រដ្ឋបាលខេត្តខេត្តបន្ទាយមានជ័យ រៀបចំកិច្ចប្រជុំផ្សព្វផ្សាយនិងជំរុញការចុះត្រួតពិនិត្យវត្តមានជនបរទេសកំពុងស្នាក់នៅនិងប្រកបអាជីវកម្ម ក្នុងភូមិសាស្ត្រក្រុងប៉ោយប៉ែត

បន្ទាយមានជ័យ៖ នៅថ្ងៃទី០៤ ខែមិថុនា ឆ្នាំ២០២៥ រដ្ឋបាលខេត្តបន្ទាយមានជ័យ បានរៀបចំកិច្ចប្រជុំផ្សព្វផ្សាយនិងជំរុញការចុះត្រួតពិនិត្យវត្តមានជនបរទេសកំពុងស្នាក់នៅនិងប្រកបអាជីវកម្មក្នុងភូមិសាស្ត្រក្រុងប៉ោយប៉ែត ខេត្តបន្ទាយមានជ័យ ក្រោមអធិបតីភាពលោក ប្រាក់ ប៉ូលី អភិបាលរងខេត្ត តំណាងឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងមានការចូលរួមពីលោក ឧត្តមសេនីយ៍ត្រី អេង លីហួរ ស្នងកការរងទទួលផែនការងារអន្តោប្រវេសន៍ លោកឧត្តមសេនីយ៍ត្រី អ៊ុន សំអន ស្នងការរង ទទួលផែនការងារអត្តសញ្ញាណកម្ម អស់លោក លោកស្រីអង្គភាពពាក់ព័ន្ធ អាជ្ញាធរ សង្កាត់ អាជ្ញាធរក្រុងប៉ោយប៉ែត និងម្ចាស់អាជីវកម្មដ្ឋានជាច្រើននាក់ចូលរួម។

ថ្លែងនាឱកាសនោះ លោក ប្រាក់ ប៉ូលី អភិបាលរងខេត្ត មានប្រសាសន៍ថា យើងដឹងហើយថាបច្ចុប្បន្នលំហូរនៃជនបរទេសមកពីបណ្តាប្រទេសនានាចូលមកកម្ពុជា ខ្លួះចូលមកជាប្រភេទទេសចរណ៍ អ្នកវិនិយោគឬខ្លះមកបំពេញការងារប្រកបអាជីវកម្មផ្សេងៗ។ ជាមួយគ្នានោះដែរយើងក៏ត្រូវយកចិត្តទុកដាក់អំពីការគ្រប់គ្រងទិន្ន័យវត្តមានជនបរទេសទាំងនោះឲ្យបានត្រិមត្រូវ ពីសំណាក់អាជ្ញាធរជៀសវាងកើតមានហញ្ហាប្រឈមណាមួយសមត្ថកិច្ចក៏ដូចអាជ្ញាធរគ្រប់គ្រងមិនបាន ។

លោកអភិបាលរងខេត្តបន្តថា ដើម្បីសន្តិសុខ សុវត្ថិភាពសង្គម ក្នុងនាមអាជ្ញាធរខេត្តសូមឲ្យម្ចាស់ផ្ទះសំណាក់ សណ្ឋាគារ ផ្ទះជួល បន្ទប់ជួលទាំងអស់ ចូលរួមសហការជាមួយអាជ្ញាធរ សមត្ថកិច្ចស្រងស្ថិតិ វត្តមានជនបរទេសដែលមកស្នាក់នៅផ្ទះសំណាក់ សណ្ឋាគារ ផ្ទះជួល បន្ទប់ជួលរបស់ខ្លួន និងផ្តល់ព័ត៌មានមកអាជ្ញាធរ សមត្ថកិច្ចពាក់ព័ន្ធ ដើម្បីឲ្យអាជ្ញាធរក៏ដូចជាសមត្ថកិច្ចងាយស្រួលក្នុងការគ្រប់គ្រង៕