ឯកឧត្តមបណ្ឌិត ហេង សុផាន់ណារិទ្ធ ដឹកនាំកិច្ចប្រជុំបូកសរុបលទ្ធផលការងារប្រចាំខែកុម្ភៈ និងទិសដៅអនុវត្តការងារបន្ត ឆ្នាំ២០២៥ របស់នាយកដ្ឋានបញ្ជិកា និងភាគទាន នៃប.ស.ស.
ភ្នំពេញ៖ នារសៀលថ្ងៃទី១៣ ខែមីនា ឆ្នាំ២០២៥នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំខែកុម្ភៈ និងទិសដៅអនុវត្តការងារបន្តខែមីនា ឆ្នាំ២០២៥ និងដោះស្រាយបញ្ហាប្រឈម របស់នាយកដ្ឋានបញ្ជិកា និងភាគទាន នៃ ប.ស.ស. ដែលប្រព្រឹត្តទៅនៅសាលមេត្តា ស្នាក់ការកណ្តាល ប.ស.ស. រាជធានីភ្នំពេញ ដែលមានអ្នកចូលរួមសរុបប្រមាណជា ៤០រូប។
ក្នុងឱកាសនេះដែរ ឯកឧត្តមបណ្ឌិតអគ្គនាយករង ប.ស.ស. បានផ្ដល់អនុសាសន៍ណែនាំដល់ថ្នាក់ដឹកនាំ និងបុគ្គលិកទាំងអស់ នៃនាយកដ្ឋានបញ្ជិកា និងភាគទាន ត្រូវបង្កើនការយកចិត្តទុកដាក់ និងត្រូវខិតខំពង្រឹងការងារឱ្យកាន់តែហ្មត់ចត់ ក្នុងការចុះបញ្ជិកា សហគ្រាស គ្រឹះស្ថាន ការកំណត់អត្តសញ្ញាណបងប្អូនកម្មករនិយោជិត ឬបុគ្គលស្វ័យនិយោជន៍ ឱ្យបានត្រឹមត្រូវ ច្បាស់លាស់ ដោយពុំមានផ្ដល់ការអន្ដរាគមន៍ណាមួយឡើយ។
ឯកឧត្តមបណ្ឌិតអគ្គនាយករង ប.ស.ស. ក៏បានសង្កត់ធ្ងន់ចំពោះការប្រមូល និងការត្រួតពិនិត្យលើភាគទាន ដែលសហគ្រាស គ្រឹះស្ថានបង់ជាប្រចាំខែនៅទូទាំងប្រទេស ត្រូវពិនិត្យឱ្យបានច្បាស់លាស់ និងត្រូវមានយន្ដការរំលឹកជាប្រចាំចំពោះសហគ្រាស គ្រឹះស្ថានណាដែលភ្លេច ឬយឺតយ៉ាវក្នុងការបង់ មុននឹងឈានដល់ការអនុវត្តនីតិវិធីបន្ទាប់ ដើម្បីធានានូវភាពត្រឹមត្រូវ ច្បាស់លាស់ និងបត់បែន រក្សានូវអត្ថប្រយោជន៍ផ្សេងៗរបស់បងប្អូនកម្មករនិយោជិត។
ជាទីបញ្ចប់ ឯកឧត្តមបណ្ឌិតអគ្គនាយករង ក៏បានកោតសរសើរ ចំពោះថ្នាក់ដឹកនាំ និងបុគ្គលិកទាំងអស់ នៃនាយកដ្ឋានបញ្ជិកា និងភាគទាន ដែលកន្លងមកបានអនុវត្តការងារទៅដោយរលូន និងសូមរក្សាជំហរនេះ ដើម្បីបន្ដចូលរួមសកម្មភាពការងារជាមួយអង្គភាពឱ្យកាន់តែរីកចម្រើនទទួលបានលទ្ធផលល្អគួរជាទីមោទនៈបន្ថែមទៀត ៕
