ឯកឧត្តម ហង់ជួន ណារ៉ុន ទទួលជំនួបសម្តែងការគួរសម និងពិភាក្សាការងារជាមួយប្រតិភូក្រុមហ៊ុន Smart Axiata ស្តីពីវឌ្ឍនភាពនៃកិច្ចសហប្រតិបត្តការលើវិស័យអប់រំ
ភ្នំពេញ៖ នាព្រឹកថ្ងៃទី៤ ខែកញ្ញា ឆ្នាំ២០២៥ នៅទីស្ដីការក្រសួង ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានទទួលជួបសម្តែងការគួរសម និងពិភាក្សាការងារជាមួយគណៈប្រតិភូក្រុមហ៊ុន Smart Axiata ដឹកនាំដោយលោក Ritesh Kumar SIGN នាយកប្រតិបត្តិ Smart Axiata (Chief Executive Officer) ដើម្បីពិនិត្យលទ្ធភាពពង្រឹងនិងពង្រីកកិច្ចសហប្រតិបត្តិលើវិស័យអប់រំ ដោយមានការចូលរួមពី ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា និងមន្ត្រីពាក់ព័ន្ធក្រោមឱវាទ។
លើកឡើងក្នុងឱកាសនេះ តំណាងក្រុមហ៊ុន Smart Axiata បានបង្ហាញក្តីរំភើបរីករាយ ដែលបានចូលរួមចំណែកគាំទ្រដល់វិស័យអប់រំនៅកម្ពុជាក្នុងកិច្ចសហការជាមួយក្រសួងអប់រំ យុវជន និងកីឡានាពេលកន្លងមក ជាពិសេសបានបង្ហាញចំណាប់អារម្មណ៍ក្នុងការបន្តពង្រីកបន្ថែមកិច្ចសហប្រតិបត្តិការលើគម្រោងគាំទ្រដល់ការស្តារឡើងវិញនូវសាលារៀនតាមតំបន់ព្រំដែនដែលបានរងផលប៉ះពាល់ខ្លាំងដោយការជម្លោះព្រំដែនជាមួយប្រទេសថៃ តាមរយៈគម្រោងមូលនិធិ ១លានដុល្លារ របស់ Smart Axiata ព្រមទាំងបានលើកសំណើ សុំគាំទ្រលើការរៀបចំបន្ទប់រៀន ការបំពាក់សង្ហារិមក្នុងថ្នាក់រៀន និងពិនិត្យលទ្ធភាពជួយអណ្តូងទឹក បំពាក់សូឡា ប្រព័ន្ធអ៊ីនធឺណែត និងការជួយសាងសង់អគារសិក្សាថ្មីៗ បង្គន់អនាម័យ ធុងស្តុកទឹក ទីចាត់ការ និងបណ្ណាល័យផងដែរ។
ជាការឆ្លើយតប ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានទទួលស្វាគមន៍យ៉ាងកក់ក្តៅ និងចូលរួមអបអរសាទរ លោក Ritesh Kumar SIGN ដែលត្រូវបានតែងតាំងជា នាយកប្រតិបត្តិថ្មី នៃ Smart Axiata ប្រចាំកម្ពុជា ព្រមទាំងបានកោតសរសើរ និងថ្លែងអំណរគុណយ៉ាងជ្រាលជ្រៅដល់ក្រុមហ៊ុន Smart Axiata និងភាគីពាក់ព័ន្ធទាំងអស់ ចំពោះការប្តេជ្ញាចិត្តចូលរួមចំណែកលើកកម្ពស់វិស័យអប់រំ និងការអភិវឌ្ឍធនធានមនុស្សនៅកម្ពុជា តាមរយៈគម្រោងធំៗជាច្រើនកន្លងមកដូចជា Digital Literacy Workshop , Smart Startup entrepreneur Learning Platform (Start Start ULP), Child online protection video, Digital literacy Guidebook , Information literacy program 2025 និងគម្រោងជាច្រើនទៀត។
ក្រសួងអប់រំ យុវជន និងកីឡា គាំទ្រចំពោះយុទ្ធនាការ “Smart Scholar Pack” ដែលគាំទ្រដល់សិស្សនិទ្ទេស “A” ក្នុងការប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០២៤-២០២៥ ដើម្បីអបអរសាទរ និងលើកទឹកចិត្តដល់សិស្សឆ្នើម សំដៅជួយលើកកម្ពស់គុណភាពនៃការសិក្សាស្រាវជ្រាវ ពិសេសការសិក្សាតាមអនឡាញ និងការត្រៀមខ្លួនសម្រាប់ថ្នាក់ឧត្តមសិក្សា។ បច្ចុប្បន្នក្រសួងក៏បាននិងកំពុងយកចិត្តទុកដាក់ ដាក់បញ្ចូលកម្មវិធីឌីជីថលជាច្រើនទៅក្នុងការរៀននិងបង្រៀន តាមរយៈគម្រោងសាកល្បងមួយចំនួនពាក់ព័ន្ធនឹង AI នៅសាលារៀនជំនាន់ថ្មី និងកម្មវិធីបណ្ដុះបណ្ដាលគ្រូ ដោយបើកឱកាសឱ្យគរុសិស្ស គរុនិស្សិត ចេះស្វែងយល់និងប្រើប្រាស់AI ដើម្បីជួយឱ្យការបង្រៀនកាន់តែមានប្រសិទ្ធភាព។
តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានវាយតម្លៃខ្ពស់ និងថ្លែងអំណរគុណយ៉ាងជ្រាលជ្រៅរចំពោះការជួយគាំទ្ររបស់ក្រុមហ៊ុន Smart Axiata លើវិស័យអប់រំនាពេលកន្លងមក និងឯកភាពចំពោះរាល់សំណើរគាំទ្រដល់គម្រោងស្តារឡើងវិញនៃសាលាតាមព្រំដែន ដែលនេះពិតជាបានចូលរួមចំណែកដ៏សំខាន់ដល់ការធ្វើឱ្យប្រសើរឡើងវិញនូវស្ថានភាពរៀន និងបង្រៀនដែលស្នូលយុទ្ធសាស្ត្រនៃការអភិវឌ្ឍធនធានមនុស្សប្រកបដោយគុណភាព សមធម៌ និងបរិយាបន្ន ដោយគូសបញ្ជាក់នូវការគាំទ្ររាល់គំនិតផ្តួចផ្តើមដែលមានគោលដៅលើកស្ទួយដល់ការអភិវឌ្ឍធនធានមនុស្សនៅកម្ពុជា ដែលជាអាទិភាពមួយដ៏សំខាន់ជំរុញកម្ពុជាទៅសម្រេចចក្ខុវិស័យកម្ពុជាឆ្នាំ២០៣០ និងឆ្នាំ២០៥០៕
