អភិបាលស្រុកបន្ទាយស្រី លែងកូនត្រីធម្មជាតិជាង ១ម៉ឺនក្បាល និងកូនកន្ទាយ ៥០០ក្បាល ចូលក្នុងបឹងឈូក ដើម្បីអបអរសាទរទិវាមច្ឆាជាតិ
ភ្នំពេញ៖ លោក ឃឹម ហ្វីណង់ អភិបាលស្រុកបន្ទាយស្រី បានអញ្ជើញលែងកូនត្រីធម្មជាតិ ១២,០០០ក្បាល (មានត្រីអណ្តែង ត្រីក្រាញ់ ត្រីឆ្ពិន) និងកូនកន្ទាយ ៥០០ក្បាល ចូលទៅក្នុងបឹងឈូក ដើម្បីអបអរសាទរទិវាមច្ឆាជាតិ ១ កក្កដា ។
ធ្លាប់តែទទួលបានផលពីបឹង ថ្ងៃនេះបំពេញបន្ថែមឱ្យទៅធម្មជាតិវិញ ក្នុងគោលបំណងស្តារតុល្យភាព រវាងការអភិវឌ្ឍនិងការអភិរក្ស តាមរយៈការធានានិរន្តរភាពនៃជីវៈចម្រុះ ដើម្បីចីរភាពនៃប្រព័ន្ធអេកូឡូហ្សី នៅក្នុងតំបន់បឹងឈូក។
ដោយមានការសហការ និងចូលរួមបដិភាគថវិកា ពីសហគមន៍ទេសចរណ៍បឹងឈូក រដ្ឋបាលស្រុកបន្ទាយស្រីបានរៀបចំ ឱ្យមានកម្មវិធីលែងពូជកូនត្រីធម្មជាតិទាំងនេះទៅក្នុងបឹងឈូក ដែលជាបឹងធម្មជាតិមិនចេះរីងស្ងួត មានទឹកថ្លាស្អាតគ្មានការបំពុលបរិស្ថាន និងជាតំបន់ទេសចរណ៍ដ៏ស្រស់បំព្រង មួយនៅក្នុងស្រុកបន្ទាយស្រី ។ កាលពី២ឆ្នាំមុន រដ្ឋបាលស្រុកក៏ធ្លាប់បានរៀបចំ កម្មវិធីប្រហាក់ប្រហែលគ្នានៅទីនេះផងដែរ ដោយបានលែងកូនត្រីចំនួន ២ម៉ឺនក្បាល ៕
