មន្ត្រីជាន់ខ្ពស់ក្រសួងបរិស្ថាន៖ សន្តិភាពពិតជាមានតម្លៃមិនអាចកាត់ថ្លៃបាននិងមានសារៈសំខាន់បំផុតសម្រាប់ជាតិនិងប្រជាជន

ភ្នំពេញ៖ ឯកឧត្ដម នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានមានប្រសាសន៍ថា សន្តិភាពពិតជាមានតម្លៃមិនអាចកាត់ថ្លៃបាននិងមានសារៈសំខាន់បំផុតសម្រាប់ជាតិនិងប្រជាជន។

នៅព្រឹកថ្ងៃ ទី៧ ខែសីហា ឆ្នាំ២០២២ ឯកឧត្ដម នេត្រ ភក្ត្រាបានចូលជាអធិបតីនៃពិធីប្រកាសទទួលខ្លួនក្លឹប Rotary ប្រចាំខេត្តសៀមរាបដែលជាសមាជិកនៃអង្គការជឿជាក់លើសិស្សជនបទកម្ពុជា។

Rotary គឺជាបណ្តាញពិភពលោកមួយដែលមានសមាជិកជាង ១,៤លាននាក់ ដែលផ្តល់សេវាកម្មដល់អ្នកដទៃ លើកកម្ពស់សុចរិតភាព និងជំរុញការយល់ដឹងអំពីពិភពលោក សុច្ឆន្ទៈ និងសន្តិភាពតាមរយៈការប្រកបអាជីវកម្ម វិជ្ជាជីវៈ និងអ្នកដឹកនាំសហគមន៍។ ក្លឹបអន្តរជាតិនេះក៏ធ្វើការលើការលើកស្ទួយសន្តិភាព ប្រឆាំងនឹងជំងឺឆ្លង ផ្តល់ទឹកស្អាត ការថែទាំសុខភាព និងអនាម័យ ការជួយសង្គ្រោះម្តាយនិងទារក ការគាំទ្រលើការអប់រំ បង្កើនសេដ្ឋកិច្ចមូលដ្ឋាន ការពារបរិស្ថាន និងជំរុញឱ្យមានការចូលរួម។

ពាក់ព័ន្ធនឹងសុខសន្តិភាពនេះ ឯកឧត្ដម នេត្រ ភក្ត្រា បានគូសបញ្ជាក់ថាសន្តិភាពពិតជាមានតម្លៃមិនអាចកាត់ថ្លៃបានឡើយ និងមានសារៈសំខាន់បំផុតសម្រាប់ជាតិនិងប្រជាជន។

ឯកឧត្ដមបន្តថា កម្ពុជាបានទទួលសុខសន្តិភាពពេញលេញនៅថ្ងៃទី២៩ ខែធ្នូ ឆ្នា១៩៩៨ ក្រោមការអនុវត្តនយោបាយឈ្នះឈ្នះដាក់ចុះដោយសម្តេចតេជោ ហ៊ុន សែន នាយករដ្ឋមន្ត្រី។ ដោយសារតែកត្តាសុខសន្តិភាពពេញលេញនេះ បានជាកម្ពុជាមានឱកាសគ្រប់គ្រាន់ដើម្បីកសាងប្រទេសឱ្យរីកចម្រើន មានការអភិវឌ្ឍ កំណើនសេដ្ឋកិច្ច កសាងឡើងវិញនូវធនធានមនុស្ស និងបានកសាងកេរ្តិ៍ឈ្មោះកម្ពុជាឡើងវិញ។ ដូច្នេះយើងត្រូវតែចូលរួមជាមួយរាជរដ្ឋាភិបាលកម្ពុជាការពារថែរក្សាសុខសន្តិភាពដែលកម្ពុជាមានឱ្យបានគង់វង្ស។

នៅក្នុងឱកាសនោះ ឯកឧត្ដម នេត្រ ភក្ត្រា បានជំរុញឱ្យសមាជិកនៃអង្គការជឿជាក់លើសិស្សជនបទកម្ពុជាបង្កើនសកម្មភាព និងខិតខំប្រឹងប្រែងកាន់តែខ្លាំងថែមទៀតក្នុងការ បំពេញការងារ ធ្វើអំពើមនុស្សធម៌សម្រាប់សហគមន៍។ អង្គការជឿជាក់លើសិស្សជនបទកម្ពុជាបាននិងកំពុងអនុវត្តគម្រោងជាច្រើនក្នុងការជួយសហគមន៍ក្នុងនោះការសហការជាមួយក្រសួងបរិស្ថានដើម្បីផ្តល់ដបទឹកនិងធុងចម្រោះទឹកស្អាតជូនដល់សាលា រៀននានានៅក្នុងសហគមន៍ក្នុងតំបន់សៀមរាបអង្គរ ក្នុងទិសដៅកាត់បន្ថយការប្រើប្រាស់ប្លាស្ទិកក្នុងសាលារៀននិងក្នុងសហគម៍ ព្រមទាំងផ្តល់ទឹកស្អាតសម្រាប់សិស្សានុសិស្សបរិភោគ កាត់បន្ថយចំណាយប្រចាំថ្ងៃ និងមានទឹកបរិភោគគ្រប់គ្រាន់។

គម្រោងសហគមន៍គ្មានប្លាស្ទិកនេះនឹងធ្វើឱ្យតំបន់អង្គការដែលជាបេតិកភ័ណ្ឌពិភពលោកកាន់តែមានសម្រស់ស្រស់ស្អាតកាន់តែខ្លាំង និងមានអនាម័យបរិស្ថានស្អាត មានផាសុកភាព៕