គ្រោះទឹកជំនន់ភ្លាមៗ បង្កជាការរអិលបាក់ដីនៅតំបន់ភ្នំនៃភាគខាងជើងប្រទេសវៀតណាម ដោយបានសម្លាប់មនុស្ស៤នាក់

បរទេស៖ គ្រោះទឹកជំនន់ភ្លាមៗ បង្កជាការរអិលបាក់ដីនៅតំបន់ភ្នំនៃភាគខាងជើងប្រទេសវៀតណាម ដោយបានសម្លាប់មនុស្ស៤នាក់ ខណៈអ្នកព្យាករ បានព្រមានអំពីភ្លៀងធ្លាក់ខ្លាំងបន្ថែមទៀត។ ការណ៍នេះបានកើតឡើងជួនចំពេលត្រី Oarfish បានបង្ហាញខ្លួននៅក្នុងនៃសមុទ្ទវៀតណាម។ នេះបើតាមការបញ្ជាក់របស់រដ្ឋាភិបាលវៀតណាម នៅថ្ងៃចន្ទ ទី១៩ ខែឧសភា។

ការរអិលបាក់ដី បានកើតឡើងកាលពីថ្ងៃអាទិត្យ នៅស្រុក Ba Be នៃខេត្ត Bac Kan បន្ទាប់ពីភ្លៀងធ្លាក់ខ្លាំងកាលពីចុងសប្តាហ៍មុន។ សេចក្តីថ្លែងការណ៍បានបង្ហាញថា ៖«ស្នូរសំឡេងផ្ទុះដ៏សម្បើមមួយត្រូវបានគេឮចេញពីកំពូលភ្នំ។ បន្ទាប់មក ដី ថ្ម និងទឹកបានហូររមៀលធ្លាក់ចុះពីភ្នំ»។

ក្រោយមកមនុស្ស៤នាក់ត្រូវបានស្លាប់។ ជុំវិញបញ្ហានេះ អាជ្ញាធរខេត្តបានចេញសេចក្តីជូនដំណឹងដល់សាធារណជន និងបានអំពាវនាវឱ្យមានការត្រួតពិនិត្យសុវត្ថិភាពជាបន្ទាន់សម្រាប់សហគមន៍នៅតាមដងអូរ ទន្លេ និងតំបន់ផ្សេងទៀតដែលងាយរងគ្រោះដោយសារការបាក់ដី។ទន្ទឹមនឹង អ្នកស្រុកត្រូវតែជម្លៀសចេញជាបន្ទាន់។

ភ្លៀងធ្លាក់ដូចបាក់មេឃស្រោចលើប្រទេសវៀតណាមបែបនេះ ជួនចំពេល«ត្រី Oarfish ឬ ត្រីនាំសារនៃគ្រោះរញ្ជួយដី ឬគ្រោះមហន្តរាយ» បានបង្ហាញខ្លួននៅក្នុងដែនសមុទ្ទវៀតណាម។ ជាក់ស្តែង វីដេអូនៃសារព័ត៌វៀតណាមមួយបានបង្ហោះពីប្រជានេសាទចាប់បានត្រីប្រភេទនេះនៅក្នុងដែនសមុទ្ទវៀតណាម រួចពួកគេក៏បានលែងត្រីនោះចូលទៅក្នុងមហាសាគរវិញ។ តាមពិតទៅ ត្រីនេះជាប្រភេទត្រីម្យ៉ាងដែលរស់នៅក្នុងសមុទ្ទទឹកជ្រៅជម្រៅ២០០ម៉ែត្រ ទៅ១០០០ម៉ែត្រក្រោមបាតសមុទ្ទ។

ប្រការនេះហើយបានជាគេសន្មតថានឹងមានគ្រោះរញ្ជួយដី ឬគ្រោះមហន្តរាយណាមួយកើតឡើងនៅពេលដែលវាបង្ហាញខ្លួន ព្រោះនៅពេលដែលវាបណ្តែតខ្លួនមកលើផ្ទៃទឹក នោះប្រាកដជានៅក្រោមបាតសមុទ្ទមានបាតុភូតណាមួយកើតឡើងមិនប្រក្រតីជាក់ជាមិនខាន។

គួរបញ្ជាក់ថា វៀតណាមតែងតែរងនូវការប្រែប្រួលអាកាសធាតុដូចជាគ្រោះរញ្ជួយដីកម្រិតស្រាល ទឹកជំនន់ និងខ្យល់ព្យុះជាដើម។ សូមរំឭកថា កាលពីឆ្នាំមុន មនុស្សចំនួន ៥១៤នាក់បានស្លាប់នៅក្នុងប្រទេសវៀតណាមដោយសារគ្រោះមហន្តរាយធម្មជាតិ ហើយកាលពីខែកញ្ញា ភាគខាងជើងប្រទេសវៀតណាមត្រូវបានបំផ្លិចបំផ្លាញដោយព្យុះទីហ្វុងយ៉ាកជី ដែលបានឆក់យកជីវិតមនុស្ស៣៤៥នាក់ និងបណ្ដាលឱ្យមានការខាតបង់សេដ្ឋកិច្ចប្រមាណ៣,៣ពាន់លានដុល្លារ៕