គណៈកម្មការជាតិត្រួតពិនិត្យការអនុវត្តអនុសញ្ញាអន្តរជាតិខាងការងារ បើកកិច្ចប្រជុំពិនិត្យ និងពិភាក្សាលើវឌ្ឍនភាពការងារ

ភ្នំពេញ៖ នៅរសៀលថ្ងៃពុធ ទី៨ ខែមករា ឆ្នាំ២០២៥ គណៈកម្មការជាតិត្រួតពិនិត្យការអនុវត្តអនុសញ្ញាអន្តរជាតិខាងការងារដែលកម្ពុជាបានផ្តល់សច្ចាប័ន បានបើកកិច្ចប្រជុំពិនិត្យ និងធ្វើកិច្ចពិភាក្សាលើវឌ្ឍនភាពការងាររបស់ខ្លួននៅទីស្តីការក្រសួងការងារ និងបណ្តុះបណ្តាលវិជ្ជាជីវៈ។

កិច្ចប្រជុំនេះដឹកនាំដោយ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការនៃក្រសួងការងារ និងបណ្តុះបណ្តាលវិជ្ជាជីវៈ និងជាអនុប្រធានអចិន្ត្រៃយ៍គណៈកម្មាការជាតិត្រួតពិនិត្យការអនុវត្តអនុសញ្ញាអន្តរជាតិខាងការងារដែលកម្ពុជាបានផ្តល់សច្ចាប័ន។ ក្នុងនោះក៏មានការចូលរួមពីតំណាងក្រសួងយុត្តិធម៌ ក្រសួងមហាផ្ទៃ អគ្គស្នងការនគរបាលជាតិ និងបណ្តាសមាគមនិយោជក សហជីព និងវិស័យឯកជនផងដែរ។

ថ្លែងនៅក្នុងកិច្ចប្រជុំ លោកជំទាវ សុវណ្ណ វណ្ណារតន៍ បានគូសបញ្ជាក់ថា កិច្ចប្រជុំដ៏មានសារសំខាន់របស់គណៈកម្មការជាតិត្រួតពិនិត្យការអនុវត្តអនុសញ្ញាអន្តរជាតិខាងការងារដែលកម្ពុជាបានផ្តល់សច្ចាប័ននេះ ធ្វើឡើងដើម្បីបើកកិចុ្ចពិភាក្សាចងក្រងរបាយការណ៍ដើម្បីឆ្លើយតបទៅនឹងអនុសាសន៍របស់ Committee on Freedom of Association (CFA) និងពិនិត្យលើវឌ្ឍនភាពលើបណ្តឹងមួយចំនួនផងដែរ។

លោកជំទាវរដ្ឋលេខាធិការប្រចាំការ បានគូសបញ្ជាក់បន្ថែមថា ក្រសួងការងារ និងបណ្តុះបណ្តាលវិជ្ជាជីវៈដែលជាសេនាធិការរបស់រាជរដ្ឋាភិបាលកម្ពុជាលើវិស័យការងារ និងវត្តមានរបស់តំណាងក្រសួង ស្ថាប័ន សហជីព សមាគមនិយោជក និងវិស័យឯកជន នឹងផ្តល់ធាតុចូលដ៏មានសារសំខាន់ដើម្បីបញ្ចូលទៅក្នុងរបាយការណ៍មួយមានលក្ខណៈគ្រប់ជ្រុងជ្រោយ និងមានប្រសិទ្ធភាព៕