ម៉ាឡេស៊ី និងសិង្ហបុរី ប្រកាសអំពីកិច្ចព្រមព្រៀងស្តីពីតំបន់សេដ្ឋកិច្ចពិសេសមួយនៅភាគខាងត្បូង នៃរដ្ឋចូហូរបស់ម៉ាឡេស៊ី ដើម្បីគាំទ្រដល់ការវិនិយោគ ការនាំចេញ-នាំចូលទំនិញ

កូឡាឡាំពួរ៖ ៧មករា ២០២៥ ម៉ាឡេស៊ី និងសិង្ហបុរី បានប្រកាសអំពីកិច្ចព្រមព្រៀងមួយ ស្តីពីតំបន់សេដ្ឋកិច្ចពិសេសមួយនៅភាគខាងត្បូង នៃរដ្ឋចូហូរបស់ម៉ាឡេស៊ី។

កិច្ចព្រមព្រៀង នៅ ថ្ងៃ អង្គារទី៧ ខែមករានេះ ត្រូវ បាន ប្រកាស ក្នុង អំឡុង ដំណើរ ទស្សនកិច្ច ទៅកាន់ ប្រទេស ម៉ាឡេស៊ី ដោយ នាយករដ្ឋមន្ត្រី សិង្ហ បុរី លោក ឡរិន វង់ (Lawrence Wong) ខណៈកិច្ចព្រមព្រៀងនេះ គឺក្នុងគោលបំណងគាំទ្រដល់ការវិនិយោគ ការនាំចេញនាំ-នាំចូលទំនិញ និងទំនាក់ទំនងប្រជាជនរវាងប្រទេសទាំងពីរ។

លោក វង់ បានប្រាប់សន្និសីទសារព័ត៌មានរួមគ្នាជាមួយសមភាគីម៉ាឡេស៊ី លោក អាន់វ៉ា អ៊ីប្រាហ៊ីម ថា៖«វាជាគម្រោងដ៏សំខាន់មួយ នៅពេលចរចាកិច្ចព្រមព្រៀង ភាគីទាំងពីរបានចូលរួមយ៉ាងសកម្មជាមួយភាគីពាក់ព័ន្ធ ដើម្បីធានាថា តំបន់សេដ្ឋកិច្ចពិសេសមានលក្ខខណ្ឌ ដើម្បីជួយឱ្យអាជីវកម្មរបស់យើងរីកចម្រើនជាមួយគ្នាក្នុងរយៈពេលវែងជាងនេះ»។

ជាមួយគ្នានេះ លោក អាន់វ៉ា បានលើកឡើងថា តំបន់សេដ្ឋកិច្ចពិសេសគឺជាគំនិតផ្តួចផ្តើមតែមួយគត់ ព្រោះវាកម្រមានណាស់សម្រាប់ប្រទេសទាំងពីរក្នុងការសហការគ្នាលើគម្រោងតែមួយ។

ទន្ទឹមគ្នា រដ្ឋមន្ត្រីសេដ្ឋកិច្ចម៉ាឡេស៊ី លោក រ៉ាហ្វីស៊ី រ៉ាមលី (Rafizi Ramli) បានប្រាប់អ្នកយកព័ត៌មានថា ប្រទេសទាំងពីរមានគោលបំណងទាក់ទាញការវិនិយោគដែលមានតម្លៃខ្ពស់ចូលទៅក្នុងរដ្ឋចូហូ ក្នុងវិស័យជាច្រើនចាប់ពីការផលិត និងការដឹកជញ្ជូន រហូតដល់ការផ្លាស់ប្ដូរទេសចរណ៍ និងថាមពល។ លើសពីនេះ ប្រទេសទាំងពីរបានកំណត់គោលដៅគម្រោងចំនួន៥០នៅតំបន់សេដ្ឋកិច្ចក្នុងរយៈពេល ៥ឆ្នាំដំបូងនៃការចាប់ផ្តើម និងការបង្កើតការងារជំនាញចំនួន ២ម៉ឺនកន្លែង៕