លោកជំទាវ ស្រូយ សុជាតិ បានដឹកនាំប្រតិភូយុវជនកម្ពុជា នៃកម្មវិធីនាវាយុវជនអាស៊ីអាគ្នេយ៍និងជប៉ុន ចូលជួបសម្តែងការគួរសមជាមួយឯកឧត្តម ហ៊ុន ម៉ានី

ភ្នំពេញ៖ នាព្រឹកថ្ងៃទី១ ខែធ្នូ ឆ្នាំ២០២៥ លោកជំទាវ ស្រូយ សុជាតិ អគ្គនាយក នៃអគ្គនាយកដ្ឋានយុវជន ក្រសួងអប់រំ យុវជន និងកីឡា អមដោយថ្នាក់ដឹកនាំសមាគមនាវាយុវជនអាស៊ីអាគ្នេយ៍កម្ពុជា (SIC) បានដឹកនាំប្រតិភូយុវជនកម្ពុជា នៃកម្មវិធីនាវាយុវជនអាស៊ីអាគ្នេយ៍និងជប៉ុន (SSEAYP) លើកទី៤៩ ទាំង១៧ រូប ចូលជួបសម្តែងការគួរសមជាមួយ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ ដើម្បីទទួលបានអនុសាសន៍ណែនាំតម្រង់ទិស ចែករំលែកបទពិសោធ និងលើកទឹកចិត្ត មុនពេលចេញដំណើរទៅចូលរួមកម្មវិធី SSEAYP លើកទី៤៩ ដែលគ្រោងនឹងប្រព្រឹត្តទៅចាប់ពីថ្ងៃទី១៥ ខែមករា ដល់ថ្ងៃទី១៧ ខែកុម្ភៈ ឆ្នាំ២០២៧ នៅប្រទេសជប៉ុន។

នាឱកាសនោះ ឯកឧត្តមឧបនាយករដ្ឋមន្រ្តី ហ៊ុន ម៉ានី បានអបអរសាទរដល់ប្រតិភូយុវជនទាំងអស់ ដែលបានជាប់ជាយុវជនតំណាងកម្ពុជាក្នុងដំណើរការចូលរួមកម្មវិធី SSEAYP លើកទី៤៩ និងបានចែករំលែកចំណេះដឹង និងបទពិសោធល្អៗ ជាពិសេសការតាំងចិត្ត និងការត្រៀមខ្លួនប្រកបដោយសមត្ថភាពក្នុងនាមជាតំណាងកម្ពុជានៅលើឆាកអន្តរជាតិ។ ជាមួយគ្នានេះ ឯកឧត្តមឧបនាយករដ្ឋមន្ត្រី បានលើកទឹកចិត្តឱ្យប្រតិភូយុវជនទាំងអស់ខិតខំសិក្សាស្រាវជ្រាវបន្ថែមទៀត ដើម្បីជាមូលដ្ឋានសម្រាប់ការបង្ហាញខ្លួនប្រកបដោយសក្តានុពល ចំណេះដឹង ភាពចាស់ទុំ និងវិជ្ជាជីវៈ។

គួរបញ្ជាក់ថា កម្មវិធីនាវាយុវជនអាស៊ីអាគ្នេយ៍និងជប៉ុន បង្កើតឡើងក្នុងគោលបំណងបំផុស និងពង្រឹងមិត្ដភាព សាមគ្គីភាព និងការយោគយល់គ្នាទៅវិញទៅមករវាងយុវជនប្រទេសអាស៊ាន និងយុវជនប្រទេសជប៉ុន ហើយក៏ជាការពង្រីកនូវទស្សនវិស័យលើឆាកអន្ដរជាតិ និងដើម្បីបណ្ដុះបណ្ដាលគំនិតសហប្រតិបត្ដិការអន្ដរជាតិ ដោយផ្តល់ឱកាសឱ្យយុវជនទាំងអស់បានរស់នៅរួមគ្នាលើនាវា និងធ្វើទស្សនកិច្ចនៅតាមប្រទេស ម្ចាស់ផ្ទះទទួលនាវា ក្នុងនោះក៏មានការអនុញ្ញាតឱ្យយុវជនចូលជួបសម្ដែងការគួរសមជាមួយថ្នាក់ដឹកនាំប្រទេស ការធ្វើទស្សនកិច្ចតាមស្ថាប័នជាតិ មរតកវប្បធម៌ និងផ្លាស់ប្ដូរវប្បធម៌គ្នាទៅវិញទៅមកជាមួយយុវជន នៃប្រទេសនីមួយៗនៅពេលដែលនាវាបានចូលចត។