អំណោយឯកឧត្ដមបណ្ឌិត ហ៊ុន ម៉ាណែត និងលោកជំទាវ ត្រូវប្រគល់ជូនអតីតយុទ្ធជនចំនួន ៣៨គ្រួសារ នៅស្រុកគូលែន ខេត្តព្រះវិហារ ក្នុងឱកាសថ្ងៃកាន់បិណ្ឌ
ភ្នំពេញ៖ ឧត្ដមសេនីយ៍ទោ ច័ន្ទ សុភ័ក្ដ្រា មេបញ្ជាការតំបន់ប្រតិបត្ដិការសឹករងព្រះវិហារ និងជាប្រធានសមាគមអតីតយុទ្ធជនកម្ពុជាខេត្ត នៅថ្ងៃទី១៣ ខែកញ្ញា ឆ្នាំ២០២២នេះ បានដឹកនាំក្រុមការងារចុះជួបសំណេះសំណាល សួរសុខទុក្ខ និងនាំអំណោយដ៏ថ្លៃថ្លារបស់ឯកឧត្ដម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក និងលោកជំទាវ ពេជ្យ ចន្ទមុន្នី ប្រគល់ជូនបងប្អូនអតីតយុទ្ធជន ជាជនពិការ ដែលមានជីវភាពខ្វះខាត ចំនួន ៣៨គ្រួសារ នៅស្រុកគូលែន ខេត្តព្រះវិហារ។
ក្នុងឱកាសនេះដែរ ឧត្តមសេនីយ៍ទោ ច័ន្ទ សុភ័ក្ត្រា បានពាំនាំនូវការផ្តាំផ្ញើសាកសួរសុខទុក្ខដោយក្តីនឹករលឹក ពីសម្ដេច តេជោ ឯកឧត្ដម ឧត្តមសេនីយ៍ឯក ហ៊ុន ម៉ាណែត និងលោកជំទាវ ពេជ្យ ចន្ទ មុន្នី ដែលជានិច្ចជាកាលតែងគិតគូរយកចិត្តទុកដាក់ពីសុខទុក្ខ និងជីវភាពរស់នៅរបស់បងប្អូនអតីតយុទ្ធជនកម្ពុជារបស់យើង។
ជាក់ស្តែងថ្ងៃនេះស្របនឹងពិធីកាន់បិណ្ឌ ដែលជាបុណ្យប្រពៃណីដ៏ធំរបស់ប្រជាពលរដ្ឋខ្មែរ ឧត្តមសេនីយ៍ឯក ហ៊ុន ម៉ាណែត និងលោកជំទាវ ពេជ្យ ចន្ទមុន្នី បានផ្តល់អំណោយមកចែកជូនដល់បងប្អូនអតីតយុទ្ធជនដែលអញ្ជើញមកពីតាមបណ្ដាឃុំ នៃស្រុកគូលែន ដើម្បីជួយសម្រួលដល់ការហូបចុកដែលជីវភាពខ្វះខាត ពិសេសក៏សម្រាប់បងប្អូនយកទៅចាត់ចែងធ្វើជាចង្ហាន់ទៅប្រគេនព្រះសង្ឃ ក្នុងពិធីបុណ្យកាន់បិណ្ឌ និងភ្ជុំបិណ្ឌ ដើម្បីឧទ្ទិសកុសលផលបុណ្យជូនបុព្វការីជន និងញាតិក្កាទាំង៧សណ្តាណដែលបានចែកឋាន។
ឯកឧត្ដម ក៏បានថ្លែងនូវការដឹងគុណ ចំពោះគុណបំណាច់របស់បងប្អូនអតីតយុទ្ធជន ដែលបានលះបង់នៅសាច់ស្រស់ឈាមស្រស់ ដើម្បីជាតិមាតុភូមិនាពេលកន្លងមករហូត ដល់ពិការជើង ពិការដៃ និងពិការភ្នែកដល់សព្វថ្ងៃនេះ។
អំណោយដែលនាំមកប្រគល់ជូននៅពេលនេះរួមមាន៖ អង្ករ ១ប៉េ ស្មើ៣០គីឡូ, មីជាតិ ១កេស, ត្រីខ ១យួរ និងថវិកាចំនួន ២០,០០០រៀលផងដែរ៕
