កោះតៃវ៉ាន់ បង្ហាញមីស៉ីលដំបូងរបស់ខ្លួន ដែលនឹងត្រូវផលិតឡើងរួមគ្នាជាមួយក្រុមហ៊ុនរបស់អាមេរិក

តៃប៉ិ៖ បើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃព្រហស្បតិ៍ ទី១៨ ខែកញ្ញា ឆ្នាំ២០២៥ ក្នុងសប្តាហ៍នេះ កោះតៃវ៉ាន់បានបង្ហាញមីស៉ីលដំបូងរបស់ខ្លួន ដែលនឹងត្រូវផលិតឡើងរួមគ្នា ជាមួយក្រុមហ៊ុនរបស់អាមេរិក ខណៈវាគឺជាការបោះជំហានធំមួយ នៅក្នុងកិច្ចសហប្រតិបត្តិការការពារជាតិ ដែលកំពុងរីកលូតលាស់យ៉ាងឆាប់រហ័ស រវាងទីក្រុងតៃប៉ិនិងទីក្រុងវ៉ាស៉ីនតោន ចំពោះមុខការបង្កើនសម្ពាធយោធាពីចិន។

កាលពីថ្ងៃពុធ ទី១៦ ខែកញ្ញា មុនពិព័រណ៍បច្ចេកវិទ្យាការពារជាតិនៅទីក្រុងតៃប៉ិ វិទ្យាស្ថានវិទ្យាសាស្រ្តនិងបច្ចេកវិទ្យា Chung-Shan ដែលស្ថិតក្រោមការគ្រប់គ្រងរបស់យោធាតៃវ៉ាន់ បានតាំងបង្ហាញមីស៉ីលឈ្មោះថា Barracuda-500 ជាមីស៉ីលគ្រូសស្វ័យប្រវត្តិ និងមានតម្លៃទាប ដែលរចនាឡើងដោយក្រុមហ៊ុនបច្ចេកវិទ្យាអាមេរិក Anduril Industries។

មីស៉ីលនេះ គឺសម្រាប់ ប្រើប្រាស់ក្នុងការវាយប្រហារលក្ខណៈជាក្រុម ទៅលើកងនាវាចម្បាំង។ វិទ្យាស្ថាន Chung-Shan បាននិយាយថា តាមរយៈការផ្ទេរបច្ចេកវិទ្យា ខ្លួនគ្រោងផលិតពួកវា ក្នុងទ្រង់ទ្រាយធំនៅតៃវ៉ាន់ផ្ទាល់។

គួរបញ្ជាក់ថា តៃវ៉ាន់កំពុងប្រឹងប្រែងពង្រឹងកងកម្លាំងយោធារបស់ខ្លួន ស្របពេលប្រទេសចិនដែលចាត់ទុកដែនកោះនេះ ជាផ្នែកនៃទឹកដីរបស់ខ្លួន បានបង្កើនសម្ពាធយោធាជាខ្លាំង ក្នុងនោះរួមមានទាំងការធ្វើសមយុទ្ធយោធា និងការចល័តយន្តហោះក៏ដូចជានាវាជាប់ជាប្រចាំ ចូលមក ក្បែរដែនអាកាសនិងដែនទឹករបស់តៃវ៉ាន់។

តៃវ៉ាន់បានដាក់គោលដៅបង្កើន ការចំណាយលើវិស័យការពារជាតិ ឱ្យដល់៥ភាគរយ នៃ GDP ត្រឹមឆ្នាំ២០៣០ លើសពីគោលដៅ៣.៣ភាគរយនាឆ្នាំក្រោយ។ ដែនកោះនេះ ក៏កំពុងស្វះស្វែងចង់បានការគាំទ្រកាន់តែច្រើន ពីអន្តរជាតិ ក្រៅពីសហរដ្ឋអាមេរិកផងដែរ៕