សម្ដេចតេជោ ហ៊ុន សែន ប្រាប់ពលរដ្ឋ «ឃុំព្រះដាក់» ឱ្យស្ងប់ចិត្តព្រោះគ្មានការរុះរើលំនៅឋានឡើយ
ភ្នំពេញ៖ នាយករដ្ឋមន្រ្តីនៃកម្ពុជា សម្ដេចតេជោ ហ៊ុន សែន បានឲ្យដឹងថា «ឃុំព្រះដាក់» គឺមិនត្រូវបានរុះរើ ដូចដែលអ្វីដែលប្រជាពលរដ្ឋ ធ្វើការតវ៉ានោះទេ។
ប្រជាពលរដ្ឋដែលរស់នៅក្នុងឃុំព្រះដាក់ កាលពីម្សិលមិញនេះ បាននាំគ្នាធ្វើការតវ៉ា នៅមុខសាលាឃុំ អំពីការរុះរើលំនៅឋានរបស់ពួកគាត់ ឱ្យទៅរស់នៅភូមិធម្មជាតិរុនតាឯក។
នៅក្នុងឱកាសអញ្ជើញបើកសន្និសីទ «ចក្ខុវិស័យប្រទេសកម្ពុជាឆ្នាំ២០២២» ពិភាក្សាពីការស្តារកម្ពុជា ក្រោយវិបត្តិជំងឺកូវីដ១៩ នៅព្រឹកថ្ងៃទី៦ ខែតុលា ឆ្នាំ២០២២ សម្ដេចតេជោ ហ៊ុន សែន បានលើកឡើងថា យើងមិនទាន់មានការប៉ះពាល់ណាមួយ ទៅលើប្រជាជននៅឃុំព្រះដាក់នោះទេ យើងគ្រាន់តែបានគិតគូ អំពី ហេដ្ឋារចនាសម្ព័ន្ធ របស់អង្គរ បារាយខាងកើត ដែលអាចមានទឹករហូត ទៅសល់៣០លានម៉ែត្រគីប។
ជុំវិញករណីនេះ សម្ដេចតជោ អះអាថា ការស្ដុកទឹកក្នុងអាង បារាយខាងកើតនេះ គឺមិនអាចឱ្យគ្រប់ចំនួន ៣០លានម៉ែត្រគីប ដែលនាំឱ្យប៉ះពាល ដល់ប្រជាពលរដ្ឋនោះទេ គឺតម្រូវឱ្យសិក្សា ក្នុងចំណុះណាមួយ ដែលអាចរក្សាគ្រឹះប្រាសាទអង្គរតែប៉ុណ្ណោះ។
សម្ដេចតេជោ ហ៊ុន សែន បានលើកឡើងថា យើងក៏បានដឹងដែរថា ឃុំព្រះដាក់ត្រូវបានកសាងប្រមាណ ជា៣ទៅ៤រយឆ្នាំរួចមកហើយ ហើយឃុំនេះ ស្ថិតនៅជាឃុំមួយ ដែលទាក់ទងទៅនឹងផ្នែករដ្ឋបាល ដែនដីរបស់យើងទៀតផង។
សម្ដេចតេជោ ហ៊ុន សែន បញ្ជាក់ថា “ចឹងទេសូមប្រជាពលរដ្ឋរស់នៅឃុំព្រះដាក់ មេត្តាស្ងប់ចិត្ត យើងមិនអាចធ្វើទាំងទទឹងទិស ទៅរើរុះប្រជាជនដែលកំពុងរស់នៅ រាប់ទាំងសាលាឃុំផងដែរ”។
ជាមួយគ្នានេះ សម្ដេចតេជោ ក៏បានបញ្ជា ឱ្យឯកឧត្ដម ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងដែនដី និងលោកជំទាវ ភឿង សកុណា រដ្ឋមន្រ្តីក្រសួងវប្បធម៍ និងវិចិត្រសិល្បៈ ឱ្យទៅជួបពន្យល់ផ្ទាល់ ដល់ប្រជាពលរដ្ឋ ក្នុងឃុំព្រះដាក់៕
