុំខាងលើនេះក៏មានការអញ្ជើញចូលរួមពី រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង ថ្នាក់ដឹកនាំនៃអង្គភាពនានា ព្រមទាំងមន្ត្រីពាក់ព័ន្ធជាច្រើនរូបទៀត។

សម្តេចក្រឡាហោម ស ខេង បានមានប្រសាសន៍ថា កិច្ចប្រជុំនេះធ្វើឡើងដើម្បីពិនិត្យ និងពិភាក្សាពាក់ព័ន្ធលើការងាររៀបចំតាក់តែងសេចក្តីព្រាងអនុក្រឹត្យស្តីពីការគ្រប់គ្រងអាកាសយានគ្មានមនុស្សបើក (ដ្រូន) សម្រាប់ធ្វើជាក្រឹតក្រមគតិយុត្តនៃច្បាប់មួយដើម្បីបម្រើដល់ការគ្រប់គ្រងយានដែលគ្មានមនុស្សបើកនៅកម្ពុជា។

សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក៏បានសម្តែងការអរគុណ និងវាយតម្លៃខ្ពស់ចំពោះក្រុមការងារដែលបានរួមសហការគ្នាសិក្សាស្រាវជ្រាវយ៉ាងទូលំទូលាយប្រកបដោយការយកចិត្តទុកដាក់ខ្ពស់ និងបានផ្តួចផ្តើមនូវធាតុចូលសំខាន់ៗ ដើម្បីរៀបចំតាក់តែងសេចក្តីព្រាងអនុក្រឹត្យស្តីពីការគ្រប់គ្រងអាកាសយានគ្មានមនុស្សបើក (ដ្រូន) ឱ្យបានគ្រប់ជ្រុងជ្រោយ។

ជាមួយគ្នានេះដែរ សម្តេចក្រឡាហោម បានណែនាំដល់ក្រុមការងារ និងអង្គភាពពាក់ព័ន្ធទាំងអស់បន្តរួមគ្នាសហការសិក្សាស្រាវជ្រាវ និងពិនិត្យកែសម្រួលឱ្យបានល្អិតល្អន់បន្ថែមទៀតលើការងារដ៏មានសារៈសំខាន់នេះ៕