អភិបាលខេត្តតាកែវ ណែនាំអាជ្ញាធរមូលដ្ឋានពង្រឹងយន្តការដោះស្រាយបញ្ហាវិវាទដីធ្លីជូនពលរដ្ឋ ឱ្យបានល្អប្រសើរ

ភ្នំពេញ៖ ក្នុងឱកាសអញ្ជើញចុះពិនិត្យលើករណីប្ដឹងជំទាស់ការចុះបញ្ជីដីធ្លីមានលក្ខណៈជាប្រព័ន្ធ ដែលជាប់ពាក់ព័ន្ធនឹងព្រំប្រទល់ស្រុកបសេដ្ឋ ខេត្តកំពង់ស្ពឺ និងស្រុកត្រាំកក់ ខេត្តតាកែវ នាថ្ងៃទី២ ខែមករា ឆ្នាំ២០២៥ នៅសាលាឃុំអូសារាយ ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បានធ្វើការណែនាំ និងរំលឹកដល់អាជ្ញាធរឃុំអូសារាយ រួមនឹងមន្រ្តីពាក់ព័ន្ធ ត្រូវពង្រឹងយន្តការដោះស្រាយបញ្ហាវិវាទដីធ្លីជូនប្រជាពលរដ្ឋ ឱ្យបានល្អប្រសើរថែមទៀត។

ឯកឧត្តម វ៉ី សំណាង បានថ្លែងថា បញ្ហាវិវាទដីធ្លីជាបញ្ហាស្មុកស្មាញដែលទាមទាឱ្យអាជ្ញាធរ រួមនឹងមន្រ្តីពាក់ព័ន្ធយកចិត្តទុកដាក់ រួមគ្នាដោះស្រាយរាល់បញ្ហាវិវាទដីធ្លីផ្សេងៗ របស់ប្រជាពលរដ្ឋដែលកើតមានឡើង ក្នុងមូលដ្ឋានឱ្យបានទាន់ពេលវេលា ជាពិសេសដីដែលមិនមានទំនាស់ត្រូវចុះបញ្ជីលក្ខណៈជាប្រព័ន្ធឱ្យបានលឿន ដើម្បីស្របតាមគោលនយោបាយរបស់រាជរដ្ឋាភិបាល ក៏ដូចជាក្រសួងរៀបចំដែនដី នគររូបនីយកម្ម និងសំណង់បានកំណត់។

ឯកឧត្តមអភិបាលខេត្ត បានបញ្ជាក់ថា នៅពេលដែលមូលដ្ឋានរបស់យើង គ្មានបញ្ហាទំនាស់ដីធ្លីកើតឡើង វានឹងធ្វើឱ្យមានការចាប់អារម្មណ៍ពីបណ្ដាអ្នកវិនិយោគគិនក្នុងស្រុក និងក្រៅស្រុកមកបណ្ដាក់ទុនជាក់ជាមិនខាន ដែលបង្កើតឱកាសការងារដល់ប្រជាពលរដ្ឋក្នុងនិងក្រៅតំបន់ ពិសេសលើកស្ទួយសេដ្ឋកិច្ចជាតិកាន់តែរីកចម្រើនបន្ថែមទៀត។

ក្នុងឱកាសនោះដែរ ឯកឧត្តមអភិបាលខេត្តតាកែវ ក៏បានណែនាំដល់អាជ្ញាធមូលដ្ឋាន ត្រូវបង្កលក្ខណៈងាយស្រួលដល់អ្នកវិនិយោគដែលមកបណ្ដាក់ទុននៅមូលដ្ឋានរបស់ខ្លួន និងត្រូវជួយសម្របសម្រួលគ្រប់បែបយ៉ាងដល់អ្នកវិនយោគ ធ្វើយ៉ាងណាឱ្យអ្នកវិនិយោគមានភាពកក់ក្ដៅ និងធ្វើឱ្យពួកគេអូសទាញអ្នកវិនិយោគមកធ្វើការវិនិយោគ នៅក្នុងមូលដ្ខានរបស់យើងថែមទៀត ៕