អ៉ីស្រាអែល ប្រកាសនឹងតាមប្រមាញ់មេដឹកនាំកំពូលថ្មីរបស់អ៉ីរ៉ង់ គឺលោក Mojtaba Khamenei ឱ្យបាន

ហ៊្សេរុយសាឡិម៖ បើតាមការចេញផ្សាយដោយ ទីភ្នាក់ងារព័ត៌មាន AFP យោធាអ៉ីស្រាអែល កាលពីថ្ងៃអង្គារ ទី១៧ ខែមីនា បាននិយាយថា ខ្លួននឹងតាមប្រមាញ់មេដឹកនាំកំពូលថ្មីរបស់អ៉ីរ៉ង់ គឺលោក Mojtaba Khamenei ឱ្យបាន។

អ្នកនាំពាក្យយោធាអ៉ីស្រាអែល លោក Effie Defrin បានប្រាប់ក្រុមអ្នកសារព័ត៌មានយ៉ាងដូច្នេះថា «យើងមិនដឹងអំពី លោក Mojtaba Khamenei។ យើងមិនបានលឺអំពីគាត់ ឬឃើញគាត់ទេ ប៉ុន្តែខ្ញុំអាចប្រាប់អ្នកនូវរឿងមួយថា ពួកយើងនឹងតាមរុករក ហើយកម្ចាត់គាត់ចោល»។

ការព្រមាននេះធ្វើឡើង បន្ទាប់ពីអ៉ីរ៉ង់បានទទួលស្គាល់ថា ប្រមុខក្រុមប្រឹក្សាសន្តិសុខជាតិកំពូលរបស់ខ្លួន គឺលោក Ali Larijani និងមេបញ្ជាការកងកម្លាំងទាហានប៉ារ៉ា Basij លោក Gholamreza Soleimani ទើបតែត្រូវបានសម្លាប់ ក្នុងការវាយប្រហារតាមផ្លូវអាកាសរបស់អ៉ីស្រាអែល។

គួរបញ្ជាក់ថា លោក Mojtaba Khamenei បានឡើងជាមេដឹកនាំកំពូលថ្មី បន្ទាប់អតីតមេដឹកនាំកំពូល ដែលជាឪពុករបស់លោក គឺលោក Ayatollah Ali Khamenei បានស្លាប់ កាលពីថ្ងៃដំបូងនៃសង្រ្គាម ក្នុងការវាយប្រហាររបស់អាមេរិកនិងអ៉ីស្រាអែល៕