ឯកឧត្ដមបណ្ឌិត ហ៊ុន ម៉ាណែ៖ ប្រទេសយើងតូចហើយធនធានមានកំណត់ ប៉ុន្តែបានបោះជំហានឈានមុខគេ ក្នុងការគ្រប់គ្រងវិបត្តិជំងឺកូវីដ-១៩

ភ្នំពេញ៖ នៅក្នុងឳកាសអញ្ជើញចូលរួមពិធី ពិសារអាហារសាមគ្គីជាមួយសមាគមសិល្បៈវប្បធម៌ខែ្មរ, សមាគមឱសថស្ថាន (NEXTY PHARM) និងសមាគមគ្រូពេទ្យ មកពីប្រទេសបារាំងនិងក្រុមការងាររៀបចំ អង្គការចាត់តាំងយុវជនប្រចាំទ្វីប កាលពីល្ងាចថ្ងៃទី១៩ ខែសីហា ឯកឧត្តមបណ្ឌិត ហ៊ុន ម៉ាណែត បានលើកឡើងថា ប្រទេសយើងតូច ហើយធនធានមានកំណត់ ប៉ុន្តែបានបោះជំហានឈានមុខគេ ក្នុងការគ្រប់គ្រងវិបត្តិជំងឺកូវីដ-១៩។

ឯកឧត្តមបញ្ជាក់ថា “ប្រទេសយើងតូច ហើយធនធានមានកំណត់ ប៉ុន្តែបានបោះជំហានឈានមុខគេក្នុងការគ្រប់គ្រង វិបត្តិជំងឺកូវីដ-១៩ ដោយបានបង្ការផលប៉ះពាល់ធ្ងន់ធ្ងរ ដល់អាយុជីវិតរបស់ប្រជាពលរដ្ឋ និងបានដំណើរការបើក ប្រទេសទ្បើងវិញលើគ្រប់វិស័យ ដែលនេះមិនមែនជាការចៃដន្យនោះទេ ប៉ុន្តែគឺបានកើតចេញពីការដឹកនាំ ច្បាស់លាស់ និងវៃឆ្លាតរបស់សម្តេចតេជោនាយករដ្ឋមន្ត្រី ជាមួយនឹងការចូលរួមយ៉ាងសស្រាក់សស្រាំ ពីសំណាក់មន្ត្រីរាជការ កងកម្លាំងប្រដាប់អាវុធ ជាពិសេសស្មារតីនៃវប្បធម៌ និងប្រពៃណីចែករំលែកពីសំណាក់ ប្រជាពលរដ្ឋទាំងក្នុង និងក្រៅប្រទេសទាំងស្មារតី ធនធានថវិកា និងសម្ភារ បានជួយដល់រាជរដ្ឋាភិបាល ក្នុងការប្រយុទ្ធយកឈ្នះ ជំងឺដ៏កាចសាហាវមួយនេះ។

នៅក្នុងឳកាសនោះដែរ ឯកឧត្តម ហ៊ុន ម៉ាណែត បានថ្លែងអំណរគុណដល់ក្រុមការងាររៀបចំអង្គការចាត់តាំង យុវជនប្រចាំទ្វីបអឺរ៉ុប ដែលបានយកអស់កម្លាំងកាយចិត្តជួយផ្សារភ្ជាប់នូវទំនាក់ទំនងរវាងបងប្អូនខ្មែរ រស់នៅក្រៅស្រុក និងក្នុងស្រុកតាម រយៈការបើកឱកាសរួមគ្នាឱ្យមានការផ្លាស់ប្តូរបទពិសោធន៏ខាងផ្នែកសិល្បៈ វប្បធម៌ និងកីទ្បា ព្រមទាំងសកម្មភាព សង្គម និងសប្បុរសធម៌នានាហើយលើសពីនេះក៏បានរៀបចំ កម្មវិធីជួបជុំដ៏មានអត្ថន័យនេះទ្បើង ដើម្បីអបអរសាទរដល់សមិទ្ធផលទាំងទ្បាយដែលសម្រេចបានរួមគ្នាក្នុង រយៈកាលកន្លងមក៕