ឧត្តមសេនីយ៍ទោ ច័ន្ទ រដ្ឋា អញ្ជើញបើកវគ្គហ្វឹកហ្វឺនបំប៉នបទវិន័យសណ្តាប់ធ្នាប់ទូទៅ ដល់នាយទាហាន នាយទាហានរង ពលទាហាន នៅទីបញ្ជាការកងការពារព្រំដែនលេខ៥០៤

ភ្នំពេញ៖ លោកឧត្តមសេនីយ៍ទោ ច័ន្ទ រដ្ឋា នាថ្ងៃទី១១ ខែសីហា ឆ្នាំ២០២២ អញ្ជើញជាអធិបតីក្នុងពិធីបើកវគ្គហ្វឹកហ្វឺនបំប៉នបទវិន័យសណ្តាប់ធ្នាប់ទូទៅ ដល់នាយទាហាន នាយទាហានរង ពលទាហាន នៅទីបញ្ជាការកងការពារព្រំដែនលេខ៥០៤។

តាមរបាយការណ៍បើកវគ្គហ្វឹកហ្វឺនបំប៉នបទវិន័យសណ្តាប់ធ្នាប់ទូទៅ ដល់នាយទាហាន នាយទាហានរង ពលទាហាន នៅទីបញ្ជាការកងការពារព្រំដែនលេខ៥០៤ សិក្ខាកាមមាន ចំនួន ៣៥នាក់ សិក្សារយៈពេល ៤៩ថ្ងៃ។

អញ្ជើញមានប្រសាសន៍នាឱកាសនោះ ឧត្តមសេនីយ៍ទោ ច័ន្ទ រដ្ឋា ជំនួសមុខឲ្យឯកឧត្តម មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ បានចាត់ទុកថា វគ្គហ្វឹកហ្វឺនបំប៉នបទវិន័យសណ្តាប់ធ្នាប់ទូទៅ ដល់នាយទាហាន នាយទាហានរង ពលទាហាន នៅទីបញ្ជាការកងការពារព្រំដែនលេខ៥០៤ ពេលនេះ ពិតជាមានសារៈសំខាន់សម្រាប់ការកសាងធនធានមនុស្ស ពង្រឹងសមត្ថភាព គុណភាព ការទទួលខុសត្រូវ និងសក្តានុពលការពារជាតិ ព្រមទាំងសកម្មភាពប្រចាំថ្ងៃរបស់កងទ័ពក្នុងការបំពេញភារកិច្ច ការបង្កើនប្រសិទ្ធភាព ទាំងចំណេះដឹង ចំណេះធ្វើពិតប្រាកដ ធានាបាននូវប្រសិទ្ធភាព និងសមត្ថភាពខ្ពស់ក្នុងការបំពេញភារកិច្ចជូនអង្គភាព ដែលជាការចូលរួមចំណែកលើភារកិច្ចការពារអធិបតេយ្យជាតិ ការពារបូរណភាពទឹកដី នៃមាតុភូមិយើង ហើយក៏ជាផ្នែកមួយដ៏សំខាន់ក្នុងការកែទម្រង់កងយោធពលខេមរភូមិន្ទ សំដៅធានាបាននូវប្រសិទ្ធភាពនៃកិច្ចការពារជាតិបានរឹងមាំ។

ឧត្តមសេនីយ៍ទោ ច័ន្ទ រដ្ឋា បានស្នើសុំដល់កម្មសិក្សាការីទាំងអស់ ត្រូវយកចិត្តដាក់រៀនសូត្រ មានវិន័យខ្ពស់ ត្រូវគោរពវិន័យបទបញ្ជាផ្ទៃក្នុងវគ្គ មានសាមគ្គីផ្ទៃក្នុងល្អ និងគោរពពេលវេលារៀនសូត្រអោយបានទៀងទាត់ មានអត្តចរិកល្អសសាកសមជាកងយោធពលខេមរភូមិន្ទ និងបានសំណូមពរដល់គ្រូ យោធាចារ្យត្រូវខិតខំរិះរកគន្លឹះ និងទ្រឹស្តីល្អៗធ្វើយ៉ាងណាអោយសិក្ខាកាមងាយយល់ ពេលបញ្ចប់វគ្គទទួលបានលទ្ធផលល្អ និងបន្តប្រុងប្រយ័ត្នចំពោះជំងឺកូវីដ-១៩ បន្តអនុវត្ត៣កុំ ៣ការពារ អោយបានខ្ជាប់ខ្ជួន។

ជាទីបញ្ចប់ លោកឧត្តមសេនីយ៍ទោ ច័ន្ទ រដ្ឋា ក៏បានប្រកាសបើកវគ្គហ្វឹកហ្វឺនចាប់ពីថ្ងៃនេះតទៅ និងបានឧបត្ថម្ភថវិកា ឯកឧត្តមមេបញ្ជាការរងកងទ័ពជើងគោក មេបញ្ជាការយោធភូមិភាគទី៥ ចំនួន ១.០០០.០០០ រៀល ដល់មេបញ្ជាការកងការពារព្រំដែនលេខ៥០៤ ក្នុងវគ្គហ្វឹកហ្វឺនផងដែរ ៕