នាយករដ្ឋមន្ត្រី អំពាវនាវឲ្យជនរួមជាតិទាំងក្នុង និងក្រៅប្រទេស រួមគ្នាផ្សព្វផ្សាយមរតកវប្បធម៌ខ្មែរ

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអំពាវនាវដល់ជនរួមជាតិទាំងក្នុង និងក្រៅប្រទេសសុំរួមគ្នាផ្សព្វផ្សាយមរតកវប្បធម៌ខ្មែរ តាមរយៈផ្ទាល់ខ្លួនក្ដី រៀបចំព្រឹត្តិការណ៍វប្បធម៌នានាក្ដី ដោយធ្វើទៅតាមលទ្ធភាពដែលអាចធ្វើបាន ដើម្បីរួមគ្នាលើកកម្ពស់មរតកវប្បធម៌ខ្មែរលើឆាកអន្តរជាតិ និងរួមគ្នារក្សាថែទាំងអស់គ្នាទោះនៅទីណាក៏ដោយ។

ក្នុងឱកាសអញ្ជើញជាអធិបតី “អបអរសាទរទិវាវប្បធម៌ជាតិ ៣មីនា លើកទី ២៧ និងសំណេះសំណាល ពិសាអាហារសាមគ្គីជាមួយសិល្បករ សិល្បការិនី” នាល្ងាចថ្ងៃទី៥ មីនានេះ សម្ដេចបវរធិបតី បានលើកឡើងថា ឆ្នាំនេះ គឺជាឆ្នាំទី១០ ដែលកម្ពុជាប្រារព្ធ ទិវាវប្បធម៌ជាតិ ៣មីនា លើកទី២៧ ឆ្នាំ២០២៥ ក្រោមប្រធានបទ «យុវជនដើម្បីវប្បធម៌ជាតិ» ដើម្បីផ្តល់អាទិភាពដល់យុវជនដែលជាសសរស្តម្ភរបស់ជាតិ និងជាអ្នកបន្តវេនចូលរួមក្នុងការងារអភិរក្សលើកស្ទួយ និងអភិវឌ្ឍន៍សិល្បៈវប្បធម៌របស់យើង ដែលក្នុងនោះក៏មានសិល្បៈវប្បធម៌ចម្រុះ របស់សហគមន៍ជនជាតិដើមភាគតិចនៅកម្ពុជា ឱ្យបានស្ថិតស្ថេរគង់វង្ស រីកចម្រើន ដោយមិនប្រកាន់នូវនិន្នាការនយោបាយ ជំនឿ សាសនា។

ជាមួយគ្នានោះសម្ដេចមហាបវរធិបតី បានណែនាំដល់ក្រសួងវប្បធម៌ និងវិចិត្រសិល្បៈ ឱ្យសហការជាមួយក្រសួងរៀបចំដែនដី នគរូបនីយកម្ម និងសំណង់ ត្រូវកំណត់ជាអតិបរមានៅក្នុងឆ្នាំ២០២៥ នេះ ដើម្បីសហការការពារតម្លៃដើមរបស់សម្បត្តិបេតិកភណ្ឌ រួមទាំងបេតិកភណ្ឌផង និងដើម្បីបញ្ជៀសផលប៉ះពាល់ណាមួយដល់ពលរដ្ឋ ៕