ប្រធានាធិបតីបារាំង អំពាវនាវឱ្យក្រុមហ៊ុនអឺរ៉ុបផ្អាកផែនការវិនិយោគនៅក្នុងសហរដ្ឋអាមេរិក បន្ទាប់ពី លោក ដូណាល់ ត្រាំ ដាក់វិធានការពន្ធគយជាសកល

ប៉ារីស៖ បើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃសុក្រ ទី៤ ខែមេសា ឆ្នាំ២០២៥ លោក Emmanuel Macron ប្រធានាធិបតីបារាំង បានអំពាវនាវកាលពីថ្ងៃព្រហស្បតិ៍សប្តាហ៍នេះ ឱ្យក្រុមហ៊ុនអឺរ៉ុបផ្អាកផែនការវិនិយោគនៅក្នុងសហរដ្ឋអាមេរិក បន្ទាប់ពីប្រធានាធិបតី លោក ដូណាល់ ត្រាំ បានដាក់វិធានការពន្ធគយជាសកល លើការនាំចូលទាំងអស់ ទៅកាន់សហរដ្ឋអាមេរិក។

អំឡុងកិច្ចប្រជុំជាមួយអ្នកតំណាងឧស្សាហកម្មបារាំង លោក Macron និយាយថា «រាល់ការវិនិយោគដែលបានគ្រោងទុក ឬទើបនឹងប្រកាសប៉ុន្មានសប្តាហ៍ថ្មីៗ គួរតែផ្អាកសិន រហូតដល់គ្រប់យ៉ាងត្រូវបានបញ្ជាក់ឱ្យច្បាស់ ជាមួយអាមេរិក»។

លោក Macron បានឱ្យដឹងថា ក្រោយអាមេរិកប្រកាសវិធានការពន្ធថ្មី បារាំងមិនទាន់ដាក់ចេញនូវការឆ្លើយតបនៅឡើយទេ ប៉ុន្តែបានបន្ថែមថា វិធានការឆ្លើយតបលើកនេះ នឹងមានឥទ្ធិពលជាងការសងសឹកលើកមុនរបស់ខ្លួន ចំពោះពន្ធដែក និងអាលុយមីញ៉ូម។

លោក Macron ក៏បានស្នើឱ្យមានការប្រើប្រាស់យន្តការប្រយុទ្ធប្រឆាំងទៅនឹងការបង្ខិតបង្ខំរបស់ EU ដើម្បីការពារពាណិជ្ជកម្មរបស់ប្លុក និងធ្វើការឆ្លើយតបវិញដោយផ្តោតលើសេវាកម្មឌីជីថល និងយន្តការហិរញ្ញវត្ថុនៃសេដ្ឋកិច្ចអាមេរិកផងដែរ៕