សម្តេចតេជោ៖ កម្ពុជាធ្លាប់តែជាប្រទេសនាំចូលដើម្បីផ្គត់ផ្គង់ ក្នុងស្រុក ប៉ុន្តែពេលនេះកម្ពុជា បានប្រែក្លាយជាប្រទេសផលិតហើយធ្វើការនាំចេញ

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃកម្ពុជា និងជាប្រធានកិត្តិយសសមាគមឧកញ៉ាកម្ពុជា បានមានប្រសាសន៍ថា កម្ពុជាធ្លាប់តែជាប្រទេសនាំចូលដើម្បីផ្គត់ផ្គង់ ក្នុងស្រុក ប៉ុន្តែខណៈពេលនេះកម្ពុជា បានប្រែក្លាយជាប្រទេសផលិតហើយធ្វើការនាំចេញដោយមានទំហំ ទឹកប្រាក់យ៉ាងច្រើនសន្ធឹកសន្ធាប់ រហូតដល់ជាង២០ពាន់លានដុល្លារអាមេរិកថែមទៀតផង។

សម្ដេចបានលើកឡើងបែបនេះក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីពិសាភោជនាហារសាមគ្គី នៃគ្រួសារសមាគមឧកញ៉ាកម្ពុជា នៅល្ងាចថ្ងៃទី១៤ ខែមីនា ឆ្នាំ២០២៥នេះ។

សម្តេចតេជោ ហ៊ុន សែន ថ្លែងថា នៅលើពិភពលោកយើងនេះ កម្រណាស់ដែលប្រទេសនីមួយៗមានតុល្យភាព(ភាពស្មើគ្នា)នៃជញ្ជីងពាណិជ្ជកម្ម ឧទាហរណ៍ការនាំចេញរបស់កម្ពុជា ទៅអាម៉េរិកមានចំនួនច្រើនជាង ការនាំចេញពីអាម៉េរិកចូលមកកម្ពុជា។

សម្តេចតេជោបញ្ជាក់ថា អតុល្យភាពនេះ គឺដោយសារអាម៉េរិកមានប្រជាជនជាងបីរយលាននាក់ ចំណែកកម្ពុជាមានប្រជាជនរង្វង់ដប់ប្រាំពីរលាននាក់៕