សម្តេចតេជោ ហ៊ុន សែន ផ្តាំទៅអ្នករស់នៅតំបន់រមណីយដ្ឋានអង្គរថា កុំរងចាំតថ្លៃសំណងជាមួយរាជរដ្ឋាភិបាល

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានផ្តាំទៅអ្នករស់នៅតំបន់រមណីយដ្ឋានអង្គរថា កុំរងចាំតថ្លៃសំណងជាមួយរាជរដ្ឋាភិបាល។

ក្នុងពិធីប្រគល់សញ្ញាបត្រដល់និស្សិតវិទ្យាស្ថានវ៉ាន់ដាប្រមាណ ៣,៨៦៦នាក់ នាថ្ងៃទី៣ តុលានេះ សម្ដេចតេជោ ហ៊ុន សែន បានមានប្រសាសន៍បន្តថា ចំណាត់ការរបស់រាជរដ្ឋាភិបាលពេលនេះ គឺមិនថមថយនោះទេ ប្រសិនបើដល់ថ្ងៃឱសានវាទ ហើយប្រជាពលរដ្ឋមិនមានការរុះរើ ឬក៏មិនព្រមទទួលនូវការ អនុវត្តរបស់រាជរដ្ឋាភិបាល នឹងមិនទទួលបានសំណងអ្វីឡើយ។ ដូច្នេះ សូមពលរដ្ឋគិតឱ្យបានច្បាស់ ទាន់រដ្ឋាភិបាលកំពុងមានការថ្នាក់ថ្នម ពីព្រោះពេលនេះពលរដ្ឋ ដែលបានចាកចេញ គឺទទួលបាននូវអត្ថប្រយោជន៍ច្រើនណាស់។

សម្តេចតេជោ ហ៊ុន សែន បានថ្លែងថា ក្នុងឋានៈជានាយករដ្ឋមន្ត្រី និងជាអ្នកដាក់ចេញនូវគោលនយោបាយ ដូច្នេះសម្តេចមានសិទ្ធិថ្លែងលើបញ្ហានានា ជាពិសេសថ្មីៗនេះ ដែលសម្តេចមានការលើកឡើង ពីការប្រកាសផ្តល់បណ្ណក្រីក្រ ជូនពលរដ្ឋនៅតំបន់រុនតាឯក ដែលមានបុគ្គលមួយចំនួនថា សម្ដេចកំពុងយកឱកាស ស្វែងរកសំឡេងឆ្នោត។ សម្ដេចតេជោបានមានប្រសាសន៍ ថាមិនមែនជាការស្វែងរក សំឡេងឆ្នោតអ្វីទេ តែនេះជាគោលនយោបាយ ដែលរាជរដ្ឋាភិបាលបានដាក់ចេញ ជាបន្តបន្ទាប់មកហើយ ៕