រដ្ឋបាលខេត្តរតនគិរី រៀបចំព្រឹត្តិការណ៍រត់ពាក់កណ្ដាលម៉ារ៉ាតុន ដើម្បីសុខភាព និងលើកស្ទួយវិស័យទេសចរណ៍
ភ្នំពេញ៖ រដ្ឋបាលខេត្តរតនគីរី បានរៀបចំព្រឹត្តិការណ៍រត់ពាក់កណ្ដាលម៉ារ៉ាតុន ដើម្បីសុខភាព និងលើកស្ទួយវិស័យទេសចរណ៍។ ព្រឹត្តិការណ៍នេះបានប្រារព្ធធ្វើឡើងនៅរសៀលថ្ងៃទី០១ ខែកុម្ភៈ ឆ្នាំ២០២៥ ដោយមានអត្តពលិកទាំងខ្មែរ បរទេសជាង ៤០០នាក់ចូលរួម ក្រោមវត្តមាន ឯកឧត្តម ញ៉ែម សំអឿន អភិបាលខេត្តរតនគិរី និងលោកជំទាវ។
មុនការចាប់ផ្តើមរត់ ឯកឧត្តម ញ៉ែម សំអឿន បានថ្លែងថា ព្រឹត្តិការណ៍រត់ពាក់កណ្ដាលម៉ារ៉ាតុននាពេលនេះ គឺក្នុងគោលបំណងដើម្បីសុខភាព និងលើកស្ទួយវិស័យទេសចរណ៍នៅក្នុងខេត្តរតនគិរី។
ក្នុងឱកាសនេះឯកឧត្តម អភិបាលខេត្ត បានថ្លែងអំណរគុណដល់មន្រ្តីរាជការ និងបងប្អូនប្រជាពលរដ្ឋ និងជនបរទេសផងដែរ ដែលបានចូលរួមរត់ប្រណាំង ពាក់កណ្ដាលម៉ារ៉ាតុននាថ្ងៃនេះ។ ទាំងនេះបានបង្ហាញអោយឃើញពីការចូលរួមចំណែកយ៉ាងសំខាន់ ក្នុងការលើកកម្ពស់មុខមាត់ខេត្ត សុខសុវត្ថិភាព និងទាក់ទាញភ្ញៀវទេសចរ តាមរយៈការផ្ដិតយករូបភាពជាច្រើនពីខេត្តរតនគិរី និងព្រឹត្តិការណ៍កីឡាទេសចរណ៍នេះ។ ហើយព្រឹត្តិការណ៍រត់ពាក់កណ្តាលម៉ារ៉ាតុន នាពេលនេះ ក៏បានឆ្លុះបញ្ចាំងពីការលើកកម្ពស់នៃការរស់នៅប្រកបដោយសុខុមាលភាព និងជួយលើកស្ទួយដល់វិស័យទេសចរណ៍ដោយបង្ហាញពីសម្រស់ដ៏ស្រស់ស្អាតនៃខេត្តរតនគិរីផងដែរ។
សូមបញ្ជាក់ថា អត្តពលិកទាំងបានធ្វើការរត់ក្នុង
ចម្ងាយផ្លូវ២១គីឡូម៉ែត្រ ដោយចំណុចចាប់ផ្តើម
ពីវាលរំប្លង់ (វាលថ្មដារ) ស្រុកអូរជុំ មកដល់រមណីយដ្ឋានបឹងកន្សែងក្នុងក្រុងបានលុង និងរត់៤ជុំបន្ថែមទៀតមករកទីព្រ័ត្រ នៅចំណុចរូបសំណាកគ្រួសារដំរី។ ហើយជ័យលាភីនាឱកាសនេះ អត្តពលិកចំនួន ៩នាក់ទទួលបានមេដាយមាស, មេដាយប្រាក់៨នាក់, មេដាយសំរឹទ្ធ៣នាក់ សរុប២០នាក់ ៕
