អភិបាលខេត្តបន្តាយមានជ័យ ចុះសំណេះសំណាលសួរសុខទុក្ខប្រជាពលរដ្ឋរងគ្រោះដោយទឹកជំនន់ នៅស្រុកព្រះនេត្រព្រះ និងស្រុកភ្នំស្រុក

ភ្នំពេញ៖ អភិបាលខេត្តបន្ទាយមានជ័យ ឯកឧត្តម អ៊ុ រាត្រី នៅថ្ងៃទី២៦ ខែកញ្ញា ឆ្នាំ២០២២ អមដំណើរដោយអាជ្ញាធរ កងកម្លាំងនគរបាលនិងកងរាជអាវុធហត្ថ និង យោធាចុះសំណេះសំណាល សួរសុខទុក្ខពុក ម៉ែ បងប្អូន ប្រជាពលរដ្ឋ ដែលរងគ្រោះដោយទឹកជំនន់ នៅតាមខ្នងផ្ទះ និង ទីទួលសុវត្ថិភាព នៅស្រុកព្រះនេត្រព្រះនិង ស្រុកភ្នំស្រុក ។

ក្នុងពិធីចុះសំណេះសំណាលសួរសុខទុក្ខប្រជាពលរដ្ឋនេះដែរ ឯកឧត្តម អភិបាលខេត្ត បាននាំយកអំណោយជាសម្ភារសំឡីអនាម័យសម្រាប់ស្ត្រី និងគ្រឿងឧបភោគ បរិភោគ មាន មី ត្រី និងថវិកាមួយចំនួន ចែកជូនតាមខ្នងផ្ទះ ដែលលិចលង់ដោយទឹកជំនន់ នៅភូមិទឹជោរចំនួន១០គ្រួសារ និង ភូមិថ្មីចំនួន២២គ្រួសារក្នុង ឃុំទឹកជោរ ស្រុកព្រះនេត្រព្រះ ។

នៅរសៀលថ្ងៃដដែល ឯកឧត្តម អ៊ុ រាត្រី អភិបាល នៃគណៈអភិបាលខេត្តបន្ទាយមានជ័យ បានអញ្ជើញចុះជួបសំណេះសំណាលសួរសុខទុក្ខនិងនាំយកអំណោយចែកជូនប្រជាពលរដ្ឋចំនួន២៤គ្រួសារ ដែលរងការលិចលង់ដោយទឹកជំនន់ មកស្នាក់នៅចំណុចទីទួលសុវត្ថិភាព នៅទំនប់ខ្នងអាងស្ពានស្រែង ស្ថិតនៅភូមិស្ពានស្រែង ឃុំស្ពានស្រែង ស្រុកភ្នំស្រុក ក្នុង០១គ្រួសារទទួលបានឃីត០១កញ្ចប់ មាន៖មុង០១,សំឡីអនាម័យ០៤,សាប៊ូ០២ថង់,ថ្នាំដុះឈ្មេញ០២ដប,ច្រាសដុះធ្មេញញ០២ដើម,អាកុល០២ដប,កន្សែង០១,សារុង០១,ម៉ាស់០១ប្រអប់និងថវិកាចំនួន៥ម៉ឺនរៀល ។ ជាមួយគ្នានោះដែរ ឯកឧត្តមអភិបាលខេត្ត ក៏បានណែនាំដល់ប្រជាពលរដ្ឋទាំងអស់ត្រូវការពារកុំឲ្យឆ្លងជម្ងឺដំកាត់ផ្សេង គឺត្រូវមានអនាម័យ ហូបស្អាត ផឹកស្អាត រស់នៅស្អាត ប្រុងប្រយ័ត្នសត្វអាសិរពិសផ្សេងខាំឬទិច និងការពារកូនចៅ តូចៗកុំឲ្យលេង ។

បើយោងតាមរបាយការណ៍របស់ស្នងការដ្ឋាននគរបាលខេត្តបន្ទាយមានជ័យ បានឲ្យដឹងថា៖គិតត្រឹមថ្ងៃទី២៦ ខែកញ្ញា ឆ្នាំ២០២២ម្សិលមិញ ស្ថានភាពទឹកជំនន់ទឹកភ្លៀង ស្រុក ក្រុង ដែលរងគ្រោះដោយទឹកជំនន់មាន០៥ ស្រុក ក្រុង ក្នុងនោះមាន(មង្គលបូរី,សិរីសោភ័ណ,ព្រះនេត្រព្រះ,ភ្នំស្រុក និងស្រុកម៉ាឡៃ)ធ្វើឲ្យប៉ះពាល់រួមមាន៖ ចំនួន ៤,៩៤៨ ខ្នង មនុស្សរាយ២៣,៨០៥នាក់(ជម្លៀស១៦៧ខ្នង មនុស្សរាយ ៥១៧នាក់) ,សាលារៀន ២៨ខ្នង ,វត្ត១៦កន្លែង,មណ្ឌលសុខភាព ០២ខ្នង ,សាលាឃុំ ០៣ខ្នង ,ផ្លូវកៅស៊ូ ០៦កន្លែង ប្រវែង ២,៨៥០ម៉ែត្រ ,ផ្លូវលំ ២៤៥កន្លែង ប្រវែង ១៦១,៦១៧ម៉ែត្រ ,ស្រូវ ២៥,៤៦៩ហិតា ,ដំឡូង ៥០២ហិតា និងដំណាំគួបផ្សំ ៨២ហិតា ៕