អភិបាលខេត្តកំពង់ចាម រំពឹងទុកថា «សង្ក្រាន្តកំពង់ចាម» ឆ្នាំនេះ នឹងមានភ្ញៀវទេសចរចូលរួមកម្សាន្តសប្បាយខ្ទង់លាននាក់
កំពង់ចាម៖ ក្នុងឱកាសផ្ដល់បទសម្ភាសន៍ជូនអ្នកសារព័ត៌មាន នាថ្ងៃទី៣ ខែមេសា ឆ្នាំ២០២៦ ឯកឧត្ដម អ៊ុន ចាន់ដា អភិបាលខេត្តកំពង់ចាម បានរំពឹងទុកថា «សង្ក្រាន្តកំពង់ចាម» ឆ្នាំ២០២៦នេះ អាចនឹងមានភ្ញៀវទេសចរចូលរួមកម្សាន្តសប្បាយខ្ទង់លាននាក់ ពោលអាចមិនក្រោម ២លាននាក់នោះទេ។
ឯកឧត្ដម អ៊ុន ចាន់ដា បានរម្លឹកថា កាលពីសង្ក្រាន្តឆ្នាំ២០២៥ អាចមានភ្ញៀវទេសចរមួយផ្នែកទៅលេងអង្គរសង្ក្រាន្តនៅខេត្តសៀមរាប ហើយកាលពីឆ្នាំ២០២៤ ខេត្តកំពង់ចាមអត់មានអង្គរសង្ក្រាន្ត តែមានប្រជាពលរដ្ឋ មកកំសាន្តរហូតដល់ជាង៣លាននាក់។ ដូច្នេះសម្រាប់សង្ក្រាន្តឆ្នាំ២០២៦ រដ្ឋបាលខេត្តកំពង់ចាម រំពឹងទុកថា នឹងមានភ្ញៀវទេសចរមកកំសាន្តកើនឡើង។
ឯកឧត្ដមអភិបាលខេត្ត បានឲ្យដឹងទៀតថា ដើម្បីរៀបចំបុណ្យចូលឆ្នាំថ្មី ប្រពៃណីជាតិខ្មែរឲ្យបានអធឹកអធម រដ្ឋបាលខេត្តកំពង់ចាម បានរៀបចំសង្ក្រាន្តកំពង់ចាម អមជាមួយព្រឹត្តិការណ៍រណបជាច្រើនផ្សេងៗទៀត តាមបែបវប្បធម៌ ប្រពៃណីសាសនារបស់ខ្មែរយើង។ ទន្ទឹមនឹងនេះនៅតាមបណ្ដាស្រុកទាំង ៩ទៀត ក៏បានរៀបចំសង្ក្រាន្ត ទៅតាមលទ្ធភាពនៅតាមមូលដ្ឋានរបស់ខ្លួនផងដែរ។
ឯកឧត្ដមអភិបាលខេត្ត បញ្ជាក់ថា «ចំពោះសង្ក្រាន្តកំពង់ចាម បើគ្មានការប្រែប្រួលទេ នឹងបើកពិធីរបស់ខ្លួននៅរសៀលថ្ងៃទី១៣ ខែមេសា ខាងមុខនេះ អមដោយការដង្ហែរក្បួនសត្វសេះ ជាមួយនឹងក្រុមសិល្បៈដែលមន្ទីរវប្បធម៌ មន្ទីរធម្មការ និងមន្ទីរទេសចរណ៍ បានចងក្រងជាក្រុម ជាផ្នែកដើម្បីដំណើរការ នៃការបើកព្រឹត្តិការណ៍សង្ក្រាន្តកំពង់ចាម ឲ្យប្រព្រឹត្តទៅដោយរលូន។ នៅថ្ងៃទី១៤ ខែមេសា ដែលជាថ្ងៃចូលឆ្នាំទី១ រដ្ឋបាលខេត្ត មានរៀបចំប្រារព្ធពិធីទទួលទេវតាឆ្នាំថ្មី និងមានការលេងល្បែងប្រជាប្រិយ តាមបណ្ដាទីវត្តអារាម ក៏ដូចជានៅទីតាំងសង្ក្រាន្តផងដែរ។
អភិបាលខេត្ត បានបញ្ជាក់ថា ចំពោះថ្ងៃចូលឆ្នាំទី២ ដែលជាថ្ងៃទី១៥ ខែមេសា រដ្ឋបាលខេត្ត បានរៀបចំព្រឹត្តិការណ៍ធំមួយ ដោយមានការដាក់តាំងបង្ហាញនូវលៀសហាលទម្ងន់ ៥តោន ដែលមានរយៈចម្ងាយ ១,២០០ម៉ែត្រ៕
