លោក ដូណាល់ ត្រាំ និងលោក ហ្សេឡេនស្គី ព្រមព្រៀងគ្នាពួតដៃដើម្បីពន្លត់ភ្លើងសង្គ្រាមរុស្ស៊ី-អ៊ុយក្រែន
វ៉ាស៊ីនតោន៖ លោក ដូណាល់ ត្រាំ ប្រធានាធិបតីអាម៉េរិក និងប្រធានាធិបតីអ៊ុយក្រែន វ៉ូឡូឌីមៀ ហ្សេឡេនស្គី បានសន្ទនាតាមរយៈការហៅទូរសព្ទរយៈពេល១ម៉ោង ហើយបានព្រមព្រៀងគ្នាកាលពីថ្ងៃពុធទី១៩មីនា ពួតដៃគ្នាដើម្បីពន្លត់ភ្លើងសង្គ្រាមរុស្ស៊ី-អ៊ុយក្រែន។
លោក ហ្សេឡេនស្គី បានចាត់ទុកកិច្ចសន្ទនាជាមួយលោក ត្រាំ ថាជា«រឿងវិជ្ជមាន មានសារសំខាន់ និងស្មោះត្រង់»។ ជាមួយគ្នា លោក ហ្សេឡេនស្គី អះអាងនៅលើប្រព័ន្ធផ្សព្វផ្សាយសង្គមថា៖«ជំហានដំបូងមួយឆ្ពោះទៅរកការបញ្ចប់សង្រ្គាមពេញលេញ អាចជាការចាប់ផ្តើមពីការបញ្ចប់ការវាយប្រហារលើរោងចក្រថាមពល និងហេដ្ឋារចនាសម្ព័ន្ធស៊ីវិលដទៃទៀត។ ខ្ញុំបានគាំទ្រជំហាននេះ ហើយ យើងត្រៀមខ្លួនជាស្រេចដើម្បីអនុវត្តវា»។ អតីតតារាកំប្លែងដ៏លេចធ្លោរូបនេះបន្ថែមថា រុស្ស៊ីមិនទាន់ត្រៀមខ្លួនសម្រាប់សន្តិភាពទេ ដូច្នេះសហរដ្ឋអាម៉េរិកគួរតែទទួលបន្ទុកត្រួតពិនិត្យបទឈប់បាញ់ណាមួយយ៉ាងឆាប់រហ័ស។
ជាមួយគ្នានេះ សេតវិមានអះអាងថា លោក ហ្សេឡេនស្គី បានស្នើសុំឱ្យលោក ត្រាំ ផ្តល់នូវការគាំទ្រប្រព័ន្ធការពារដែនអាកាសបន្ថែមទៀត ដើម្បីការពារប្រទេសរបស់លោកប្រឆាំងនឹងការវាយសង្គ្រប់ពីសំណាក់រុស្ស៊ី ទន្ទឹមនឹងលោក ត្រាំ សន្យាជួយកំណត់ទីតាំងឧបករណ៍យោធាចាំបាច់នៅក្នុងទ្វីបអឺរ៉ុប។
កិច្ចសន្ទនារយៈពេលមួយម៉ោងរវាងលោក ត្រាំ និងលោក ហ្សេឡេនស្គី កើតឡើងបន្ទាប់បុរសឥន្ទ្រីចំពុះដែក ដូណាល់ ត្រាំ ហៅទូរសព្ទជាមួយបុរសខ្លាឃ្មុំទឹកកក វ្ល៉ាឌីមៀ ពូទីន ដោយក្នុងកិច្ចសន្ទនានោះ លោក ពូទីន បានទាត់ចោលបទឈប់បាញ់រយៈពេល ៣០ថ្ងៃពេញដែលស្នើឡើងដោយ លោក ត្រាំ ប៉ុន្តែបុរសខ្លាឃ្មុំទឹកកកយល់ព្រមផ្អាកការវាយប្រហារលើហេដ្ឋារចនាសម្ព័ន្ធថាមពល។ បើទោះបីជាមានកិច្ចព្រមព្រៀងមិនវាយប្រហារទីតាំងថាមពលគ្នាក៏ដោយ ប៉ុន្តែរដ្ឋធានីមូស្គូអះអាងថា អ៊ុយក្រែនបានវាយលុកឃ្លាំងប្រេងនៅភាគខាងត្បូងរបស់រុស្ស៊ី ខណៈរដ្ឋធានីកៀវ ប្រតិមកម្មតបវិញថា រុស្ស៊ីបានវាយប្រហារមន្ទីរពេទ្យ ផ្ទះសម្បែង និងបានផ្តាច់ចរន្តអគ្គិសនីផ្លូវដែកមួយចំនួន។
ចុងបញ្ចប់នៃកិច្ចសន្ទនា បុរសខួរក្បាលសេដ្ឋកិច្ច ដូណាល់ ត្រាំ បានស្នើទៅកាន់លោក ហ្សេឡេនស្គី ថា សហរដ្ឋអាម៉េរិកអាចជួយដំណើរការរោងចក្រថាមពលនុយក្លេអ៊ែររបស់អ៊ុយក្រែន ប៉ុន្តែត្រូវតែជាកម្មសិទ្ធិរបស់រដ្ឋបាលសហរដ្ឋអាម៉េរិក ខណៈរោងចក្រថាមពលនុយក្លេអ៊ែរដ៏ធំបំផុតរបស់អឺរ៉ុប នៅក្នុងតំបន់ហ្សាប៉ូរីហ្ស៊ារបស់អ៊ុយក្រែននេះ ត្រូវបានបិទចាប់តាំងពីកងទ័ពរុស្ស៊ីដណ្តើមកាន់កាប់កាលពីឆ្នាំ២០២២៕
