សេអ៊ូល៖ បើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី២៦ ខែសីហា ឆ្នាំ២០២៥ ក្រុមហ៊ុនអាកាសចរណ៍ Korean Air បានប្រកាសពីការបញ្ជាទិញយន្តហោះ Boeing ចំនួន ១០៣គ្រឿង រួមទាំងម៉ាស៉ីនយន្តហោះ និងសេវាថែទាំ គិតជាទឹកប្រាក់ ៥០ពាន់លានដុល្លារ ស្របពេលដែលមានដំណើរទស្សនកិច្ចរបស់ប្រធានាធិបតីកូរ៉េខាងត្បូង លោក Lee Jae Myung ទៅកាន់ទីក្រុងវ៉ាស៉ីនតោន។
នេះការបញ្ជាទិញដ៏ធំបំផុតក្នុងប្រវត្តិសាស្ត្រក្រុមហ៊ុន Korean Air ដែលរួមមានយន្តហោះ Boeing 787s និង Boeing 737s ក្នុងតម្លៃប្រហែល ៣៦.៥ពាន់លានដុល្លារ។ Korean Air ក៏បានចុះកិច្ចព្រមព្រៀងជាមួយក្រុមហ៊ុន GE Aerospace លើការទិញ និងថែទាំម៉ាស៉ីនយន្តហោះ ដែលមានតម្លៃ ១៣.៧ពាន់លានដុល្លារផងដែរ។
នាយកប្រតិបត្តិ Korean Air លោក Cho Won-tae បានប្រាប់ Reuters កាលពីថ្ងៃចន្ទថា ការបញ្ជាទិញនេះ នឹងជួយពង្រីកដំណើរការហោះហើររបស់ក្រុមហ៊ុន ទៅកាន់គោលដៅច្រើនទៀតរបស់សហរដ្ឋអាមេរិក ក៏ដូចជានៅអាមេរិកឡាទីន និងអាមេរិកខាងត្បូង។
គួរបញ្ជាក់ថា ប្រទេសជាច្រើនដែលចរចាកិច្ចព្រមព្រៀងពាណិជ្ជកម្ម ជាមួយរដ្ឋបាលលោក ត្រាំ បានប្រកាស ឬគ្រោងប្រកាសពីការបញ្ជាទិញយន្តហោះ Boeing នាំឱ្យក្រុមហ៊ុនទទួលបានអត្ថប្រយោជន៍ច្រើន។ រដ្ឋមន្ត្រីពាណិជ្ជកម្ម លោក Howard Lutnick ថាត់ទុកកិច្ចព្រមព្រៀងជាមួយ Boeing និង GE ថាជាជំរុញការនាំចេញផ្នែកអវកាសរបស់សហរដ្ឋអាមេរិក៕
